ભારતની ત્રણ મહિલા ખેલાડીઓએ પલટી મેચ, જાણો કોણે જીતાડ્યો ભારતને પહેલો વનડે વર્લ્ડ કપ?

ICC Women's Cricket World Cup: ICC મહિલા ક્રિકેટ વર્લ્ડ કપ 2025ની ફાઇનલમાં ભારતીય ટીમનો સામનો સાઉથ આફ્રિકા સાથે થયો. 2 નવેમ્બરે (રવિવાર) નવી મુંબઈના ડીવાય પાટિલ સ્પોર્ટ્સ એકેડમીમાં રમાયેલી મેચમાં ભારતીય ટીમે 52 રનથી જીત હાંસલ કરી. આ જીત સાથે જ ભારતીય ટીમે પહેલીવાર મહિલા વર્લ્ડ કપ પર કબજો કર્યો. ત્યારે, સાઉથ આફ્રિકાનું વર્લ્ડ કપ જીતવાનું સપનું તૂટી ગયું. મેચમાં ભારતીય ટીમે 7 વિકેટ પર 298 રન બનાવ્યા હતા. ટાર્ગેટનો પીછો કરતા સાઉથ આફ્રિકાની ટીમ 45.3 ઓવરમાં 246 રન પર સમેટાઈ ગઈ.

ફાઇનલમાં ભારતીય ટીમની જીતમાં ત્રણ ખેલાડીઓનું મહત્ત્વપૂર્ણ યોગદાન રહ્યું. શેફાલી વર્મા અને દીપ્તિ શર્માએ ઓલરાઉન્ડ પ્રદર્શન કર્યું. ત્યારે અમનજોતે શાનદાર ફીલ્ડિંગ કરી. અમનજોતે તાજમિન બ્રિટ્સને રનઆઉટ કરી અને લૌરા વોલ્વાર્ડનો કેચ ઝડપ્યો.

સલામી બેટર શેફાલી વર્માએ 87 રન બનાવ્યા અને 2 વિકેટ ઝડપી. ત્યારે દીપ્તિ શર્માએ 58 રન બનાવ્યા અને 5 વિકેટ ઝડપીને સાઉથ આફ્રિકાની ટીમની કમર તોડી નાખી. આ ત્રણેય ખેલાડીઓના શાનદાર પ્રદર્શને ભારતને જીત અપાવવામાં ખુબ મદદ કરી.

રન ચેઝમાં સાઉથ આફ્રિકાની શરૂઆત શાનદાર રહી. તાજમિન બ્રિટ્સ અને કેપ્ટન લૌરા વોલ્વાર્ડે પહેલી વિકેટ માટે 51 રનની ભાગીદારી કરી. આ ભાગીદારીને અમનજોત કૌરે તોડી, જેમણે બુલેટની ગતિથી થ્રો કરીને તાજમિનને રન આઉટ કર્યો. જોકે, આફ્રિકાની કેપ્ટન વોલ્વાર્ડ ક્રીઝ પર અડગ રહી અને તેમણે પોતાની સદી પૂર્ણ કરી.

સુને લુસ (25 રન) અને એનેરી ડર્કસેને (35 રન) પણ પોતાના કેપ્ટનનો સાથે આપ્યો. સાઉથ આફ્રિકાનો સ્કોર 39.2 ઓવરોમાં 5 વિકેટ પર 209 રન હતો. અહીંથી દીપ્તિ શર્માના શાનદાર સ્પેલે આફ્રિકાની હાર નક્કી કરી. દીપ્તિ શર્માએ 9.3 ઓવરોમાં 39 રન આપીને પાંચ વિકેટ ઝડપી.