Vaibhav Sooryavanshi Creates World Record: ભારતીય ક્રિકેટના ઉભરતા સિતારા વૈભવ સૂર્યવંશીએ ટી20 ક્રિકેટમાં એક એવી સિદ્ધિ હાંસલ કરી છે જેણે વિશ્વના દિગ્ગજ બેટ્સમેનોને પાછળ છોડી દીધા છે. વૈભવ ટી20 ક્રિકેટના ઇતિહાસમાં સૌથી ઝડપી અને સૌથી નાની ઉંમરે 100 સિક્સર પૂરી કરનાર ખેલાડી બની ગયો છે. આ ઐતિહાસિક સિદ્ધિ તેણે માત્ર 29 ઇનિંગ્સમાં મેળવી છે.
બોલના હિસાબે પણ મોટો રેકોર્ડ
વૈભવે માત્ર ઇનિંગ્સના મામલે જ નહીં પરંતુ બોલના હિસાબે પણ રેકોર્ડ તોડ્યો છે. તેણે માત્ર 514 બોલમાં પોતાની 100 ટી20 સિક્સર પૂર્ણ કરી છે. અગાઉ કોઈ પણ બેટ્સમેન આટલા ઓછા બોલમાં આ આંકડા સુધી પહોંચી શક્યો નથી.
પાવરપ્લેમાં રચ્યો ઇતિહાસ
આઈપીએલ 2026માં વૈભવ સૂર્યવંશી પાવરપ્લેમાં સૌથી ખતરનાક બેટ્સમેન સાબિત થયો છે. તેણે આ સીઝનમાં પાવરપ્લેમાં કુલ 30 સિક્સર ફટકારી છે, જે આઈપીએલની કોઈ પણ એક સીઝનનો સર્વોચ્ચ રેકોર્ડ છે. આ મામલે તેણે અભિષેક શર્માનો (2024માં 29 સિક્સર) રેકોર્ડ તોડી નાખ્યો છે. ચાલુ સીઝનમાં અત્યાર સુધી વૈભવના બેટથી કુલ 40 સિક્સર નીકળી છે.
આઈપીએલ 2026 માં વૈભવનું પ્રદર્શન
ગુજરાત ટાઇટન્સ સામેની મેચમાં વૈભવે મોહમ્મદ સિરાજની પહેલી જ બોલ પર લોન્ગ-ઓન ઉપર શાનદાર સિક્સર ફટકારી પોતાના ઇરાદા સ્પષ્ટ કર્યા હતા. રાજસ્થાન રોયલ્સ તરફથી રમતા વૈભવે 11 ઇનિંગ્સમાં 40.00ની સરેરાશ અને 236.55ના સ્ટ્રાઈક રેટ થી 440 રન બનાવ્યા છે, જેમાં 1 સદી અને 2 અર્ધસદીનો સમાવેશ થાય છે.
જોકે, આ મેચમાં ગુજરાત ટાઇટન્સે પ્રથમ બેટિંગ કરતા શુભમન ગિલના 84 અને સાઈ સુદર્શનના 55 રનની મદદથી 229 રન બનાવ્યા હતા. જેના જવાબમાં રાજસ્થાનની ટીમ 152 રનમાં સમેટાઈ ગઈ હતી અને 77 રનથી હારનો સામનો કરવો પડ્યો હતો. પરંતુ હાર છતાં વૈભવની બેટિંગે સમગ્ર ક્રિકેટ જગતનું ધ્યાન ખેંચ્યું છે.
IPL સીઝનમાં પાવરપ્લેમાં સર્વાધિક છક્કા
30*- વૈભવ સૂર્યવંશી (2026)
29- અભિષેક શર્મા (2024)
27*- અભિષેક શર્મા (2026)
22- સનથ જયસૂર્યા (2008)
22- ટ્રેવિસ હેડ (2024)
22- યશસ્વી જાયસ્વાલ (2025)
IPL સીઝનમાં સર્વાધિક છક્કા લગાવનાર ભારતીય
42- અભિષેક શર્મા (2024)
40*- વૈભવ સૂર્યવંશી (2026)
39- શ્રેયસ અય્યર (2025)
38- વિરાટ કોહલી (2016)
38- વિરાટ કોહલી (2024)
38- સૂર્યકુમાર યાદવ (2025)
37- ઋષભ પંત (2018)
