Indian Stock Market Crash US-Iran War Impact : અમેરિકા અને ઈરાન વચ્ચે ચાલી રહેલા યુદ્ધ અને મધ્ય પૂર્વમાં ઉથલપાથલ વચ્ચે શેરબજારમાં મોટો કડાકો નોંધાયો છે. સેન્સેક્સના પોઈટ તૂટતાં રોકાણકારોના રૂ. 3 લાખ કરોડ સ્વાહા થયા છે. ભારતીય શેરબજારમાં શુક્રવારે અઠવાડિયાના છેલ્લા ટ્રેડિંગ દિવસે નોંધપાત્ર ઘટાડો નોંધાયો હતો. બંને મુખ્ય સૂચકાંકો, BSE સેન્સેક્સ અને NSE નિફ્ટી 50માં નોંધપાત્ર ઘટાડો જોવા મળ્યો હતો. જેમાં BSE સેન્સેક્સ 1,097 પોઈન્ટ (1.37%) ઘટીને 78,918.90 પર બંધ થયો છે, જ્યારે NSE નિફ્ટી 50 પણ 315.45 પોઈન્ટ (1.27%) ઘટીને 24,450.45 પર બંધ થયો છે.
રોકાણકારોના રૂ.3 લાખ કરોડ સ્વાહા
માર્કેટ કેપમાં રોકાણકારોને આશરે રૂ.3 લાખ કરોડનું નુકસાન થયું હોવાનું સામે આવ્યું છે. આ ઘટાડા પાછળના મુખ્ય કારણોમાં ક્રૂડ ઓઇલના ભાવમાં વધારો, વિદેશી બજારોમાંથી નબળા સંકેતો અને રોકાણકારો દ્વારા ભારે નફા-બુકિંગ હોવાનું માનવામાં આવે છે.
શેરબજારમાં કડાકા પાછળના કારણો...
ગયા સપ્તાહના અંતે અમેરિકા અને ઇઝરાયલે ઇરાન પર હુમલા શરૂ કર્યા, જેમાં ઇરાનના સર્વોચ્ચ નેતા આયતુલ્લાહ અલી ખામેનેઈનું મોત થયું હતું. ઇરાને ગલ્ફ દેશો પર હુમલાઓ અને કાર્યવાહી કરીને બદલો લીધો છે, જેના કારણે હોર્મુઝ સ્ટ્રેટ દ્વારા તેલ પુરવઠો ખોરવાઈ ગયો છે.
ક્રૂડ ઓઇલના ભાવમાં વધારો
પશ્ચિમ એશિયામાં તણાવ વધવાથી ક્રૂડ ઓઇલના ભાવ પ્રતિ બેરલ 80 ડોલરથી ઉપર ગયા છે. જો કે, શુક્રવારે સવારે ફ્યુચર્સ ટ્રેડમાં બ્રેન્ટ ક્રૂડ 2.4% ઘટીને 83.21 ડોલર પ્રતિ બેરલ થયું છે. WTI ક્રૂડ 3% ઘટીને 78.54 ડોલર પ્રતિ બેરલ પર ટ્રેડ થઈ રહ્યું હતું.
આ પણ વાંચો: ઈરાન યુદ્ધ વચ્ચે ઓઇલ સપ્લાયમાં ભારતને વધારાની છૂટ નહીં આપે રશિયા: રિપોર્ટમાં દાવો
યુએસ ફ્યુચર્સ
ઇરાન યુદ્ધ અને તેલના ભાવમાં વધારાને કારણે આ અઠવાડિયે યુએસ શેરબજારમાં ઘટાડો થયો છે. આ પછી, શુક્રવારે યુએસ ફ્યુચર્સ મોટાભાગે સ્થિર રહ્યો છે. ડૉવ જોન્સ ઇન્ડસ્ટ્રિયલ એવરેજ સાથે જોડાયેલા ફ્યુચર્સ 103 પોઈન્ટ અથવા 0.2% વધ્યા છે. S&P 500 ફ્યુચર્સ 0.1% વધ્યા અને નેસ્ડેક 100 ફ્યુચર્સ પણ 0.1% વધ્યા છે.
