મેક્સિકો હદે જાપ્તો વધતા અમેરિકામાં ગેરકાયદે ઘુસવા માટે કેનેડાની સરહદ હવે ભારતીયો માટે હોટ ફેવરિટ

• અલ્પવિરામ
• બુચા વિચીઝ એટલે કે રશિયન ડ્રોનથી પોતાના આકાશનું રક્ષણ કરતી સ્વયંપ્રેરિત યુક્રેનની જાબાંઝ મહિલાઓની નવી દુનિયામાં એક ડોકિયું

એક તરફ ભારત અને કેનેડાના સંબંધો તંગ થઈ રહ્યા છે ત્યારે યુએસ કસ્ટમ્સ અને બોર્ડર પ્રોટેક્શનના તાજેતરના ડેટાએ એક આશ્ચર્યજનક ટ્રેન્ડ જાહેર કર્યો છે : વધુ ભારતીયો હવે ગેરકાયદે રીતે અમેરિકામાં પ્રવેશવા માટે પરંપરાગત યુએસ-મેક્સિકો માર્ગને બદલે યુએસ-કેનેડા સરહદ પસંદ કરી રહ્યા છે. એકલા જૂન મહિનામાં, રેકોર્ડ ૫,૧૫૨ ભારતીયોએ કેનેડાની સરહદ પાર કરવાનો પ્રયાસ કર્યો હતો, જે સ્થળાંતર પેટર્નમાં નોંધપાત્ર ફેરફાર દર્શાવે છે. કેનેડિયન વિઝા મેળવવાની સરળતા અને પ્રમાણમાં અપ્રતિબંધિત સરહદો આ પરિવર્તનને આગળ વધારતા મુખ્ય પરિબળો છે. અમેરિકા અને બ્રિટન જેવા દેશોમાં પ્રવેશ મેળવવા માટે બિનપરંપરાગત માર્ગોનો ઉપયોગ કરવાની ઘટના છાશવારે થતી રહે છે જેને ડોન્કી કે ડંકી પણ કહેવાય છે. તે વિશે રાજકુમાર હિરાનીએ ઈ. સ. ૨૦૨૩ માં આ વિષય ઉપર એક નબળી ફિલ્મ પણ બનાવી નાખી હતી. હવે તો વધુ ભારતીયો કડક દેખરેખ હેઠળની મેક્સિકો સરહદને છોડીને કેનેડા-યુએસ બોર્ડર પર જવાનું પસંદ કરી રહ્યા છે.
યુએસ-કેનેડા સરહદ, જે ૯,૦૦૦ કિલોમીટર સુધી વિસ્તરે છે, તે વિશ્વની સૌથી લાંબી ખુલ્લી સરહદ છે અને યુએસ-મેક્સિકો સરહદ કરતા બમણી લંબાઈ ધરાવે છે. આ વિશાળ અને વારંવાર અસુરક્ષિત સરહદ સ્થળાંતર કરનારા ગેરકાનૂની રસ્તો પસંદ કરનારા ભારતીયો માટે મુખ્ય પ્રવેશદ્વાર બની ગઈ છે. જાન્યુઆરી અને જૂન ૨૦૨૪ વચ્ચે સરહદ પાર કરવાનો પ્રયાસ કરતા પકડાયેલા ભારતીયોની સંખ્યામાં ગયા વર્ષના આ જ સમયગાળાની સરખામણીમાં ૪૭%નો વધારો થયો છે. આ કઈ અલગ ટ્રેન્ડ નથી. નાણાકીય વર્ષ ૨૦૨૩માં, આશરે ૯૭,૦૦૦ બિનદસ્તાવેજીકૃત ભારતીય સ્થળાંતરનો સમગ્ર યુ.એસ.માં સામનો કરવામાં આવ્યો હતો, જેમાંથી ૩૦,૦૦૦ થી વધુ એકલા કેનેડાની સરહદ પર હતા. ઑક્ટોબર ૨૦૨૪ અને ફેબુ્રઆરી ૨૦૨૫ વચ્ચે લગભગ ૧૪,૦૦૦ ભારતીયો સરહદ પર રોકાયા. ૨૦૨૬ની શરૂઆતથી જ ઘુસણખોરોના આંકડાઓ વધતા જાય છે.
અનધિકૃત ભારતીય સ્થળાંતરમાં વધારાએ ભારતીયોને યુ.એસ.માં બિનદસ્તાવેજીકૃત ઇમિગ્રન્ટ્સનું ત્રીજું સૌથી મોટું જૂથ બનાવ્યું છે. પ્યુ રિસર્ચ અનુસાર, ૨૦૨૫ સુધીમાં, તે દેશમાં અંદાજે ૭,૨૫,૦૦૦ બિનદસ્તાવેજીકૃત ભારતીયો હતા. તો, યુ.એસ.માં ગેરકાયદે પ્રવેશ મેળવવા માંગતા ભારતીયો માટે કેનેડાને શું કામ પસંદ કરે છે? કેનેડા રેગ્યુલેટરી કાઉન્સિલ સાથે નોંધાયેલા ઈમિગ્રેશન કન્સલ્ટન્ટના જણાવ્યા અનુસાર, કેનેડા સરળ વિઝા એક્સેસ અને સોફ્ટ બોર્ડરનું એક આદર્શ સંયોજન પ્રદાન કરે છે, જે તેને પશ્ચિમ એશિયા, આફ્રિકા અથવા કેરેબિયન જેવા પ્રદેશોમાંથી પસાર થતા જોખમી ડોન્કી માર્ગો કરતાં વધુ સારો વિકલ્પ બનાવે છે. જો કે આ માર્ગ જોખમોથી મુક્ત નથી. ફેબુ્રઆરી ૨૦૨૨ માં, એક દુ:ખદ ઘટના બની જ્યારે બે નાના બાળકો સહિત ચાર જણનો ભારતીય પરિવાર યુએસ-કેનેડા સરહદ નજીક મૃત હાલતમાં મળી આવ્યા. તે આવી જ ગેરકાયદે સફર પર નીકળ્યો હતો, પરંતુ હિમવર્ષા દરમિયાન તેના જૂથથી અલગ થઈ ગયો હતો અને આખરે સરહદથી માત્ર ૧૩ યાર્ડના અંતરે તે સહુનું મૃત્યુ થયું હતું. અમેરિકા જવાની ભારતીયોની ભૂખની એ પરાકાષ્ઠા હતી અને એ દ્રશ્યો આખા જગતે જોયા હતા.
કેનેડામાં ભારતીય વિઝા અરજીઓમાં ખાસ કરીને વિદ્યાર્થીઓમાં સતત વધારો જોવા મળ્યો છે. ઈ. સ. ૨૦૨૩ માં, કેનેડામાં આશરે ૩,૧૯,૦૦૦ ભારતીય વિદ્યાર્થીઓ હતા. જો કે, વડા પ્રધાન જસ્ટિન ટ્રુડોની આગેવાની હેઠળની કેનેડિયન સરકારે તાજેતરમાં મંજૂર કરાયેલ અભ્યાસ પરમિટની સંખ્યા મર્યાદિત કરી છે અને કામચલાઉ વિદેશી કામદાર વિઝા પ્રોગ્રામમાં ઘટાડો કર્યો છે. કોણ છે આ ભારતીયો જે ગેરકાયદેસર અમેરિકામાં પ્રવેશવાનો પ્રયાસ કરી રહ્યા છે? નિષ્ણાતો કહે છે કે ગુજરાત અને પંજાબ રાજ્યોમાંથી ઘણા લોકો આવે છે. યુએસ તપાસકર્તાઓએ તાજેતરમાં કેનેડાની સરહદેથી ગુજરાતી અમેરિકનોની માલિકીના વ્યવસાયોમાં શિકાગો વિસ્તારમાં આવા આગંતુકોનું સ્થળાંતર કરનારાઓનું પરિવહન કરતા દાણચોરીના નેટવર્કનો પર્દાફાશ કર્યો હતો.
(૨)
રશિયાના આક્રમણના જવાબમાં બુચા વિચીઝનું જૂથ બન્યું છે. વિચ એટલે ડાકણ. યુક્રેનની બહાદુર મહિલાઓનું એક જૂથ રશિયન ડ્રોનથી તેમના આકાશને બચાવવા માટે એકત્રિત થઇ છે. બુચા વિચીઝ તરીકે ઓળખાતી આ મહિલાઓ ૧૯ થી ૬૪ વર્ષની વયની છે, તેઓએ સ્વેચ્છાએ તેમના વતનનું રક્ષણ કરવા માટે શસ્ત્રો ઉપાડયા છે. તેઓ જૂના જમાનાની મેક્સિમ મશિનગન અને અદ્યતન યુક્તિઓનો ઉપયોગ કરીને તેમના શહેરને જોખમમાં મૂકતા દરેક ડ્રોનને આબાદ રીતે શૂટ કરે છે.
બુચા કિવનું ઉપનગર છે જે અગાઉ ઈ. સ. ૨૦૨૨ માં રશિયન યુદ્ધ અપરાધોનું પ્રતીક એટલા માટે બની ગયું હતું કે રશિયન દળોએ તે શહેર પર કબજો કરીને ખૂબ જુલ્મો ગુજાર્યો હતા. તે સમય દરમિયાન, ૪૫૦ થી વધુ યુક્રેનનિયન નાગરિકો માર્યા ગયા હતા અને અન્ય ઘણાને ત્રાસ આપવામાં આવ્યો હતો. આ વિનાશ વચ્ચે, ડઝનેક સ્ત્રીઓએ આગળ વધીને 'બુચા વિચીઝ' તરીકે ઓળખાતા ઓન્લી વીમેન હવાઈ સંરક્ષણ યુનિટની રચના કરી. આ મહિલાઓ યુક્રેનિયન ઇન્ફ્રાસ્ટ્રક્ચરને લક્ષ્ય બનાવતા ઇરાની બનાવટના રશિયન ડ્રોનને તોડી પાડવાનું કામ કરે છે.
બુચા વિચીઝ તેમના મિશનની તૈયારી માટે સઘન તાલીમ લે છે. તેમના પ્રશિક્ષણ ગ્રાઉન્ડને મોર્ડોર કહેવામાં આવે છે. પુરુષ પ્રશિક્ષકો તેમને તેમની શારીરિક મર્યાદાને કઈ રીતે અતિક્રમી જવું તે શીખવાડે છે. કઠોર તાલીમ હોવા છતાં સ્ત્રીઓ પોતાના દેશ માટે મહેનત કરે છે. તેમના કમાન્ડર કર્નલ એન્ડ્રે વરલાટી કહે છે કે મહિલાઓ તેમની ફરજોમાં પુરુષો જેટલી જ સક્ષમ છે. તેઓ ૧૫૦ કિલોમીટર પ્રતિ કલાકની ઝડપે ઉડતા ડ્રોનને મારવા માટે વર્ષો જૂની મશીનગનનો પણ ઉપયોગ સફળતાપૂર્વક કરી જાણે છે.
રશિયાના આક્રમણ બાદ યુક્રેનમાં વધુને વધુ મહિલાઓ સૈન્યમાં જોડાઈ છે. હાલમાં લગભગ ૬૫,૦૦૦ મહિલાઓ સેવા આપી રહી છે, જેમાંથી ૪,૦૦૦ લડાયક ભૂમિકામાં છે. બૂચા વિચીઝ માટે યુદ્ધમાં ભાગ લેવો એ માત્ર સંરક્ષણનું જ કામ નથી પણ યુદ્ધના આઘાતમાંથી બહાર આવવાનો માર્ગ પણ છે. વેલેન્ટિના, જેનો પરિવાર રશિયન કબજા દરમિયાન મૃત્યુથી બચી ગયો હતો, તે ક્ષણને યાદ કરે છે જ્યારે સૈનિકોએ તેમના પુત્રના લમણે બંદૂકો રાખી હતી. તે ભયાનક અનુભવે તેને યુનિટમાં જોડાવાની પ્રેરણા આપી.
જૂથની મહિલાઓ એકતાની મજબૂત ભાવના અનુભવે છે અને તેમના સમુદાયની સુરક્ષા માટે સાથે મળીને કામ કરે છે. તેમના કમાન્ડર તેમની પ્રતિબદ્ધતા માટે તેમની પ્રશંસા કરે છે અને ચેતવણી આપે છે કે જો રશિયન દળો પાછા ફરશે, તો તેઓને આ મહિલાઓ તરફથી તીવ્ર પ્રતિકારનો સામનો કરવો પડશે. બુચા વિચિઝ રશિયન ડ્રોનથી આકાશને બચાવવાનું તેમનું મિશન ચાલુ રાખે છે. કેટલીક સ્ત્રીઓએ યુક્રેનિયન સશસ્ત્ર દળો સાથે સૈન્યમાં વધુ નેતૃત્વની ભૂમિકાઓ લેવા માટે કરાર પર હસ્તાક્ષર કર્યા છે.