T20 World Cup : ટી20 વર્લ્ડ કપ 2026ના પોતાના અંતિમ મુકાબલામાં નેપાળ ક્રિકેટ ટીમે એક એવું પરાક્રમ કરી બતાવ્યું છે. જેનો ગુંજ વર્ષો સુધી ક્રિકેટ જગતમાં સંભળાશે. ટૂર્નામેન્ટની શરૂઆત ઇંગ્લેન્ડ સામે અત્યંત નજીવી અને દિલ તોડી નાખે તેવી હાર સાથે થઈ હતી, પરંતુ ટીમે હિંમત હારી નહીં. આખરે, સ્કોટલેન્ડ સામે 7 વિકેટે શાનદાર જીત મેળવીને નેપાળે 12 વર્ષની લાંબી રાહનો અંત આણ્યો છે. આ જીતે નેપાળી પ્રશંસકોના ચહેરા પર ફરીથી સ્મિત લાવી દીધું છે.
સ્કોટલેન્ડની વિસ્ફોટક શરૂઆત
મેચની શરૂઆતમાં સ્કોટલેન્ડે શાનદાર બેટિંગનું પ્રદર્શન કર્યું હતું. તેમના ઓપનર બેટ્સમેન માઈકલ જોન્સે નેપાળી બોલરોની ધોલાઇ શરૂ કરી હતી. માત્ર 45 બોલમાં 8 ચોગ્ગા અને 3 છગ્ગાની મદદથી 71 રનની આક્રમક ઇનિંગ રમી હતી. એક સમયે એવું લાગતું હતું કે, સ્કોટલેન્ડ આસાનીથી 200 રનનો આંકડો વટાવી જશે. જોન્સની તોફાની બેટિંગે નેપાળી છાવણીમાં ચિંતા વધારી દીધી હતી.
સોમપાલ કામીની દમદાર વાપસી
જ્યારે સ્કોટલેન્ડની ટીમ વિશાળ સ્કોર તરફ આગળ વધી રહી હતી, ત્યારે અનુભવી ફાસ્ટ બોલર સોમપાલ કામીએ આખી રમત પલટી નાખી. 16મી ઓવરમાં ખતરનાક જણાતા જોન્સની વિકેટ પડતાની સાથે જ સ્કોટિશ ઇનિંગ્સ સંપૂર્ણપણે લથડી ગઇ હતી. નેપાળે ડેથ ઓવર્સમાં શાનદાર બોલિંગનું પ્રદર્શન કરીને સ્કોટલેન્ડને 20 ઓવરમાં માત્ર 170 રન પર રોકી દીધું. આ વાપસી મેચનો સૌથી મોટો ટર્નિંગ પોઈન્ટ સાબિત થઈ.
ઓપનિંગ જોડીનો આક્રમક અંદાજ
171 રનના લક્ષ્યનો પીછો કરવા ઉતરેલી નેપાળની શરૂઆત પણ તોફાની રહી હતી. કુશલ ભુર્તેલ અને આસિફ શેખની ઓપનિંગ જોડીએ પ્રથમ 5 ઓવરમાં જ સ્કોર 50 રન સુધી પહોંચાડી દીધો હતો. ભુર્તેલે એક જ ઓવરમાં ત્રણ ગગનચુંબી છગ્ગા ફટકારીને સ્કોટિશ બોલરોને બેકફૂટ પર ધકેલી દીધા હતા. જોકે, પાવરપ્લે પછી સ્પિનર માઈકલ લીસ્કે નેપાળને ઝટકા આપ્યા અને જોતજોતામાં 13 ઓવરમાં નેપાળની 3 વિકેટ 98 રનના સ્કોર પર પડી ગઈ હતી.
દીપેન્દ્ર સિંહ એરીનું તોફાન
મુશ્કેલ સમયમાં ક્રીઝ પર આવેલા દીપેન્દ્ર સિંહ એરીએ પોતાની આક્રમક બેટિંગથી મેચનું પાસું પલટી દીધું. આ એ જ એરી છે, જેમણે અગાઉ એશિયન ગેમ્સમાં માત્ર 9 બોલમાં અડધી સદી ફટકારી હતી. તેમણે લીસ્કની એક જ ઓવરમાં બે છગ્ગા ફટકારી દબાણ ઓછું કર્યું અને માત્ર 23 બોલમાં પોતાની વિસ્ફોટક અડધી સદી પૂરી કરી. તેમની આ ઇનિંગે નેપાળને જીતના ઉંબરે લાવીને ઊભું કરી દીધું.
ગુલશન ઝાએ જવાબદારી સંભાળી
અંતિમ ઓવરોમાં ગુલશન ઝાએ જવાબદારી સંભાળી. 19મી ઓવરમાં એક છગ્ગો અને 20મી ઓવરના બીજા બોલે ચોગ્ગો ફટકારીને તેમણે ટીમને ઐતિહાસિક જીત અપાવી. આ જીત સાથે ગ્રુપ Cની તમામ ટીમોએ ઓછામાં ઓછી એક જીત સાથે ટૂર્નામેન્ટનો અંત કર્યો.
