ચાંદીમાં તેજીનો ફુગ્ગો ફૂટ્યો, એક અઠવાડિયામાં ભાવ રૂ. 25000 સુધી તૂટ્યો, જાણો કારણ

Silver Price Down: છેલ્લા એક અઠવાડિયામાં સોના અને ચાંદીના ભાવમાં તીવ્ર ઘટાડો થયો છે. ચાંદીના ભાવ સતત ઓલટાઈમ હાઈ નોંધાવ્યા બાદ ગયા અઠવાડિયાથી મંદીનો સામનો કરી રહ્યા છે. માત્ર સાત દિવસમાં ચાંદીના ભાવમાં પ્રતિ કિલોગ્રામ રૂ. 20,000 થી વધુનો ઘટાડો થયો છે. ચાંદીના ભાવ માત્ર MCX પર જ નહીં પરંતુ સ્થાનિક બજારમાં પણ તીવ્ર ઘટાડો થયો છે. તાજેતરમાં, ચાંદી રૂ. 1.80 લાખના આંકને પાર કરી ગઈ હતી, પરંતુ હવે તે તેની ટોચથી નોંધપાત્ર રીતે રૂ. 25,000 ઘટી રૂ. 1.65 લાખ પ્રતિ કિગ્રાની સપાટીએ પહોંચી છે. ચાલો આ ઘટાડા પાછળના મુખ્ય કારણો જાણીએ...

MCX પર ચાંદી સસ્તી થઈ

જ્યારે સોનું સતત ઘટી રહ્યું છે, ત્યારે બીજી કિંમતી ધાતુ, ચાંદીનો ભાવ પણ ઘટી રહ્યો છે. 16 ઓક્ટોબરે, મલ્ટી કોમોડિટી એક્સચેન્જ (MCX) પર ચાંદીનો ભાવ રૂ. 1,67,663 પ્રતિ કિલોગ્રામ હતો. જોકે, શુક્રવારે, MCX પર 1 કિલો ચાંદીનો વાયદા ભાવ રૂ. 1,47,150 થયો હતો. તે મુજબ, માત્ર સાત ટ્રેડિંગ દિવસોમાં ચાંદી રૂ. 20,513 પ્રતિ કિલોગ્રામ ઘટી છે.

સ્થાનિક બજારમાં ભાવ ઘટ્યાં

ચાંદીના ભાવમાં માત્ર મલ્ટી કોમોડિટી એક્સચેન્જ (MCX) પર જ નહીં પરંતુ સ્થાનિક બજારમાં પણ તીવ્ર ઘટાડો જોવા મળ્યો છે. ઇન્ડિયન બુલિયન જ્વેલર્સ એસોસિએશન (IBJA.com) પર અપડેટેડ દરો પર નજર કરીએ તો, 16 ઓક્ટોબરે ચાંદીનો ભાવ ₹1,68,083 પ્રતિ કિલો હતો, જે અઠવાડિયાના છેલ્લા ટ્રેડિંગ દિવસે શુક્રવારે ઘટીને ₹1,47,033 પ્રતિ કિલો થયો છે. પરિણામે, તેની કિંમત ₹21,050 પ્રતિ કિલો ઘટી ગઈ છે. અમદાવાદ સોની બજારમાં ચાંદી તેની રૂ. 1.80 લાખની ટોચેથી રૂ. 25000 ઘટી રૂ. 1.65 લાખ પ્રતિ કિગ્રા થઈ છે.

ચાંદીમાં ઘટાડા પાછળનું પરિબળ

ચાંદીના ભાવમાં ઘટાડા માટે ફક્ત એક નહીં પરંતુ અનેક કારણો છે. પહેલું કારણ દિવાળી અને ધનતેરસના તહેવારો પછી માંગમાં ઘટાડો છે, જેના કારણે ભાવ પર દબાણ આવ્યું છે. બીજું કારણ એ છે કે રોકાણકારો દ્વારા ઓલટાઈમ હાઈથી ચાંદીમાં મોટાપાયે પ્રોફિટ બુકિંગ જોવા મળ્યું છે. ત્રીજું કારણ યુએસ ડોલરમાં મજબૂતાઈ હોવાનું માનવામાં આવે છે. સોના અને ચાંદી બંનેનો વેપાર ડોલરમાં થાય છે. તેથી, જ્યારે યુએસ ડોલર મજબૂત થાય છે, ત્યારે અન્ય દેશોના રોકાણકારો માટે ચાંદી વધુ મોંઘી બને છે, અને તેની માંગમાં ઘટાડો થાય છે. 2019 થી ડોલર ઇન્ડેક્સમાં 0.8% નો વધારો જોવા મળ્યો છે. ભલે તે નજીવી હોય, આ રોકાણકારોની ભાવનાને અસર કરી રહ્યું છે.  વધુમાં ચાંદીના ભાવમાં ઐતિહાસિક ઉછાળાના કારણે માર્કેટમાં સ્ટોકની તંગી સર્જાઈ છે.

અન્ય પરિબળોની વાત કરીએ તો, ચોથું મુખ્ય કારણ જિઓ-પોલિટિકલ સ્થિરતા છે. જો વૈશ્વિક પરિસ્થિતિઓ સ્થિર રહે અથવા આર્થિક તણાવ ઓછો થાય, તો સેફ હેવનની માગ ઘટે છે.  યુએસ અને ચીન વચ્ચે લાંબા સમય સુધી વેપાર તણાવના કારણે ભાવમાં વધારો થયો હતો, પરંતુ હવે બંને દેશો વચ્ચે તણાવ ઓછો થવાના સંકેતોએ ચાંદીના ભાવ પર દબાણ લાવ્યું છે, જેના કારણે ચાંદીના ભાવમાં ઘટાડો થયો છે. પાંચમું કારણ ETF અને કોમોડિટી બજારોમાં વધઘટને આભારી હોઈ શકે છે. ETF ફંડ ચાંદીમાં તેમનો હિસ્સો ઘટાડે છે, ત્યારે બજારમાં પુરવઠો વધે છે અને ભાવ ઘટવા લાગે છે.