ભારતીય ક્રિકેટ પર Gen Zનો દબદબો! 15 થી 27 વર્ષની વયે કરોડોની કમાણી કરે છે આ 5 સુપરસ્ટાર્સ

Gen Z Cricketers Rule Team India: ભારતમાં ક્રિકેટ માત્ર એક રમત નથી પરંતુ લોકોની ભાવનાઓ સાથે જોડાયેલું એક પર્વ છે, જેણે સમયાંતરે દેશને અનેક દિગ્ગજ ખેલાડીઓ આપ્યા છે. રોહિત શર્મા અને વિરાટ કોહલી જેવા સિનિયર ખેલાડીઓ ચાહકોના દિલ પર રાજ કરે છે, પરંતુ બદલાતા સમય સાથે હવે 'જનરેશન ઝી' (Gen Z) એટલે કે યુવા ખેલાડીઓએ ક્રિકેટની દુનિયામાં સપાટો બોલાવ્યો છે. વનડે અને ટેસ્ટમાં ભારતનું નેતૃત્વ કરી રહેલા શુભમન ગિલથી લઈને સૌથી નાની વયે ડેબ્યૂ કરનાર વૈભવ સૂર્યવંશી સુધીના આ યુવા ધુરંધરો મેદાન પર વિસ્ફોટક પ્રદર્શન કરવાની સાથે કરોડો રૂપિયાની કમાણી પણ કરી રહ્યા છે.

શુભમન ગિલ

આ લિસ્ટમાં પંજાબના ફાઝિલ્કા ખાતે જન્મેલા 27 વર્ષીય શુભમન ગિલનું નામ સૌથી ટોચ પર આવે છે. આટલી નાની વયે પોતાની અસાધારણ પ્રતિભાના દમ પર તેઓ ભારતીય ટેસ્ટ અને વનડે ટીમના કેપ્ટન બન્યા છે, જોકે T20Iમાં તેઓ ટીમનું નેતૃત્વ કરતા નથી. ક્રિકેટ જગતમાં 'પ્રિન્સ ઓફ ઇન્ડિયન ક્રિકેટ' તરીકે જાણીતા શુભમન આઇપીએલમાં ગુજરાત ટાઇટન્સના કેપ્ટન છે. તેમની અંદાજિત નેટવર્થ ₹80 કરોડથી ₹100 કરોડ વચ્ચે આંકવામાં આવી છે, જેનો મુખ્ય સ્ત્રોત BCCIનો વાર્ષિક સેન્ટ્રલ કોન્ટ્રાક્ટ, IPL પગાર અને મોટી બ્રાન્ડ્સના એન્ડોર્સમેન્ટ્સ છે.

યશસ્વી જયસ્વાલ

ઉત્તર પ્રદેશના ભદોહી જિલ્લાના વતની 24 વર્ષીય યશસ્વી જયસ્વાલ આજે ભારતીય ટીમના મુખ્ય આક્રમક ઓપનિંગ બેટ્સમેન છે. અત્યંત સંઘર્ષો અને મુશ્કેલીઓ વેઠીને ટીમ ઇન્ડિયા સુધી પહોંચેલી તેમની સફર દરેક યુવા માટે પ્રેરણાદાયી રહી છે. આઇપીએલમાં રાજસ્થાન રોયલ્સ તરફથી તોફાની બેટિંગ કરતા યશસ્વીની અંદાજિત નેટવર્થ 2026ના રિપોર્ટ્સ અનુસાર આશરે ₹55 કરોડ જેટલી છે.

અભિષેક શર્મા

ભારત માટે અંડર-19 વર્લ્ડ કપ રમી ચૂકેલા 26 વર્ષીય અભિષેક શર્મા પોતાની આક્રમક બેટિંગથી દર્શકોના દિલ જીતી રહ્યા છે. ડાબોડી બેટ્સમેન અને ઉપયોગી સ્પિન ઓલરાઉન્ડર તરીકે તેઓ ટીમ ઇન્ડિયા માટે ઓપનિંગ કરે છે અને પ્રથમ બોલથી મોટા શોટ્સ રમવામાં જરાય અચકાતા નથી. IPLમાં સનરાઇઝર્સ હૈદરાબાદ તરફથી રમતા અભિષેક શર્માની અંદાજિત નેટવર્થ મીડિયા અહેવાલો મુજબ ₹12 કરોડથી ₹30 કરોડ વચ્ચે છે.

તિલક વર્મા

તેલંગાણાના હૈદરાબાદમાં જન્મેલા 23 વર્ષીય તિલક વર્મા મિડલ ઓર્ડરના ભરોસાપાત્ર ડાબોડી બેટ્સમેન છે અને જરૂર પડ્યે ઉપયોગી ઓફ-સ્પિન બોલિંગ પણ કરી જાણે છે. દબાણની સ્થિતિમાં સ્થિરતાપૂર્વક રમવું અને તક મળતાં જ ઝડપથી રન ગતિ વધારવી એ તેમની મુખ્ય તાકાત છે. મુખ્યત્વે ભારતીય T20 ટીમનો હિસ્સો રહેલા તિલક આઇપીએલમાં મુંબઈ ઇન્ડિયન્સ તરફથી રમે છે અને તેમની અંદાજિત નેટવર્થ ₹10 કરોડથી ₹20 કરોડ આંકવામાં આવી છે.

વૈભવ સૂર્યવંશી

બિહારના સમસ્તીપુરમાં જન્મેલા વૈભવ સૂર્યવંશીની ઉંમર માત્ર 15 વર્ષ છે, પરંતુ આટલી નાની ઉંમરે તેમણે પોતાની વિસ્ફોટક બેટિંગથી આખા વિશ્વનું ધ્યાન ખેંચ્યું છે. ડાબોડી બેટ્સમેન તરીકે વિશાળ સિક્સરો ફટકારવાની ક્ષમતા ધરાવતા વૈભવ IPLમાં રાજસ્થાન રોયલ્સ તરફથી રમે છે અને પોતાના નામે અનેક રેકોર્ડ્સ નોંધાવી ચૂક્યા છે. તેમની અંદાજિત નેટવર્થ હાલમાં ₹2.5 કરોડથી ₹7 કરોડની આસપાસ હોવાનું મનાય છે.

આ Gen Z ખેલાડીઓની સફળતા દર્શાવે છે કે આજની નવી પેઢી માત્ર ક્રિકેટ મેદાન પર નવા ઇતિહાસ અને રેકોર્ડ્સ નથી રચી રહી, પરંતુ પોતાની અસાધારણ પ્રતિભાના જોરે નાની વયે અઢળક સંપત્તિ અને વૈશ્વિક ઓળખ પણ હાંસલ કરી રહી છે.