T20 World Cup 2026: ભારત VS ન્યૂઝીલેન્ડ ટી20 વર્લ્ડ કપ 2026ની ફાઈનલ આજે અમદાવાદના નરેન્દ્ર મોદી સ્ટેડિયમમાં રમાશે. ટીમ ઇન્ડિયા આ મેચ જીતીને ઈતિહાસ રચવાનો પ્રયાસ કરશે. આજ સુધી કોઈ પણ ટીમ સતત બે વાર T20 વર્લ્ડ કપ ટાઈટલ નથી જીતી અને બીજી તરફ કોઈ પણ ટીમે ઘરઆંગણે T20 વર્લ્ડ કપ નથી જીત્યો. જો ભારતે ન્યૂઝીલેન્ડને હરાવવું હોય તો જસપ્રીત બુમરાહ જેવા મેચ વિનિંગ ખેલાડીઓનું પ્રદર્શન મહત્વપૂર્ણ રહેશે. જોકે, જસપ્રીત બુમરાહને તેની મહેનતનું ઈનામ નહીં મળશે. જસપ્રીત બુમરાહે ઘણી વખત T20 વર્લ્ડ કપ 2026માં ભારતની જીતમાં મુખ્ય ભૂમિકા ભજવી છે, છતાં તે પ્લેયર ઓફ ધ ટુર્નામેન્ટ નહીં બની શકશે. તો ચાલો સમજીએ કે શા માટે?
યાદીમાં બુમરાહ નહીં પણ સંજુ સેમસનનું નામ સામેલ
વાસ્તવમાં ICCએ T20 વર્લ્ડ કપ 2026 પ્લેયર ઓફ ધ ટુર્નામેન્ટના દાવેદારોની યાદી પહેલાથી જ જાહેર કરી દીધી છે. આ યાદીમાં 8 ખેલાડીઓને સામેલ કરવામાં આવ્યા છે, જેમાં માત્ર એક જ ભારતીય ખેલાડી છે. આ ભારતીય ખેલાડી બીજું કોઈ નહીં પણ સંજુ સેમસન છે, જેણે વેસ્ટ ઈન્ડિઝ અને ઈંગ્લેન્ડ સામેની છેલ્લી બે મેચમાં તબાહી મચાવી હતી. જસપ્રીત બુમરાહનું નામ આ યાદીમાં નથી, તેથી ફાઇનલમાં તેના શાનદાર પ્રદર્શન છતાં, તે પ્લેયર ઓફ ધ ટુર્નામેન્ટ નહીં બની શકે. જોકે, તે ચોક્કસપણે પ્લેયર ઓફ ધ મેચ જીતી શકે છે.
T20 વર્લ્ડ કપ 2026માં બુમરાહનું પ્રદર્શન
જસપ્રીત બુમરાહે T20 વર્લ્ડ કપ 2026માં અત્યાર સુધીમાં સાત મેચ રમી છે, જેમાં 15.90ની એવરેજ અને 14.40ના સ્ટ્રાઈક રેટથી 10 વિકેટ ઝડપી છે. બુમરાહની વિકેટ કોલમ વધુ ઈમ્પ્રેસ ન કરતી હોય, પરંતુ આ ટુર્નામેન્ટમાં તેનો 6.62નો ઇકોનોમી રેટ દર્શાવે છે કે, તેણે વિરોધી બેટ્સમેન પર કેવી રીતે દબાણ બનાવી રાખ્યું છે. સેમિફાઈનલમાં ઇંગ્લેન્ડ સામે ડેથ ઓવરમાં તેનો છેલ્લો બોલ ચાહકોને લાંબા સમય સુધી યાદ રહેશે. ફાઈનલમાં પણ બુમરાહ પાસેથી આવા જ મજબૂત પ્રદર્શનની અપેક્ષા રાખવામાં આવશે.
આ પણ વાંચો: ઈરાન યુદ્ધ વચ્ચે 52000 ભારતીયોની વતન વાપસી, વિદેશ મંત્રાલયે એડવાઈઝરી જાહેર કરી
જો બુમરાહ આજે ન્યૂઝીલેન્ડ સામે ચાર વિકેટ લે છે, તો તે આ T20 વર્લ્ડ કપમાં સૌથી વધુ વિકેટ લેનાર બોલર બની શકે છે. જોકે, વરુણ ચક્રવર્તી 13 વિકેટ સાથે તેનાથી આગળ ચાલી રહ્યો છે.
