રોહિત શર્માનો 'જુડવા'! એક જ મેચમાં હિટમેન સાથે મેચ રમતો દેખાયો, ફેન્સનું માથું ભમી ગયું!

Rohit Sharma News : વિજય હઝારે ટ્રોફીમાં મુંબઈ અને સિક્કિમ વચ્ચે રમાયેલી મેચમાં એક અજીબ નજારો જોવા મળ્યો, જેણે સોશિયલ મીડિયા પર ખળભળાટ મચાવી દીધો છે. ભારતીય સ્ટાર બેટ્સમેન રોહિત શર્માએ આ મેચમાં 155 રનની ધમાકેદાર સદી ફટકારીને શાનદાર વાપસી કરી હતી, પરંતુ ચર્ચાનું કેન્દ્ર રોહિતની બેટિંગની સાથે તેની બાજુમાં ઉભેલો તેનો 'હમશકલ' (ડુપ્લિકેટ) બન્યો હતો.

કોણ છે રોહિત જેવો દેખાતો આ ખેલાડી?

સોશિયલ મીડિયા પર વાયરલ થયેલી તસવીરમાં રોહિત શર્માની સાથે મુંબઈનો વિકેટકીપર બેટ્સમેન હાર્દિક તમોરે જોવા મળી રહ્યો છે. ચાહકોનું માનવું છે કે હાર્દિકનો દેખાવ રોહિત શર્મા સાથે ઘણો મળતો આવે છે. જ્યારે બંને ખેલાડીઓ મેદાન પર એકસાથે ઉભા હતા, ત્યારે ફેન્સ એક ક્ષણ માટે મૂંઝવણમાં મુકાઈ ગયા હતા કે આમાં અસલી રોહિત કોણ છે. જોકે, કેટલાક લોકોએ આ ફોટો 'મોર્ફ' (એડિટ) કરેલો હોવાનો પણ દાવો કર્યો છે.

હાર્દિક તમોરેનું ક્રિકેટ કરિયર

20 ઓક્ટોબર 1997ના રોજ મહારાષ્ટ્રના થાણેમાં જન્મેલા હાર્દિક જિતેન્દ્ર તમોરે છેલ્લા કેટલાક સમયથી મુંબઈની સિનિયર ટીમનો મહત્વનો હિસ્સો છે.  તેણે વર્ષ 2019-20ની સીઝનમાં મુંબઈ માટે ફર્સ્ટ ક્લાસ ક્રિકેટમાં ડેબ્યૂ કર્યું હતું. હાર્દિક મધ્યમ ક્રમનો ટેકનિકલી મજબૂત બેટ્સમેન માનવામાં આવે છે. 2021-22ની રણજી ટ્રોફી સેમીફાઈનલમાં ઉત્તર પ્રદેશ વિરુદ્ધ તેણે અણનમ સદી ફટકારીને મુંબઈને ફાઈનલ સુધી પહોંચાડવામાં મહત્વની ભૂમિકા ભજવી હતી. તે માત્ર શાનદાર વિકેટકીપર જ નથી, પરંતુ દબાણમાં સ્ટ્રાઈક રોટેટ કરવામાં અને પરિસ્થિતિ મુજબ રન ગતિ વધારવામાં પણ માહિર છે.

સોશિયલ મીડિયા પર વાયરલ થઈ તસવીર

વિજય હઝારે ટ્રોફીની આ મેચ દરમિયાન રોહિત અને હાર્દિક એક જ ફ્રેમમાં જોવા મળતા ફેન્સ હસી-હસીને લોટપોટ થઈ ગયા હતા. ક્રિકેટ રસિકોએ તેને 'બે રોહિત શર્મા' કહીને સંબોધ્યા હતા. હાર્દિક તમોરે અત્યારે સૈયદ મુશ્તાક અલી ટ્રોફી અને લિસ્ટ-એ ક્રિકેટમાં મુંબઈ ટીમ માટે સતત સારું પ્રદર્શન કરી રહ્યો છે અને ફેન્સને આશા છે કે તે ભવિષ્યમાં પોતાની બેટિંગથી પણ રોહિત શર્મા જેવી ઓળખ બનાવશે.