ઐતિહાસિક કડાકા બાદ વાયદા બજારમાં ફરી તેજી! સોનામાં 3350 તો ચાંદીમાં 8540નો ઉછાળો

Gold Price Today: સપ્તાહની શરૂઆતમાં સોનાના ભાવમાં આવેલા મોટા કડાકા બાદ શુક્રવારે બજારમાં જોરદાર રિકવરી જોવા મળી છે. મલ્ટી કોમોડિટી એક્સચેન્જ(MCX) પર સોનાના ભાવમાં સવારના કારોબારમાં જ 2%થી વધુનો ઉછાળો નોંધાયો હતો, જેનાથી રોકાણકારોને મોટી રાહત મળી છે. જોકે, બજારમાં હજુ પણ ભારે અસ્થિરતાનો માહોલ છે અને આગળની દિશા અંગે અનિશ્ચિતતા યથાવત્ છે.

સોનામાં ₹3350 અને ચાંદીમાં ₹8540નો તોતિંગ ઉછાળો

શુક્રવારે સોના-ચાંદીના ભાવમાં મોટો ફેરફાર જોવા મળ્યો છે. સવારના સત્રમાં સોનાના ભાવમાં 2.30% એટલે કે ₹3350નો વધારો થતાં તે પ્રતિ 10 ગ્રામ દીઠ ₹1,48,302 પર પહોંચી ગયું હતું. તેવી જ રીતે ચાંદીમાં પણ આક્રમક તેજી જોવા મળી છે, જેમાં ₹8540ના વધારા સાથે ભાવ પ્રતિ કિલોગ્રામ ₹2,40,000ની સપાટીએ પહોંચ્યો છે. બજારના નિષ્ણાતોના મતે, આ તેજી પાછળનું મુખ્ય કારણ 'વેલ્યુ બાયિંગ' છે, જેમાં રોકાણકારોએ નીચા ભાવનો લાભ ઉઠાવીને ખરીદીમાં રસ દાખવ્યો છે.

સોનું ₹1,44,954ની સપાટીએ બંધ

શેરબજાર અને કિંમતી ધાતુઓના માર્કેટમાં આ અઠવાડિયે ભારે ઉથલપાથલ જોવા મળી છે. ખાસ કરીને ગુરુવારે સોના અને ચાંદીના ભાવમાં આવેલા મોટા ઘટાડાએ રોકાણકારોની ચિંતામાં વધારો કર્યો હતો. MCX પર સોનાના ભાવમાં 5%થી વધુનો કડાકો બોલાતા તે પ્રતિ 10 ગ્રામ ₹1,44,954 પર બંધ થયું હતું, જ્યારે ચાંદીના ભાવમાં પણ 7% જેટલો મોટો ઘટાડો નોંધાયો હતો. આ ઘટાડા પાછળ મુખ્યત્વે અમેરિકન ડૉલરનું મજબૂત થવું, આંતરરાષ્ટ્રીય બજારમાં ક્રૂડ ઓઇલની વધતી કિંમતો અને વધતી જતી મોંઘવારી જેવા પરિબળો જવાબદાર માનવામાં આવે છે.

આંતરરાષ્ટ્રીય બજારમાં ડૉલર વધતાં સોનું તૂટ્યું

સમગ્ર સપ્તાહની વાત કરીએ તો, સોનાના ભાવમાં અંદાજે ₹10,600 એટલે કે લગભગ 7% જેટલો ધરખમ ઘટાડો થઈ ચૂક્યો છે. નિષ્ણાતોના મતે, જ્યારે ડૉલર મજબૂત બને છે ત્યારે સોના જેવી કિંમતી ધાતુઓ પર દબાણ વધે છે, જેના કારણે રોકાણકારો સુરક્ષિત રોકાણથી દૂર થઈ રહ્યા હોય તેવું જણાય છે. આ સ્થિતિ આંતરરાષ્ટ્રીય બજારમાં ડૉલરના વધતાં વર્ચસ્વ અને વૈશ્વિક આર્થિક અનિશ્ચિતતાને આભારી છે.

આ પણ વાંચો: શેરબજારનું જોરદાર 'કમબૅક' : સેન્સેક્સમાં એકઝાટકે 900 પોઈન્ટનો ઉછાળો, નિફ્ટીમાં પણ તેજી

નિષ્ણાતો માને છે કે ટૂંકા ગાળા માટે બજારમાં ઉતાર-ચઢાવ ચાલુ રહી શકે છે, તેથી રોકાણકારોએ સાવધ રહેવાની જરૂર છે. જોકે, મધ્યમ અને લાંબા ગાળા માટે સોનાની સ્થિતિ હજુ પણ મજબૂત હોવાનું મનાય છે, કારણ કે વૈશ્વિક અનિશ્ચિતતા અને કેન્દ્રીય બૅંકો દ્વારા કરવામાં આવતી ખરીદી સોનાના ભાવને મજબૂત ટેકો આપી શકે છે.