ચાલુ બાઇકે મોબાઇલ ફાટ્યો ને યુવકનું મોત: સ્માર્ટફોન વાપરનારાઓ માટે આ 5 સેફ્ટી ટિપ્સ જાણવી જરૂરી

Smartphone Blast Kills Man In UP: આજના ડિજિટલ યુગમાં સ્માર્ટફોન દરેક વ્યક્તિની જીવનશૈલીનું અભિન્ન અંગ બની ગયો છે, પરંતુ સાવચેતીના અભાવે આ જ ફોન જીવલેણ પણ સાબિત થઈ શકે છે. ઉત્તર પ્રદેશના મુઝફ્ફરનગરમાં એક હૃદયદ્રાવક ઘટના સામે આવી છે, જ્યાં 40 વર્ષીય વિકાસ અંતલ નામના વ્યક્તિ પોતાની બાઇક પર ઘરે પરત ફરી રહ્યા હતા ત્યારે તેમના ખિસ્સામાં રહેલા સ્માર્ટફોનની બેટરી અચાનક બ્લાસ્ટ થઈ ગઈ હતી. ધડાકાના કારણે બાઇકનું સંતુલન બગડતાં તેઓ રોડ પર પટકાયા હતા અને ગંભીર ઈજાઓને લીધે સારવાર દરમિયાન તેમનું મોત નીપજ્યું હતું.

બેટરી ફાટતાં પહેલાં મળતા 5 ખતરનાક સંકેતો

સ્માર્ટફોનનો ઉપયોગ કરતી વખતે જો નીચે મુજબના લક્ષણો જોવા મળે, તો તેને ક્યારેય હળવાશથી ન લેવા જોઈએ:

બેક પેનલ કે કવર ફૂલવું: જો સ્માર્ટફોનની પાછળની પેનલ અસામાન્ય રીતે ફૂલી ગયેલી દેખાય કે બોડી વચ્ચે ગેપ સર્જાય, તો સમજી લેવું કે બેટરી ખરાબ થઈ ચૂકી છે અને ગમે ત્યારે બ્લાસ્ટ થઈ શકે છે.

સ્ક્રીન બહારની તરફ આવવી: બેટરી ફૂલવાના કારણે ઘણી વખત ફોનની ડિસ્પ્લે આગળની તરફ ઊપસી આવે છે. આવી સ્થિતિમાં ફોન વાપરવાનું તાત્કાલિક બંધ કરીને સર્વિસ સેન્ટર પર બેટરી બદલાવવી જોઈએ.

વગર વપરાશે ફોન ગરમ થવો: જો કોઈ પણ એપ કે ગેમ વાપર્યા વગર સામાન્ય સ્થિતિમાં પણ સ્માર્ટફોન અચાનક વધુ પડતો ગરમ થઈ જતો હોય, તો બેટરીમાં ગંભીર આંતરિક શોર્ટ-સર્કિટ હોઈ શકે છે.

બળવાની કે અજીબ ગંધ આવવી: ફોનમાંથી અચાનક કેમિકલ કે વાયરો બળવાની ગંધ આવવા લાગે તો વિલંબ કર્યા વિના ફોનને શરીરથી દૂર કરી ટેકનિશિયનને બતાવવો જરૂરી છે.

ખોટા કે લોકલ ચાર્જરનો ઉપયોગ: સસ્તા કે અનધિકૃત હાઈ-વોલ્ટેજ ચાર્જરથી વારંવાર ચાર્જ કરવાથી બેટરી ઓવરહીટ થઈને બગડી જાય છે.

સુરક્ષા માટે કઈ સાવચેતી રાખવી જરૂરી?

સ્માર્ટફોનમાં લિથિયમ-આયન બેટરી વપરાય છે, જેમાં પ્રવાહી લિકેજ કે અતિશય દબાણ થતાં આગ લાગવાનું જોખમ રહે છે. તેથી હંમેશાં ઓરિજિનલ કે રજિસ્ટર્ડ કંપનીની બેટરી જ વાપરવી જોઈએ અને અનધિકૃત લોકલ પાર્ટ્સ લગાવવાનું ટાળવું જોઈએ. આ ઉપરાંત ડ્રાઇવિંગ કરતી વખતે કે લાંબી મુસાફરી દરમિયાન ફોનને જીન્સના ચુસ્ત ખિસ્સામાં રાખવાને બદલે બેગ કે સુરક્ષિત સ્થાને રાખવો હિતાવહ છે.