શેરબજારમાં હાહાકાર: નિફ્ટી IT ઇન્ડેક્સ 1700 પોઇન્ટ તૂટ્યો, જાણો કયા શેરોમાં ભારે કડાકો

IT Stocks Crash: ભારતીય શેરબજારમાં આજે અચાનક ભારે વેચવાલીનો માહોલ જોવા મળ્યો છે. સવારે દબાણ સાથે ખૂલેલા બજારમાં બપોર સુધીમાં પ્રોફિટ બુકિંગ અને ગભરાટભરી વેચવાલી હાવી થઈ ગઈ હતી. આ કડાકામાં સૌથી મોટો ફટકો આઇટી (IT) સેક્ટરને પડ્યો છે, જ્યાં નિફ્ટી આઇટી ઇન્ડેક્સ 5.73% એટલે કે 1700થી વધુ પોઇન્ટ તૂટીને 29,338.3ની સપાટીએ પહોંચી ગયો હતો.

દિગ્ગજ આઇટી શેરો પાણી-પાણી

આઇટી સેક્ટરની અગ્રણી કંપની ટીસીએસ(TCS)નો શેર સૌથી વધુ 8.74% ગગડીને ₹2231 પર કારોબાર કરી રહ્યો હતો, જે જુલાઈ 2020 પછીનું તેનું સૌથી નીચું સ્તર છે. આ સિવાય અન્ય આઇટી કંપનીઓની સ્થિતિ પણ નાજુક જોવા મળી:

એચસીએલ ટેક (HCL Tech): 4.84%ના ઘટાડા સાથે ₹1183 પર.

ઇન્ફોસિસ (Infosys): 4.19%નો મોટો ઘટાડો.

વિપ્રો (Wipro): 3.67% તૂટીને ₹202 પર આવી ગયો.

LTM અને કોફોર્જ (Coforge): આ શેરોમાં પણ અનુક્રમે 8% અને 6.30% સુધીનો મોટો કડાકો બોલાઈ ગયો હતો.

સેન્સેક્સ અને નિફ્ટીની સ્થિતિ

બપોરે 12:30 વાગ્યા આસપાસ બોમ્બે સ્ટોક એક્સચેન્જનો સેન્સેક્સ (Sensex) 1100 પોઇન્ટ અથવા 1.53% તૂટીને 73,506.15 પર આવી ગયો હતો. જ્યારે નેશનલ સ્ટોક એક્સચેન્જનો નિફ્ટી (Nifty) 323.20 પોઇન્ટ અથવા 1.38% ના ઘટાડા સાથે 23,160.35 પર ટ્રેડ કરતો જોવા મળ્યો હતો. બજારના તમામ 16 સેક્ટોરલ ઇન્ડેક્સ લાલ નિશાનમાં (ઘટાડા સાથે) કારોબાર કરી રહ્યા હતા.

IT કંપનીઓ તૂટવા પાછળના 4 મુખ્ય કારણો

AI(આર્ટિફિશિયલ ઇન્ટેલિજન્સ)નો ખતરો: બજારમાં એવો ડર ઘર કરી ગયો છે કે જનરેટિવ એઆઇ અને ઓટોમેશનને કારણે પરંપરાગત આઇટી સેવાઓની માંગમાં મોટો ઘટાડો આવી શકે છે.

પ્રોફિટ બુકિંગ: છેલ્લા ત્રણ ટ્રેડિંગ સેશનમાં નિફ્ટી આઇટી ઇન્ડેક્સ 6% જેટલો ઉછળ્યો હતો, જેથી રોકાણકારોએ આજે નફો વસૂલ કરવાનું યોગ્ય માન્યું હતું.

વિદેશી રોકાણકારો(FIIs)ની વેચવાલી: ગ્લોબલ ઇન્વેસ્ટર્સ ભારતીય આઇટી સેક્ટરમાંથી નાણાં ખેંચીને વૈશ્વિક સ્તરે એઆઇ ક્ષેત્રે રહેલી નવી તકો તરફ વાળી રહ્યા છે.

વૈશ્વિક તણાવ: આંતરરાષ્ટ્રીય બજારમાં ક્રૂડ ઓઇલની ઊંચી કિંમતો (આશરે 105 ડૉલર) અને ભૌગોલિક-રાજકીય તણાવને કારણે સમગ્ર માર્કેટ સેન્ટિમેન્ટ નબળું પડ્યું છે.