'કોહલીને સંન્યાસ લઈ લેવા મજબૂર કરાયો હતો..', પૂર્વ ભારતીય ક્રિકેટરનો ચોંકાવનારો દાવો

Virat Kohli News : ભારતીય ક્રિકેટના દિગ્ગજ ખેલાડી વિરાટ કોહલીના ટેસ્ટ સંન્યાસ પરની ચર્ચા ફરી એકવાર ગરમાઈ છે. પૂર્વ ભારતીય બેટ્સમેન મનોજ તિવારીએ એક સનસનીખેજ દાવો કરીને આ વિષયને ફરીથી હવા આપી છે. તિવારીના મતે, કોહલીને ટેસ્ટ ફોર્મેટમાંથી સંન્યાસ લેવા માટે દબાણ કરવામાં આવ્યું હતું અને તે તેનો પોતાનો નિર્ણય નહોતો.

તિવારીએ શું દાવો કર્યો?

મનોજ તિવારીએ એક વાતચીતમાં સંજય માંજરેકરના નિવેદન પર અસહમતિ વ્યક્ત કરી હતી, જેમાં માંજરેકરે કહ્યું હતું કે કોહલીએ સૌથી કઠિન ફોર્મેટ છોડીને સરળ ફોર્મેટ પસંદ કર્યું. તેના જવાબમાં તિવારીએ કહ્યું, "હું તેમની સાથે સહમત નથી. કોહલીને સંન્યાસ માટે મજબૂર કરવામાં આવ્યો હતો."

પડદા પાછળની કહાની શું છે તે દરેક જાણે છે 

પૂર્વ ભારતીય ક્રિકેટરે વધુમાં ઉમેર્યું, "એવું વાતાવરણ બનાવવામાં આવ્યું હતું કે કોહલીને ટેસ્ટ ક્રિકેટને અલવિદા કહેવું પડ્યું. તે એવા વ્યક્તિ નથી જે ક્યારે જવું છે તેનો નિર્ણય જાતે કરે. હા, નિર્ણય તેમના મોઢેથી નીકળ્યો, પરંતુ દરેક જણ જાણે છે કે પડદા પાછળની કહાની શું છે."

શા માટે ફરી શરૂ થઈ આ ચર્ચા?

વિરાટ કોહલીના ટેસ્ટ સંન્યાસ પર વિવાદ સતત ઘેરાતો રહ્યો છે, કારણ કે લાલ બોલના ક્રિકેટમાં તેનું પ્રદર્શન શાનદાર રહ્યું છે. કોહલીના સમકાલીન ખેલાડીઓ જેવા કે જો રૂટ અને સ્ટીવ સ્મિથ હજુ પણ ટેસ્ટ ક્રિકેટમાં સતત સદીઓ ફટકારી રહ્યા છે, ત્યારે કોહલીનો સંન્યાસ હંમેશા ચર્ચાનો વિષય રહ્યો છે.

કોહલીનું શાનદાર ફોર્મ અને તિવારીનો બચાવ

મનોજ તિવારીએ કહ્યું કે આંકડાઓને જોતાં કોહલી પર ફોર્મેટ પસંદ કરવાનો આરોપ લગાવવો ખોટો છે. ન્યૂઝીલેન્ડ સામેની તાજેતરની વનડે સિરીઝમાં ભલે ભારત હારી ગયું હોય, પરંતુ કોહલીએ છેલ્લી મેચમાં 108 બોલમાં 124 રનની શાનદાર સદી ફટકારીને ભારતની આશાઓ જીવંત રાખી હતી. આ તેના આંતરરાષ્ટ્રીય કરિયરની 85મી અને વનડે કરિયરની 54મી સદી હતી. આ પ્રદર્શન દર્શાવે છે કે તે હજુ પણ શાનદાર ફોર્મમાં છે.