વડોદરામાં ધોળે દિવસે ચોરીનો સિલસિલો, સમાના મકાનમાંથી રોકડ અને દાગીનાની ચોરી

Vadodara Theft Case : વડોદરા શહેરમાં છેલ્લા કેટલાક સમયથી હવે દિવસ દરમિયાન ચોરીના બનાવો બનવા માંડ્યા છે. કારેલીબાગ હરણી વિસ્તારમાં ધોળે દિવસે ચોરીના બનેલા બનાવ બાદ સમા વિસ્તારમાં ચોરીનો બનાવ બન્યો છે.
સમાના ખોડીયાર નગર પાસે રાધિકા પાર્ક સોસાયટીમાં રહેતા મિતેશભાઇ પરમારએ પોલીસને કહ્યું છે કે ગઈ તા 23મી સવારે મારી પત્ની અને મારો ભાઈ કામ અર્થે દિવાળીપુરા ગયા હતા અને હું પણ 10 વાગે કામ પર ગયો હતો. મારુ ટિફિન ઘરે રહી ગયું હોવાથી હું બપોરે 2 વાગે જમવા ગયો ત્યારે ઘરનું તાળું તૂટેલું હતું.
તપાસ કરતા ચોરો ચાંદીના જુદા જુદા દાગીના તેમજ રોકડાનું 20000 મળી પોણા બે લાખની મતા ચોરી ગયા હોવાનું જણાઈ આવ્યું હતું. જેથી સમાપોલીસે ગુનો નોંધી તપાસ હાથ ધરી છે.