નાસાના વોયેજર-1 અવકાશયાને પૃથ્વીથી 15 અબજ માઇલના દૂરના અંતરેથી સંદેશો મોકલ્યો
ઘણા મહિના બાદ અવકાશયાન ફરીથી સંપર્કમાં આવ્યું
1977માં રવાના થયેલાં વોયેજર-1 અને વોયેજર-2 બંને અવકાશયાન હાલ સૂર્યમંડળની સરહદ બહાર નીકળી ગયાં છે : હજી સંપૂર્ણ કાર્યરત છે
Updated: Apr 24th, 2024
વોશિંગ્ટન/મુંબઇ : હાઇ ઇટ્સ મી. અરે સાંભળો, હું છું. અમેરિકાની અંતરિક્ષ સંશોધન સંસ્થા નેશનલ એરોનોટિક્સ એન્ડ સ્પેસ એડિમિનિસ્ટ્રેશન (નાસા)ના વોયેજર-૧ નામના અવકાશયાને પૃથ્વીથી ૧૫ અબજ માઇલના અંતરેથી આવો ફોન મેસેજ મોકલ્યો છે.
નાસાને વોયેજર-૧ અવકાશ યાનનો સંદેશો ૨૦૨૪ની ૨૨, એપ્રિલે મળ્યો છે.
નાસાનાં સૂત્રોએ સોમવારે એવી માહિતી આપી હતી કે વોયેજર --૧ અવકાશયાને ૨૦૨૩ની ૧૪, નવેમ્બરે તેના સંદેશા મોકલવાની કામગીરી બંધ કરી દીધી હતી.
જોકે વોયેજર પૃથ્વી પરથી મોકલાતા સંદેશા જરૂર સ્વીકારતું હતું. હવે જોકે ઘણા મહિના બાદ વોયેજર -૧ અવકાશયાને ફરીથી પૃથ્વી પર સંદેશા મોકલવાનું શરૂ કરી દીધું છે.
હાલના તબક્કે વોયેજર -૧ અવકાશયાન આપણા સૂર્યમંડળની સરહદ બહાર નીકળી ગયું છે. પૃથ્વીથી અંતરિક્ષમાં હજી સુધી આટલા દૂરના અંતરે માનવીએ બનાવેલું કોઇ યંત્ર કે સાધન કે અવકાશયાન પહોચ્યું નથી.
નાસાનું વોયેજર -૧ અવકાશયાન ૧૯૭૭ની ૫, સપ્ટેમ્બરે સૂર્યમંડળનો અભ્યાસ કરવા માટે પૃથ્વી પરથી રવાના થયું છે. જોકે વોયેજર-૨ અવકાશયાન ૧૯૭૭ની ૨૦,ઓગસ્ટે એટલે કે વોયેજર-૧ પહેલાં રવાના થયું છે.
૨૦૨૪ના માર્ચમાં નાસાની જેટ પ્રપલ્ઝન લેબોરેટરીના વિજ્ઞાાનીઓની ટીમે એવી સ્પષ્ટતા કરી હતી કે અમારા વોયેજર-૧ અવકાશયાનમાંની નાનકડા કદની કમ્પ્યુટર ચીપમાં કોઇ ખામી સર્જાઇ હોવાથી અવકાશયાનના સંદેશા પૃથ્વી પર મોકલવાની પ્રક્રિયા અટકી ગઇ છે.
જોકે બહુ થોડા દિવસમાં જ વોયેજર-૧ અવકાશયાનમાં ૪૬ વર્ષથી સતત કાર્યરત કમ્પ્યુટરમાંની ટેકનિકલ યંત્રણા ફરીથી શરૂ થઇ ગઇ છે. હવ વોયેજર-૧ અવકાશયાન કદાચ આવતા સપ્તાહથી તેની નવા સંશોધનાત્મક કામગીરીની વિગતો મોકલવાનું શરૂ કરે તેવી શક્યતા છે.
નાસાનું વોયેજર-૧ અવકાશયાન ૨૦૧૨માં આપણા સૂર્યમંડળની સરહદ બહાર નીકળી જનારું પ્રથમ માનવકૃત અવકાશયાન છે. એટલે કે હાલ વોયેજર -૧ પૃથ્વીથી ૧૫ અબજ માઇલના અતિ અતિ દૂરના અંતરે છે.પૃથ્વીથી મોકલાયેલો સંદેશો વોયેજર-૧ અવકાશયાનને ૨૨.૫ કલાકે મળે છે.
ઉપરાંત, નાસાનું વોયેજર-૨ અવકાશયાન પણ ૨૦૧૮માં આપણા સૌરમંડળ બહાર નીકળી ગયું છે.
બંને અવકાશયાનમાં સોનાનો ઢોળ ચડાવેલી તાંબાની ૧૨ ઇંચની નાનકડી થાળી ગોઠવવામાં આવી છે. ગોલ્ડન રેકોર્ડ્ઝ નામની આ ડિસ્કમાં સૂર્યમંડળની સરહદ બહારના અંતરિક્ષ વિશેની અજીબોગરીબ માહિતી એમ કહો કે મજેદાર વાતો છે.
આ ડિસ્કમાં સૂર્ય મંડળનો નકશો,યુરેનિયમ દ્વારા ચાલતી ઘડિયાળ સહિત રેકોર્ડ કઇ રીતે વગાડવી તેની સૂચના છે.
આ રેકોર્ડમાંની વિગતો અમેરિકાનામહાન ખગોળશાસ્ત્રી કાર્લ સેગનના નેતૃત્વની સમિતિએ પસંદ કરી છે.આ રેકોર્ડમાં પૃથ્વી પરની જીવ સૃષ્ટિની વિવિધ પ્રકારની ઇમેજીસ (છબી), સંગીત,અવાજ વગેરે છે.