ન્યૂઝીલેન્ડની જીત સાથે જ ભારતીય ટીમને ઝટકો, WTCની ફાઈનલમાં પહોંચવું મુશ્કેલ થશે!

WTC 2025-27: ટોમ લેથમની આગેવાની હેઠળની ન્યૂઝીલેન્ડે બીજી ટેસ્ટમાં વેસ્ટ ઈન્ડિઝને 9 વિકેટથી હરાવીને ત્રણ મેચની સીરિઝમાં 1-0 ની લીડ મેળવી લીધી. આ જીત સાથે ન્યૂઝીલેન્ડે વર્લ્ડ ટેસ્ટ ચેમ્પિયનશિપ પોઈન્ટ ટેબલમાં પણ મોટી છલાંગ લગાવી છે. ન્યૂઝીલેન્ડ હવે સીધા ત્રીજા સ્થાને પહોંચી ગયું છે. બીજી તરફ, કિવી ટીમની આ જીતથી ભારતને મોટો ઝટકો લાગ્યો છે. શુભમન ગિલની આગેવાની હેઠળની ભારતીય ટીમ હવે ટોપ-5માંથી પણ બહાર થઈ ગઈ છે.  ભારતને તાજેતરમાં દક્ષિણ આફ્રિકા સામે ઘરઆંગણે 0-2 થી હારનો સામનો કરવો પડ્યો હતો.

ફાઇનલમાં પહોંચવાનું સ્વપનું ધૂંધળું

ભારતનું WTC ફાઇનલમાં પહોંચવાનું સ્વપનુ ફરી એકવાર ધૂંધળું થતું દેખાય છે. ભારતીય ટીમ અત્યાર સુધીમાં ત્રણ સીરિઝ રમી છે. ઈંગ્લેન્ડ, વેસ્ટ ઇન્ડીઝ અને દક્ષિણ આફ્રિકા સામે. ઈંગ્લેન્ડ સામેની સીરિઝ 2-2થી ડ્રો રહી, ભારતે વેસ્ટ ઇન્ડીઝને 2-0થી હરાવ્યું, અને દક્ષિણ આફ્રિકા સામે 0-2થી હારી ગયું. ભારતની બાકીની ત્રણ સીરિઝ ન્યુઝીલેન્ડ, શ્રીલંકા અને ઓસ્ટ્રેલિયા સામે છે, જેમાંથી ટીમ ઈન્ડિયા ફક્ત ઓસ્ટ્રેલિયાનું આયોજન કરશે.

આ પણ વાંચો: વિરાટ કોહલી અને પંત વિજય હજારે ટ્રોફીમાં રમશે, ગુજરાત અને સૌરાષ્ટ્રની ટીમ સામે મેચ; જુઓ શેડ્યૂલ

WTC પોઈન્ટ્સ ટેબલમાં મોટો ઉલટફેર

વેસ્ટ ઇન્ડીઝ સામેની બીજી ટેસ્ટ જીત્યા બાદ, ન્યૂઝીલેન્ડના 66.67 ટકા પોઈન્ટ છે. તે અગાઉના WTCના બે ફાઇનલિસ્ટ - ઓસ્ટ્રેલિયા અને દક્ષિણ આફ્રિકાથી આગળ છે. ઓસ્ટ્રેલિયા 100 ટકા પોઈન્ટ સાથે નંબર-વન સ્થાન પર યથાવત છે, જ્યારે દક્ષિણ આફ્રિકા 75 ટકા પોઈન્ટ ધરાવે છે.

ભારત ટોપ-5માંથી બહાર

ભારતીય ટીમની વાત કરીએ તો, તેમના નવ મેચમાંથી 48.15 ટકા પોઈન્ટ છે, જેમાં ચાર જીત, એટલી જ હાર અને એક ડ્રો છે. ભારત હવે WTC પોઈન્ટ ટેબલમાં છઠ્ઠા સ્થાને સરકી ગયું છે. દરમિયાન પાકિસ્તાન 50 ટકા પોઈન્ટ સાથે ભારતથી ઉપર પાંચમા સ્થાને છે.