એક હતો છોટુ .

- એક દિવસ સ્કૂલમાં વિજ્ઞાાનના શિક્ષકે મેદસ્વિતા વિશે પાઠ ભણાવ્યો. શરીરનું વજન વધી જાય તો શું થાય? શરીરમાં ચરબી વધી જાય તો શું થાય?

- રામુ પટેલ ડરણકર

રાધાનગરીમાં છોટુ રહે.

એનું પેટ હતું ગોળમટોળ.

એને વારે વારે ખાવાનું મન થાય. મીઠાઈ તો એને બહુ જ ભાવે. ગુલાબજાંબુ જોતાં જ એના મોંમા પાણી આવી જાય. બે-પાંચ ગુલાબજાંબુ તો એ ફટાફટ ઝાપટી જાય.

છોટુની મમ્મી છોટુને કાયમ વઢે, 'છોટુ! બહુ ગળપણ નહીં સારું. પપ્પાને કહી દઈશ, હોં!'

છોટુ કહે, 'પપ્પાને ગુલાબજાંબુ ખાતા જોઈને તો હું શીખેલો છું!'

છોટુને મન ગળ્યું તે ગળ્યું ને બીજું બધું બળ્યું!

મમ્મી ગમે તેટલું સમજાવે પણ છોટુ માને શાનો? એનું પેટ તો એટલું મોટું થઈ ગયું કે સ્કૂલમાં એને સૌ ગોલગપ્પા કહેતા. છોટુ હેં..... હેં.... કરતો હસી પડતો ને 

નાસ્તાનો ડબ્બો ખાલી કરી દેતો.

એક દિવસ એવું થયું કેમમ્મી બહાર ગયાં હતાં. ઘરમાં કોઈ જ હતું નહીં. એક ડબ્બામાં એણે પતાસાં જોયાં. પતાસાં જોતાં જ એ કવિતા ગાવા લાગ્યો-

'એક હતું પતાસું

એને આવ્યું બગાસું

ધોળું ધોળું ધફ હતું

ને ગળ્યું હતું ખાસ્સું...'

છોટુને પતાસું પણ બહુ ભાવે. પતાસાને એ મોઢામાં મૂકી દે. પછી ધીમે ધીમે એને ઓગળવા દે. છોટુ એની એવી તો લિજ્જત માણે કે જોનારા જોતાં જ રહી જાય.

છોટુને વારે વારે ખાવાની ટેવ. એમાં એને ગળ્યું તો બહુ ભાવે. એટલે એનું શરીર જાડું થઈ ગયું. સૌ દોસ્તો એને જાડુ.... જાડુ કહીને ખીજવે. પણ ખીજાય તો છોટુ 

શાનો? કહે છેને કે જેનું પેટ મોટું એનું મન પણ મોટું. 

એક દિવસ સ્કૂલમાં વિજ્ઞાાનના શિક્ષકે મેદસ્વિતા વિશે પાઠ ભણાવ્યો. શરીરનું વજન વધી જાય તો શું થાય? શરીરમાં ચરબી વધી જાય તો શું થાય?

બધું જ સમજાવ્યા પછી ટીચરે કહ્યું કે, 'મેદસ્વિતા એ બધા જ રોગોનું દ્વાર છે.'

ટીચરે ક્લાસમાં છોટુને ઊભો કર્યો. બીજા બે ચરબીદાર વિદ્યાર્થીઓને પણ ઊભા કર્યા.

ક્લાસનાં સૌ બાળકો આ ત્રણેયને જોઈને હસી પડયાં.

ટીચરે તરત જ સૌને શાંત પાડીને કહ્યું, 'આ રીતે હસવું તે અવિવેક છે. તમે પણ જો ગળપણ વધારે ખાશો અને ખાવામાં સંયમ નહીં રાખો તો તમારું પેટ પણ 

મોટું થઈ જશે.

કેમ ખરું ને છોટું?' 

છોટુ કહે, 'હા, ટીચર. હું નિર્ણય લઉં છું અને તમને પ્રોમીસ આપું છુેં કે હવેથી હું ખાવાપીવામાં પૂરું ધ્યાન આપીશ.મમ્મીની બધી વાત  માનીશ.'

ટીચર કહે, 'વેરી ગુડ.'

સ્કૂલ પૂરી થઈ ને છોટુ પોતે કરેલ નવા નિર્ણયને યાદ કરતો કરતો ઘર તરફ વળ્યો.