વૈશ્વિક સોનામાં પ્રત્યાઘાતી ઘટાડો : મુંબઈ ચાંદી રૂપિયા 3000 તૂટી
મુંબઈ : ડોલર ઈન્ડેકસ વધીને ૧૦૦ના સ્તરને પાર કરી ત્રણ મહિનાની ઊંચી સપાટીએ પહોંચી જતા તેની અસરરૂપે કિંમતી ધાતુમાં ઘટાડો જોવા મળ્યો હતો. વૈશ્વિક સ્તરે સોનુ ૪૦૦૦ ડોલરની આસપાસ કન્સોલિડેટ થવા મથી રહ્યું છે. સોના પાછળ ચાંદીમાં પણ કરેકશન જોવા મળ્યું હતું. માલભરાવાની ચિંતાએ ક્રુડ ઓઈલ પણ ઘટાડા તરફી રહ્યું હતું. વિશ્વ બજારની પાછળ ઘરઆંગણે સોનામાં ધીમો ઘટાડો આવ્યો હતો પરંતુ મુંબઈ ચાંદી રૂપિયા ૩૦૦૦થી વધુ તૂટી ગઈ હતી.
ઘરઆંગણે મુંબઈ ઝવેરીબજારમાં ૯૯.૯૦ સોનાના દસ ગ્રામના જીએસટી વગરના ભાવ સાધારણ ઘટી રૂપિયા ૧,૨૦,૪૧૯ મુકાતા હતા. ૯૯.૫૦ સોનાના દસ ગ્રામના જીએસટી વગરના ભાવ રૂપિયા ૧,૧૯,૯૩૭કવોટ થતા હતા. જીએસટી સાથે ભાવ ત્રણ ટકા ઊંચા મુકાતા હતા. ચાંદી .૯૯૯ એક કિલોના જીએસટી વગરના ભાવ સોમવારની સરખામણીએ રૂપિયા ૩૧૫૦ તૂટી રૂપિયા ૧,૪૬,૧૫૦ કવોટ થતા હતા. જીએસટી સાથે ભાવ ત્રણ ટકા ઊંચા મુકાતા હતા.
અમદાવાદ બજારમાં ૯૯.૯૦ સોનુ પ્રતિ દસ ગ્રામ દીઠ રૂપિયા ૧,૨૪,૩૦૦ જ્યારે ૯૯.૫૦ સોનાના દસ ગ્રામ દીઠ ભાવ રૂપિયા ૧,૨૪,૦૦૦ મુકાતા હતા. ચાંદી .૯૯૯ એક કિલોના રૂપિયા ૧,૪૯,૦૦૦ કવોટ થતા હતા.
ડોલર ઈન્ડેકસ વધીને ૧૦૦ના સ્તરને પાર કરી જતા ફન્ડ હાઉસો સોનામાંથી હળવા થઈ ડોલર તરફ વળી રહ્યાની બજારમાં ચર્ચા હતી. ફન્ડ હાઉસોની વેચવાલીથી સોનુ પ્રતિ ઔંસ નીચામાં ૩૯૬૬ ડોલર અને ઉપરમાં ૪૦૦૬ ડોલર થઈ ંમોડી સાંજે ૩૯૮૫ ડોલર બોલાતુ હતું. ચાંદી ઔંસ દીઠ ૪૭.૬૮ ડોલર બોલાતી હતી. અન્ય કિંમતી ધાતુ પ્લેટિનમ પ્રતિ ઔંસ ૧૫૫૪ ડોલર જ્યારે પેલેડિયમ ૧૪૦૬ ડોલર મુકાતુ હતું.
ઓર્ગેનાઈઝેશન ઓફ ધ પેટ્રોલિયમ એકસપોર્ટિંગ કન્ટ્રીઝ (ઓપેક) દ્વારા ડિસેમ્બરમાં પણ ઉત્પાદન વધારવાના નિર્ણયથી ક્રુડ તેલના ભાવ ઘટાડા તરફી રહ્યા છે. નાયમેકસ ડબ્લ્યુટીઆઈ ક્રુડ તેલ પ્રતિ બેરલ ૬૦.૧૬ ડોલર જ્યારે આઈસીઈ બ્રેન્ટ ક્રુડ ઓઈલ પ્રતિ બેરલ ૬૪.૦૪ડોલર બોલાતું હતું.
દરમ્યાન આજે કીમતી ધાતુઓમાં સોના-ચાંદીના વાયદાઓમાં રૂ.૨૧૨૪૬.૦૭ કરોડનાં કામકાજ થયાં હતાં. આજે બંને કિંમતી ધાતુના વાયદા નરમ રહ્યા હતા.
