IPL 2025 Final: વરસાદનું વિઘ્ન આવે તો કેવી રીતે નક્કી કરાશે વિજેતા? જાણો નિયમો

IPL 2025 Final: ઇન્ડિયન પ્રીમિયર લીગ (IPL) 2025ની ફાઇનલ મંગળવારે (ત્રીજી જૂન) રોયલ ચેલેન્જર્સ બેંગ્લોર (RCB) અને પંજાબ કિંગ્સ (PBKS) વચ્ચે રમાશે. આ મેચ ભારતીય સમય મુજબ સાંજે 7.30 વાગ્યે અમદાવાદના નરેન્દ્ર મોદી સ્ટેડિયમ ખાતે રમાશે. નોંધનીય છે કે, IPLની વર્તમાન સિઝનમાં પણ વરસાદનો કહેર જોવા મળ્યો હતો. ત્યારે સૌથી મોટો સવાલ એ છે કે જો IPL 2025ની ફાઇનલ દરમિયાન વરસાદ પડે છે અથવા અન્ય કોઈ કારણોસર મેચ યોજાતી નથી, તો ચેમ્પિયન ટીમ કેવી રીતે નક્કી થશે. તો ચાલો જાણીએ નિયમ વિશે...

જાણો શું છે નિયમો

ઇન્ડિયન પ્રીમિયર લીગ (IPL) 2025ની ફાઇનલ મેચમાં જો વરસાદ કે અન્ય કોઈ કારણોસર ત્રીજી જૂને ઓછામાં ઓછી પાંચ ઓવરની રમત શક્ય ન બને, તો મેચ રિઝર્વ ડે (ચોથી જૂન) પર જશે. જોકે, ભારતીય ક્રિકેટ કંટ્રોલ બોર્ડ(BCCI)એ 120 મિનિટનો વધારાનો સમય રાખ્યો છે, જેથી એક દિવસમાં પરિણામ આવી શકે. તેમ છતાં જો પરિણામ ન આવે, તો રિઝર્વ ડેનો ઉપયોગ કરવામાં આવશે. રિઝર્વ ડે પર, મેચ જ્યાંથી અટકી હતી ત્યાંથી શરુ થશે. જો વરસાદ રિઝર્વ ડેમાં પણ વિઘ્ન બને છે અને ઓછામાં ઓછી પાંચ ઓવરની રમત શક્ય ન બને, તો ઇન્ડિયન પ્રીમિયર લીગના વિજેતાનો નિર્ણય સુપર ઓવર દ્વારા કરી શકાય છે.

આ પણ વાંચો: અમદાવાદમાં દેશભક્તિની થીમ પર IPLનો સમાપન સમારોહ: લેઝર શૉનું આયોજન, ટિકિટની નબળી વ્યવસ્થાથી ચાહકો નારાજ