ઓસ્ટ્રેલિયાનો સ્ટાર ક્રિકેટર ડેમિયન માર્ટિન કોમામાં, જાણો મેનિનઝાઈટિસ બીમારી છે શું?

Damien Martyn: ઓસ્ટ્રેલિયનો પૂર્વ સ્ટાર ક્રિકેટર ડેમિયન માર્ટિન હાલમાં મેનિનઝાઈટિસ જેવી જીવલેણ બીમારીથી પીડાઈ રહ્યો છે અને તેને ઈન્ડ્યૂસ્ડ કોમા (કૃત્રિમ કોમા)માં રાખવામાં આવ્યો છે. 54 વર્ષીય માર્ટિનને 26 ડિસેમ્બરના રોજ તબિયત લથડતા ગંભીર હાલતમાં બ્રિસ્બેનની એક હોસ્પિટલમાં દાખલ કરવામાં આવ્યો છે. માર્ટિનને મેનિનઝાઈટિસ છે, આ બીમારીમાં વ્યક્તિના મગજ અને કરોડરજ્જુની આસપાસના પટલમાં સોજો આવી જાય છે. તે મગજમાં સોજાનું કારણ બની શકે છે અને જીવલેણ સાબિત થઈ શકે છે. 

ઓસ્ટ્રેલિયાના પૂર્વ વિકેટકીપર-બેટ્સમેન અને માર્ટિનના નજીકના મિત્ર એડમ ગિલક્રિસ્ટે તેમના પરિવાર વતી જનતાને માહિતી આપી હતી કે માર્ટિનની  હોસ્પિટલમાં સારવાર ચાલી રહી છે. 

ગિલક્રિસ્ટે આપી માહિતી

ગિલક્રિસ્ટે કહ્યું કે, 'માર્ટિનને ખૂબ સારી સારવાર મળી રહી છે અને અમાન્ડા (માર્ટિનની પાર્ટનર) અને તેનો પરિવાર જાણે છે કે ઘણા લોકો તેના માટે પ્રાર્થનાઓ અને શુભેચ્છાઓ મોકલી રહ્યા છે. ક્રિકેટ ઓસ્ટ્રેલિયાના સીઈઓ ટૉડ ગ્રીનબર્ગે પણ માર્ટિનના ઝડપથી સ્વસ્થ થવાની કામના કરી છે.'

આવું રહ્યું છે કરિયર

ડેમિયન માર્ટિને ઈન્ટરનેશનલ ક્રિકેટમાં પોતાનું ડેબ્યૂ 1992માં બ્રિસ્બેનમાં વેસ્ટ ઈન્ડિઝ સામે રમાયેલી ટેસ્ટ મેચમાં કર્યું હતું, જેમાં બંને ઈનિંગ્સમાં તેણે 36 અને 15 રન બનાવ્યા હતા. પોતાના કરિયર દરમિયાન માર્ટિન પોતાની સુંદર અને સ્ટાઈલિશ બેટિંગ માટે જાણીતો હતો. તેણે ઓસ્ટ્રેલિયા માટે 67 ટેસ્ટ અને 208 વનડે મેચ રમી છે. 

જમણા હાથના બેટ્સમેન ડેમિયન માર્ટિન 1990ના દાયકાના અંત અને 2000ના દાયકામાં ઓસ્ટ્રેલિયાના દબદબા વાળા સમયમાં મિડલ ઓર્ડરનો મજબૂત ખેલાડી રહ્યો છે. તે 1999 અને 2003ના વર્લ્ડ કપ વિજેતા ઓસ્ટ્રેલિયન ટીમનો હિસ્સો હતો. 

2003 વર્લ્ડ કપ ફાઈનલમાં ભારત સામે તેણે મહત્ત્વપૂર્ણ ભૂમિકા ભજવી હતી. માર્ટિને અણનમ 88 (84 બોલ) રન બનાવ્યા અને કેપ્ટન રિકી પોન્ટિંગ (121 બોલમાં 140*) સાથે 234 રનની જંગી પાર્ટનરશિપ કરી. આ શાનદાર પાર્ટનરશિપના દમ પર ઓસ્ટ્રેલિયાએ 50 ઓવરમાં 359/2 રનનો વિશાળ સ્કોર બનાવ્યો હતો. 

આ પણ વાંચો: મોહમ્મદ શમી-આકાશદીપનો તરખાટ, વિજય હઝારે ટ્રોફીમાં જમ્મુ-કાશ્મીરનો શરમજનક રેકોર્ડ, 63મા ઓલઆઉટ

માર્ટિન 2006 ચેમ્પિયન્સ ટ્રોફીમાં પણ ઓસ્ટ્રેલિયાનો સૌથી વધુ રન બનાવનાર ખેલાડી રહ્યો હતો, તેણે પાંચ ઈનિંગ્સમાં 80.33ની એવરેજથી 241 રન બનાવ્યા હતા, જેમાં બે અડધી સદી સામેલ છે.

આ ઉપરાંત ભારતમાં ઓસ્ટ્રેલિયાની ઐતિહાસિક 2-1થી ટેસ્ટ સીરિઝ જીતમાં પણ માર્ટિને મોટું યોગદાન આપ્યું હતું. તેણે આ સીરિઝમાં સૌથી વધુ 444 રન  બનાવ્યા હતા. 

પોતાના કરિયરનો અંત

- 67 ટેસ્ટમાં 4,406 રન (એવરેજ 46.37), જેમાં 13 સદી અને 23 અડધી સદી સામેલ છે.

- વનડે ક્રિકેટમાં 5,346 રન, 5 સદી અને 37 અડધી સદી.

- 4 T20 ઈન્ટરનેશનલ મેચ પણ રમી છે, જેમાં 120 રન બનાવ્યા છે.