ખેલાડી કે સુપરમેન? એક જ મેચમાં બેટિંગ, બોલિંગ અને કીપિંગ કરી ટીમને રોમાંચક જીત અપાવી

Donovan Ferreira SA20 : SA20 લીગ 2025-26ની 9મી મેચમાં રોમાંચની તમામ હદો પાર થઈ ગઈ હતી. જોબર્ગ સુપર કિંગ્સ અને ડરબન સુપર જાયન્ટ્સ વચ્ચેની આ મેચ નિર્ધારિત 20 ઓવરમાં ટાઈ રહી હતી, જેના કારણે મેચ સુપર ઓવરમાં પહોંચી હતી. આ મેચમાં ડેનોવન ફરેરાએ ઓલરાઉન્ડ પ્રદર્શનની નવી વ્યાખ્યા લખી હતી. તેણે જે રીતે ત્રણ અલગ-અલગ ભૂમિકાઓ ભજવી, તેના કારણે તેની દરેક જગ્યાએ ચર્ચા થઈ રહી છે.

બેટિંગમાં મચાવ્યો તરખાટ: 330ના સ્ટ્રાઈક રેટથી રન બનાવ્યા

મેચમાં પ્રથમ બેટિંગ કરતા જોબર્ગ સુપર કિંગ્સ મુશ્કેલીમાં હતી, ત્યારે ડેનોવન ફરેરાએ તોફાની બેટિંગ કરી હતી. તેણે માત્ર 10 બોલમાં અણનમ 33 રન ફટકાર્યા હતા. આ દરમિયાન તેનો સ્ટ્રાઈક રેટ 330નો રહ્યો હતો અને તેણે પોતાની ઇનિંગમાં 4 છગ્ગા અને 1 ચોગ્ગો ફટકાર્યો હતો. ફરેરાના આ કેમિયોની મદદથી જોબર્ગની ટીમે 20 ઓવરમાં 4 વિકેટે 205 રનનો વિશાળ સ્કોર બનાવ્યો હતો.

બોલિંગમાં પણ કમાલ: કરકસરયુક્ત સ્પેલ અને વિકેટ

બેટિંગ બાદ જ્યારે બોલિંગની વારી આવી ત્યારે ફરેરાએ ફરી એકવાર ટીમને મદદ કરી. તેણે પોતાની 4 ઓવરના સ્પેલમાં માત્ર 24 રન આપીને 1 મહત્વની વિકેટ ઝડપી હતી. 200થી વધુ રનનો પીછો કરી રહેલી ડરબનની ટીમ સામે તેની આ કરકસરયુક્ત બોલિંગ ખૂબ જ નિર્ણાયક સાબિત થઈ હતી. જોકે, ડરબનની ટીમે લડત આપીને સ્કોર લેવલ કરી દીધો અને મેચ ટાઈ થઈ.

સુપર ઓવરમાં વિકેટકીપિંગ અને રોમાંચક જીત

મેચ ટાઈ થતા પરિણામ માટે સુપર ઓવરનો સહારો લેવાયો હતો. અહીં ફરેરાએ બધાને ચોંકાવી દીધા કારણ કે તે હવે ગ્લવ્સ પહેરીને વિકેટકીપર તરીકે મેદાન પર ઉતર્યો હતો. કીપિંગ દરમિયાન તેણે અત્યંત ચપળતા બતાવીને એક શાનદાર રનઆઉટ કર્યો હતો. જેના કારણે ડરબનની ટીમ મોટો સ્કોર ન બનાવી શકી અને જોબર્ગને માત્ર 6 રનનો ટાર્ગેટ મળ્યો, જે તેમણે સરળતાથી હાંસલ કરી લીધો.

એક જ મેચમાં બેટિંગમાં પાવર હિટિંગ, બોલિંગમાં વિકેટ અને છેલ્લે કીપિંગમાં ગેમ-ચેન્જર સાબિત થનાર ડેનોવન ફરેરાને 'પ્લેયર ઓફ ધ મેચ' જાહેર કરવામાં આવ્યો હતો. તેની આ સુપર ઓલરાઉન્ડર રમતને કારણે જોબર્ગ સુપર કિંગ્સે ટુર્નામેન્ટમાં જીતની હેટ્રિક પૂરી કરી છે.