Silver and Gold Weekly Price Report : મિડલ ઈસ્ટમાં અમેરિકા, ઇઝરાયલ અને ઈરાન વચ્ચે ચાલી રહેલા ભીષણ જંગના કારણે દુનિયાભરમાં તણાવ છે. સામાન્ય રીતે આવી સ્થિતિમાં સોના-ચાંદીના ભાવ વધતા હોય છે, પરંતુ આ વખતે બજારમાં ઉલટી ગંગા વહેતી જોવા મળી રહી છે. વૈશ્વિક અસ્થિરતા વચ્ચે પણ સોના અને ચાંદીની કિંમતોમાં મોટો ઘટાડો નોંધાયો છે.
ચાંદીના ભાવમાં સાપ્તાહિક ઘટાડો
ચાંદીના ભાવની વાત કરીએ તો, છેલ્લા એક અઠવાડિયામાં તેમાં ધરખમ ઘટાડો થયો છે. 27 ફેબ્રુઆરીએ ચાંદીનો ભાવ પ્રતિ કિલો ₹2,82,644 હતો, જે શુક્રવાર સુધીમાં ઘટીને ₹2,68,569 પર આવી ગયો છે. આમ, માત્ર એક અઠવાડિયામાં જ ચાંદીના ભાવમાં પ્રતિ કિલો ₹14,075 નો ઘટાડો જોવા મળ્યો છે.
સર્વોચ્ચ સપાટીથી ચાંદી ₹1.51 લાખ સસ્તી
ઐતિહાસિક રેકોર્ડ સાથે સરખામણી કરીએ તો ચાંદી અત્યારે ઘણી સસ્તી મળી રહી છે. 29 જાન્યુઆરીએ ચાંદી ₹4,20,048 ની ઓલ ટાઈમ હાઈ સપાટીએ પહોંચી હતી. અત્યારના ભાવ મુજબ, ચાંદી તેના સર્વોચ્ચ સ્તરથી ₹1,51,479 જેટલી સસ્તી મળી રહી છે.
સોનાના ભાવમાં પણ નરમાઈ
સોનાના ભાવમાં પણ ગત સપ્તાહ દરમિયાન નરમાઈ જોવા મળી છે. 27 ફેબ્રુઆરીએ સોનું પ્રતિ 10 ગ્રામ ₹1,62,104 પર હતું, જે વીતેલા શુક્રવારે ₹1,61,675 પર બંધ થયું હતું. અઠવાડિયાના અંતે સોનામાં પ્રતિ 10 ગ્રામ ₹429 નો મામૂલી ઘટાડો નોંધાયો છે.
ગોલ્ડ રેટ્સમાં ₹31,000 થી વધુનો ઘટાડો
સોનું પણ તેના હાઈ લેવલથી અત્યારે ગ્રાહકોને રાહત આપી રહ્યું છે. 29 જાન્યુઆરીએ સોનું ₹1,93,096 ની ટોચે પહોંચ્યું હતું. હાલના બજાર ભાવ પ્રમાણે 24 કેરેટ સોનું તેના ઓલ ટાઈમ હાઈ લેવલથી ₹31,421 જેટલું નીચે ટ્રેડ કરી રહ્યું છે.
ભાવ ઘટવા પાછળનું કારણ
યુદ્ધ જેવી ગંભીર સ્થિતિમાં પણ કિંમતી ધાતુઓના ભાવ ઘટવા પાછળ નિષ્ણાતો 'પ્રોફિટ બુકિંગ' ને મુખ્ય કારણ માની રહ્યા છે. એક્સપર્ટ્સનું કહેવું છે કે અગાઉ ભાવમાં મોટો ઉછાળો આવી ચૂક્યો હોવાથી હવે રોકાણકારો નફો વસૂલી રહ્યા છે અને કટોકટીના સમયે પોતાની પાસે રોકડ (Cash) રાખવાનું વધુ પસંદ કરી રહ્યા છે.
