અમદાવાદમાં UPSC દ્વારા IMD સાયન્ટિસ્ટ Bની પરીક્ષા યોજાઈ, બે શિફ્ટમાં ઉમેદવારોએ પરીક્ષા આપી

IMD Scientist B Recruitment: કેન્દ્ર સરકારના પૃથ્વી વિજ્ઞાન મંત્રાલય હેઠળ કાર્યરત ભારત હવામાન વિભાગમાં સાયન્ટિસ્ટ-Bની ભરતી પ્રક્રિયાના ભાગરૂપે સંઘ લોક સેવા આયોગ દ્વારા કમ્બાઇન્ડ રિક્રૂટમેન્ટ ટેસ્ટનું આયોજન કરવામાં આવ્યું હતું. આ ભરતી અભિયાન અંતર્ગત એટમોસ્ફેરિક સાયન્સિસ વિભાગમાં 7, જનરલ મેટિરિયોલોજીમાં 30 તેમજ ઇન્સ્ટ્રુમેન્ટેશન શાખામાં 9 મળીને કુલ 46 ખાલી પદો ભરવામાં આવનાર છે.

અમદાવાદ સ્થિત વિવિધ કેન્દ્રો પર લેવાયેલી આ લેખિત કસોટી પૂર્ણપણે ઓફલાઇન મોડમાં યોજાઈ હતી. ભરતી પ્રક્રિયામાં પારદર્શિતા જળવાઈ રહે તે હેતુથી સવારે 9થી 11 અને બપોરે 2થી 4 એમ બે અલગ અલગ સત્રોમાં પરીક્ષા સંપન્ન થઈ હતી, જેમાં સફળ થનારા ઉમેદવારોને હવે પછીના તબક્કે સાક્ષાત્કાર માટે બોલાવવામાં આવશે.

કડક સુરક્ષા અને બે સત્રોમાં પ્રશ્નપત્રો

પરીક્ષા કેન્દ્રો ખાતે ગેરરીતિ અટકાવવા વહીવટી તંત્ર દ્વારા બંદોબસ્ત ગોઠવવામાં આવ્યો હતો. કેન્દ્રમાં પ્રવેશતા પૂર્વે તમામ ઉમેદવારોના ઈ-એડમિટ કાર્ડ તેમજ ઓળખ પુરાવાઓની ચકાસણી કરવામાં આવી હતી. સુરક્ષા કર્મચારીઓ દ્વારા તપાસ પૂર્ણ થયા બાદ જ વિદ્યાર્થીઓને પ્રવેશ આપવામાં આવ્યો હતો અને પૂર્વ નિર્ધારિત બેઠક વ્યવસ્થા અનુસાર વર્ગખંડમાં સ્થાન ફાળવવામાં આવ્યું હતું. પ્રથમ સત્રમાં ગણિત, નીતિશાસ્ત્ર અને પ્રોજેક્ટ મેનેજમેન્ટ જેવા સામાન્ય વિષયો આધારિત પ્રશ્નપત્ર પૂછવામાં આવ્યું હતું, જ્યારે બીજા સત્રમાં સંબંધિત વિષયનું પ્રશ્નપત્ર લેવાયું હતું.

ઉમેદવારોએ વ્યક્ત કર્યા પોતાના અનુભવો

પરીક્ષા આપી બહાર આવેલા ઉમેદવારોએ પ્રશ્નપત્રો અને તૈયારી અંગે પોતાના અનુભવો વ્યક્ત કર્યા હતા. પરીક્ષાર્થી તપન પટેલના જણાવ્યા અનુસાર છેલ્લા 3થી 4 મહિનાથી ચાલી રહેલી ગંભીર તૈયારીઓને પગલે જનરલ સબ્જેક્ટ્સનું પેપર ધાર્યા મુજબનું રહ્યું હતું. જ્યારે હવામાન વિભાગમાં જ ફરજ બજાવતા અને ઉચ્ચ હોદ્દા માટે પ્રયાસ કરી રહેલા હાર્દિક પ્રજાપતિએ જણાવ્યું કે, નોકરી અને પારિવારિક જવાબદારીઓ વચ્ચે અભ્યાસ માટે સમય ફાળવવો અત્યંત પડકારજનક સાબિત થયો હતો, છતાં પ્રથમ પેપર સારું રહેતાં હવે અંતિમ મેરિટ યાદીમાં સ્થાન મેળવવા અંગે સકારાત્મક આશા છે.