NPS હવે સોના- ચાંદી, REITs, AIFs, IPOમાં રોકાણ કરી શકશે

અમદાવાદ : નવા નિયમો હેઠળ, નેશનલ પેન્શન સિસ્ટમ  (એનપીએસ) ઇક્વિટી ફંડ્સ હવે ગોલ્ડ-સિલ્વર ઈટીએફ, રીટ્સ, ઇક્વિટી એઆઈએફ અને આઈપીઓ માં પણ રોકાણ કરી શકે છે. તાજેતરના વર્ષોમાં રોકાણ વિકલ્પોમાં આ સૌથી મોટી છૂટ છે, જે પેન્શન કોર્પસને લાંબા ગાળે વધુ સારી રીતે વિકસાવવામાં મદદ કરી શકે છે.

PFRDA દ્વારા ૧૦ ડિસેમ્બર, ૨૦૨૫ના રોજ જારી કરાયેલા એક માસ્ટર સર્ક્યુલરમાં આ ફેરફારો કરવામાં આવ્યા હતા. આ પરિપત્ર યુનિફાઇડ પેન્શન સ્કીમ (યુપીએસ), નેશનલ પેન્શન સિસ્ટમ (એનપીએસ), અટલ પેન્શન યોજના અને તમામ સંબંધિત સરકારી અને ખાનગી ક્ષેત્રની યોજનાઓને લાગુ પડે છે.

આ માસ્ટર સર્ક્યુલર ઇક્વિટી, ડેટ, ટૂંકા ગાળાના સાધનો, ગોલ્ડ-સિલ્વર ઈટીએફ અને અન્ય યોજનાઓ માટે રોકાણ મર્યાદા નક્કી કરે છે. આ પરિપત્ર અગાઉના તમામ પરિપત્રોને રદ કરે છે અને તાત્કાલિક અમલમાં આવે છે.

અત્યાર સુધી, NPS ઇક્વિટી ફંડ્સ ફક્ત લિસ્ટેડ શેરોમાં જ રોકાણ કરી શકતા હતા. નવા નિયમોને અનુસરીને, ઇક્વિટી પોર્ટફોલિયોના ૫% સુધીનું રોકાણ હવે નીચેનામાં કરી શકાય છે : જેમાં સોના અને ચાંદીના ઈટીએફ (ફુગાવાના હેજિંગ માટે ઉત્તમ), રીટ્સ (મિલકત ખરીદ્યા વિના રિયલ એસ્ટેટમાં શેર), ઇક્વિટી-લક્ષી કેટેગરી ૧ અને ૨ એઆઈએફ (વિશિષ્ટ ઇક્વિટી વ્યૂહરચના), અને નિફ્ટી ૨૫૦માં આવનારા આઈપીઓ સામેલ છે.