મુંબઈ : મુંબઈ ઝવેરી બજારમાં આજે સોનાના ભાવ વધતા અટકી ધીમા ઘટાડા પર રહ્યા હતા જ્યારે ચાંદી વધુ ઉંચકાઈ હતી. વિશ્વ બજારમાં ઈરાન તથા અમેરિકા વચ્ચે હવે શાંતિ સ્થપાય છે કે ઘર્ષણ વધે છે તેના પર નજર વચ્ચે વૈશ્વિક ક્રૂડતેલના ભાવ ફરી વધી બેરલના ઉંચામાં ૧૦૩ ડોલર નજીક પહોંચ્યાના નિર્દેશો મળ્યા હતા.
દરમિયાન, વૈશ્વિક સોનાના ભાવ ઔંસના ૪૭૪૫થી ઘટી નીચામાં ભાવ ૪૬૭૯ થઈ ૪૭૩૦થી ૪૭૩૧ ડોલર રહ્યાના નિર્દેશો હતા. મુંબઈ બુલિયન બજારમાં આજે સોનાના ભાવ ધીમા ઘટાડા વચ્ચે જીએસટી વગર ભાવુ ૧૦ ગ્રામના ૯૯૫ના રૂ.૧૫૦૪૭૩ તથા ૯૯૯ના રૂ.૧૫૧૦૭૮ રહ્યા હતા જ્યારે મુંબઈ ચાંદીના ભાવ જીએસટી વગર કિલોના રૂ.૮૦૦ વધી રૂ.૨૫૫૬૦૦ રહ્યા હતા.
વિશ્વ બજારમાં ચાંદીના ભાવ ઔંસના ૮૧.૩૯થી વધી ૮૧.૪૭ થઈ ૮૧.૪૨થી ૮૧.૪૩ ડોલર રહ્યા હતા. વિશ્વ બજારની વધઘટ ઉપરાંત મુંબઈ કરન્સી બજારમાં આજે રૂપિયા સામે ડોલરના ભાવ ઘટતા અટકી ફરી ઉંચકાતાં દેશના ઝવેરી બજારો પર તેની મિશ્ર અસર દેખાઈ હતી.
અમેરિકામાં એપ્રિલના જોબગ્રોથના આંકડા અપેક્ષાથી સારા આવ્યા હતા. ત્યાં આવો જોબગ્રોથ ૧ લાખ ૧૫ હજાર નોંધાયાના વાવડ હતા. જો કે ત્યાં તાજેતરમાં બેરોજગારીના દાવા જોબલેસ કલેઈમ્સ ૧૦ હજાર વધી ૨ લાખ આવ્યાના સમાચાર પણ મળ્યા હતા. દરમિયાન, અમદાવાદ ઝવેરી બજારમાં આજે ચાંદીના ભાવ વધુ રૂ.૨૦૦૦ વધી રૂ.૨૫૨૦૦૦ રહ્યા હતા. જ્યારે અમદાવાદ સોનાના ભાવ રૂ.૫૦૦ વધી ૯૯૫ના રૂ.૧૫૫૭૦૦ તથા ૯૯૯ના રૂ.૧૫૬૦૦૦ રહ્યા હતા.
દરમિયાન, વિશ્વ બજારમાં ક્રૂડતેલ બજારમાં આજે બ્રેન્ટ ક્રૂડના ભાવ બેરલના ૯૮.૧૫ વાળા વધી ૧૦૨.૯૨ થઈ ૧૦૦.૩૦ ડોલર રહ્યા હતા. યુએસ ક્રૂડના ભાવ ૯૧.૯૮ વાળા વધી ૯૮.૬૪ થઈ ૯૪.૯૯ ડોલર રહ્યા હતા. વૈશ્વિક પ્લેટીનમના ભાવ ઔંસના ૨૧૦૨ વાળા ઘટી ૨૦૧૮ થઈ ૨૦૫૨થી ૨૦૫૩ ડોલર રહ્યા હતા.
મુંબઈ બુલિયન બજારમાં આજે પ્લેટીનમના ભાવ ૧૦ ગ્રામના રૂ.૮૦૦ ઘટી રૂ.૬૫૯૫૭ રહ્યા હતા. વિશ્વ બજારમાં પેલેડીયમના ભાવ ઔંસના ૧૫૪૫ વાળા ઘટી ૧૪૭૫ થઈ ૧૪૯૫થી ૧૪૯૬ ડોલર રહ્યા હતા. વૈશ્વિક કોપરના ભાવ આજે ૨.૦૮ ટકા પ્લસમાં રહ્યા હતા.
