Ind vs Pak : આજે ભારત-પાકિસ્તાનની મેચમાં અસલી ગેમચેન્જર બનશે આ 10 ખેલાડી
Summarized by AI; it may make mistakes. Check important info
Summarized by AI; it may make mistakes. Check important info
Asia Cup 2025: એશિયા કપ 2025માં 14 સપ્ટેમ્બર એટલે કે આજે ભારત અને પાકિસ્તાન વચ્ચે હાઈ-વોલ્ટેજ મેચ રમાશે. આ મેચ ભારતીય સમય પ્રમાણે રાત્રે 8:00 વાગ્યે દુબઈના દુબઈ ઈન્ટરનેશનલ ક્રિકેટ સ્ટેડિયમમાં રમાશે. દુનિયાભરના ક્રિકેટ ચાહકોની નજર આ મહાન મેચ પર છે.
આ મેચ જે પણ ટીમ જીતશે તે સુપર-4 સ્ટેજમાં સ્થાન બનાવવાની નજીક પહોંચી જશે. આ મેચમાં ચાહકોની નજર કેટલાક પસંદગીના ખેલાડીઓ પર રહેશે. આ ખેલાડીઓ એવા છે જે મેચમાં પોત-પોતાની ટીમો માટે ગેમચેન્જર સાબિત થઈ છે. ચાલો બંને ટીમોના આવા 5 ખેલાડીઓ પર એક નજર કરીએ.
અભિષેક શર્મા
યુવા ઓપનર અભિષેક શર્માએ તાજેતરના સમયમાં T20 ક્રિકેટમાં પોતાની વિસ્ફોટક બેટિંગથી બધાને પ્રભાવિત કર્યા છે. અભિષેકનો આક્રમક અંદાજ પાવરપ્લેમાં જ પાકિસ્તાનની બોલિંગને સંપૂર્ણ દબાણમાં લાવી શકે છે. અભિષેકે જે 18 T20 આંતરરાષ્ટ્રીય મેચો રમી છે, તેમાં તેણે 193.49ના સ્ટ્રાઈક રેટથી રન બનાવ્યા છે. શાહીન આફ્રિદી સાથેની તેની લડાઈ ગેમની દિશા નક્કી કરી શકે છે.
સૂર્યકુમાર યાદવ
ભારતીય ટીમના 'મિસ્ટર 360' કહેવાતા સૂર્યકુમાર યાદવ પર આ મેચમાં મોટી જવાબદારી રહેશે. કેપ્ટન સૂર્યાની આક્રમક બેટિંગ વિરોધી ટીમના બોલિંગ આક્રમણને વેર-વિખેર કરી શકે છે. મિડલ ઓવર્સમાં તેની રમત ભારતની સૌથી મોટી તાકાત રહશે.
કુલદીપ યાદવ
આ ચાઈનામેન બોલર મિડલ ઓવર્સમાં પાકિસ્તાની બેટ્સમેનો પર ભારે પડી શકે છે. કુલદીપ યાદવ તાજેતરમાં ઈંગ્લેન્ડ સામેની ટેસ્ટ સીરિઝમાં બેન્ચ પર બેઠો રહ્યો હતો. પરંતુ એશિયા કપમાં UAE સામે તક મળતાની સાથે જ તેણે પોતાની છાપ છોડી દીધી. કુલદીપે UAE સામેની મેચમાં ચાર વિકેટ ખેરવી હતી.
જસપ્રીત બુમરાહ
બૂમ બૂમ બુમરાહના યોર્કર અને સટીક લાઈન-લેન્થ વાળા બોલ ચોક્કસપણે પાકિસ્તાની બેટ્સમેનોને પરેશાન કરશે. બુમરાહ પાવરપ્લેમાં ઓછામાં ઓછી બે ઓવર ફેંકશે, અને જો જરૂર પડે તો તે ડેથ ઓવરમાં એક કે બે ઓવર પણ ફેંકશે. બુમરાહ પાવરપ્લેમાં સેમ અયુબ અને મોહમ્મદ હારિસ જેવા બેટ્સમેનોની વિકેટ લેવા માંગશે, જેઓ તાજેતરના સમયમાં ફોર્મમાં ચાલી રહ્યા છે.
હાર્દિક પંડ્યા
આ ઓલરાઉન્ડરની હાજરી જ ભારતીય ટીમમાં નવો જોશ અને ઉત્સાહનો સંચાર કરે છે. હાર્દિક આ મેચમાં બેટ અને બોલ બંનેથી શાનદાર પ્રદર્શન કરવા માંગશે. હાર્દિક અગાઉ પણ પાકિસ્તાન સામે પોતાના ઓલરાઉન્ડ પ્રદર્શનથી મેચનો પાસો પલટી ચૂક્યો છે.
શાહીન આફ્રિદી
આ ફાસ્ટ બોલર નવા બોલ સાથે ભારત માટે સૌથી મોટો ખતરો બની શકે છે. તેનું મુખ્ય લક્ષ્ય ભારતના ઓપનરોને ઝડપથી આઉટ કરવાનું રહેશે. અભિષેક શર્મા અને શુભમન ગિલે આ બોલર સામે સાવધાનીપૂર્વક રમવું પડશે. જોકે, શુભમન શાહીન સામે ઝડપી રન બનાવવાનું પસંદ કરે છે. શુભમને ક્રિકેટ વર્લ્ડ કપ 2023માં શાહીનની ખૂબ ધુલાઈ કરી હતી.
સૈમ અયુબ
પાકિસ્તાનનો આ ઓપનિંગ બેટ્સમેન પાવરપ્લેમાં ભારતીય બોલરોને ચોંકાવી શકે છે. અયુબ પણ આક્રમક ક્રિકેટ રમવા માટે પણ જાણીતો છે. તે ઓમાન સામેની મેચમાં પોતાનું ખાતું ખોલી શક્યો ન હતો. પરંતુ તેણે સ્પિન બોલિંગથી તેની ભરપાઈ કરી હતી. તેણે ઓમાનના બંને ઓપનરોને આઉટ કર્યા હતા.
મોહમ્મદ હારિસ
ઓમાન સામેની મેચમાં પાકિસ્તાની ટીમની શરૂઆત સારી નહોતી રહી, ત્યારબાદ વિકેટકીપર બેટ્સમેન મોહમ્મદ હારિસે ઝડપથી રન બનાવીને ટીમને સંકટમાંથી બહાર કાઢી હતી. હારિસે તે મેચમાં 66 રન બનાવ્યા હતા. જો મિડલ ઓવરોમાં તેણે સારું પ્રદર્શન કર્યું તો પાકિસ્તાનનો સ્કોર ઝડપથી વધી શકે છે.
સલમાન અલી આગા
અનુભવી બેટ્સમેન અને ટીમના કેપ્ટન સલમાન આગા આ મેચમાં ફિનિશરની ભૂમિકા ભજવી શકે છે. સલમાને પહેલી મેચમાં કંઈ ખાસ પ્રદર્શન નહોતું કર્યું, પરંતુ તે આ શાનદાર મેચ સાથે ફોર્મમાં વાપસી કરવા માગશે. સલમાન એક શાનદાર પાર્ટ-ટાઈમ સ્પિનર પણ છે, જે પાકિસ્તાની ટીમ માટે એક પ્લસ પોઈન્ટ છે.
સુફિયાન મુકીમ
આ ચાઇનામેન બોલરને એશિયા કપમાં પાકિસ્તાન માટે એક્સ-ફેક્ટર માનવામાં આવે છે. તેની સ્પિન ભારતીય બેટ્સમેન સામે મેચ પલટાવી શકે છે. સુફિયાન મુકીમ પહેલીવાર ભારત સામે આંતરરાષ્ટ્રીય મેચમાં ભાગ લેવા જઈ રહ્યો છે. આવી સ્થિતિમાં ભારતીય બેટ્સમેન માટે તેનો સામનો કરવો સરળ રહેશે નહીં.
