અમદાવાદ : પશ્ચિમ એશિયા યુદ્ધ અને શિપિંગ રૂટ બંધ થવાને કારણે ભારતની એન્જિનિયરિંગ ક્ષેત્રની નિકાસમાં ભારે ઘટાડો નોંધાયો છે. સંયુક્ત આરબ અમીરાત (યુએઈ) ના બજારમાં શિપમેન્ટમાં ૬૬.૮% અને સાઉદી અરેબિયામાં ૪૫%નો ઘટાડો થયો છે. માર્ચમાં યુએઈમાં એન્જિનિયરિંગ માલની નિકાસ ઘટીને ૨૩૭.૪ મિલિયન ડોલર થઈ ગઈ જે પાછલા વર્ષના સમાન સમયગાળામાં ૭૧૪.૮ મિલિયન ડોલર હતી. સાઉદી અરેબિયાની નિકાસ માર્ચ ૨૦૨૫ માં ૪૫૦.૫ મિલિયન ડોલર થી ઘટીને ૨૪૭.૭ મિલિયન ડોલર થઈ હતી.
યુએઈ વેપાર-ટ્રાન્સશિપમેન્ટ હબ હોવાથી, ઘણા ભારતીય નિકાસકારો યુરોપ, આફ્રિકા અને યુએસએ સાથે વધુ વેપાર માટે ત્યાં વેરહાઉસ ધરાવે છે. આ ક્ષેત્રમાં તાજેતરના ભૂ-રાજકીય સંઘર્ષોએ પણ આ વેરહાઉસ પ્રવૃત્તિઓને અસર કરી છે તેમ એન્જિનિયરિંગ એક્સપોર્ટ પ્રમોશન કાઉન્સિલે જણાવ્યું હતું.
મુખ્ય પશ્ચિમ એશિયાઈ બજારોમાં ફટકો પડયો હોવા છતાં. આ મહિના દરમિયાન એકંદર એન્જિનિયરિંગ ક્ષેત્રની નિકાસ ૧.૧૩% વધીને ૧૦.૯૪ બિલિયન ડોલર થઈ હતી. ૨૦૨૫-૨૬ દરમિયાન એન્જિનિયરિંગ ક્ષેત્રની નિકાસ ૪.૮૬% વધીને ૧૨૨.૪૩ બિલિયન ડોલર થઈ હતી.
૨૦૨૫-૨૬ માં કુલ વેપારી નિકાસમાં આ ક્ષેત્રનો હિસ્સો ૨૭.૭૧% હતો. માર્ચ ૨૦૨૬માં આ હિસ્સો ૨૮.૧૧% થી પણ વધુ સારો હતો. આગળ જતાં, નિકાસ ગતિને ટકાવી રાખવા અને લાંબા ગાળાના નિકાસ લક્ષ્યો તરફ આગળ વધવા માટે ક્ષેત્રીય સ્થિતિસ્થાપકતા, બજાર વૈવિધ્યકરણ અને લક્ષિત નીતિગત હસ્તક્ષેપોનું સંયોજન મહત્વપૂર્ણ બની રહેશે.
સપ્ટેમ્બર અને જાન્યુઆરી દરમિયાન વધારાના ટેરિફ દબાણ હોવા છતાં, યુએસ ભારતીય એન્જિનિયરિંગ નિકાસ માટે સૌથી મોટું બજાર રહ્યું, જે ૫૦% જેટલું ઊંચું હતું. યુએસમાં નિકાસ ૨.૩% વધીને ૧૯.૬ બિલિયન ડોલર થઈ હતી.
અન્ય ઉચ્ચ વૃદ્ધિ ધરાવતા બજારોમાં જર્મનીનો સમાવેશ થાય છે જ્યાં શિપમેન્ટ વાર્ષિક ધોરણે ૧૪.૬% વધીને ૪.૯૬ બિલિયન ડોલર, યુકે ૧૮.૨% વધીને ૪.૭૪ બિલિયન ડોલર, ચીન ૩૨.૪% વધીને ૩.૫૩ બિલિયન ડોલર અને કોરિયા ૧૬.૭% વધીને ૩.૦૩ બિલિયન ડોલર રહ્યા હતા. નેધરલેન્ડ્સ, વિયેતનામ, સ્પેન અને બેલ્જિયમ બજારો અન્ય ઉચ્ચ પ્રદર્શન બજારો હતા.
લોખંડ અને સ્ટીલ અને તેમના ઉત્પાદનોની નિકાસ ૭% વધીને ૨૦.૬૭ અબજ ડોલર થઈ હતી. અન્ય ધાતુ ઉત્પાદનોની નિકાસ ૧૯% વધીને ૧૪.૧૯ અબજ ડોલર થઈ હતી. ઔદ્યોગિક મશીનરીની નિકાસ ૭% વધીને ૧૫.૩૬ અબજ ડોલર અને ઇલેક્ટ્રિકલ મશીનરીની નિકાસ ૭% વધીને ૧૫.૩ અબજ ડોલર થઈ.
ઓટો સેક્ટરની નિકાસ ૧૪.૩% વધીને ૨૬.૮ અબજ ડોલર થઈ હતી. એન્જિનિયરિંગ ક્ષેત્રની નિકાસમાં આ ક્ષેત્રનો હિસ્સો સૌથી વધુ હતો. ઓટો સેક્ટરમાં, મોટર વાહન અને કારની નિકાસ ૨૩% વધીને ૧૧.૦૮ અબજ ડોલર થઈ હતી. ટુ-વ્હીલર અને થ્રી-વ્હીલરની નિકાસ ૨૪% વધીને ૩.૯ અબજ ડોલર જ્યારે ઓટો કોમ્પોનન્ટ નિકાસ ૫% વધીને ૮.૫૬ અબજ ડોલર રહી હતી. ટાયરની નિકાસ ૪% વધીને ૩.૨૦ અબજ ડોલર જયારે બાંધકામ મશીનરીની નિકાસ ૨૦% વધીને $૩.૬ બિલિયન થઈ હતી.
