બુમરાહ ફાસ્ટ બોલિંગનો ડૉન બ્રેડમેન છે, ઓસ્ટ્રેલિયાના દિગ્ગજ ખેલાડીનું મોટું નિવેદન

Adam Gilchrist on Jasprit Bumrah: IPL 2025 માં, જસપ્રીત બુમરાહ ઈજાને કારણે શરૂઆતની 4 મેચ રમી શક્યો ન હતો. તેણે મુંબઈ ઇન્ડિયન્સની પાંચમી મેચમાં વાપસી કરી અને ત્યારથી તેણે ધૂમ મચાવી. બુમરાહ આગમનથી, મુંબઈની ટીમે 7 માંથી 6 મેચ જીતી છે. તેમજ બુમરાહે 12 વર્ષ પછી રાજસ્થાન રોયલ્સને તેમના હોમ ગ્રાઉન્ડ પર હરાવવામાં પણ મહત્ત્વપૂર્ણ ભૂમિકા ભજવી હતી. 

એડમ ગિલક્રિસ્ટે બુમરાહને બોલિંગનો બ્રેડમેન ગણાવ્યો

1 મેના રોજ રમાયેલી આ મેચમાં તેણે 3.8 ની ઇકોનોમીથી 4 ઓવરમાં માત્ર 15 રન આપ્યા અને 2 વિકેટ લીધી. ઓસ્ટ્રેલિયન દિગ્ગજ ખેલાડી એડમ ગિલક્રિસ્ટ પણ બુમરાહની ઘાતક બોલિંગ જોઈને આશ્ચર્યચકિત થઈ ગયા છે. તેમણે બુમરાહને બોલિંગનો બ્રેડમેન ગણાવ્યો છે.

બુમરાહના વખાણમાં ગિલક્રિસ્ટે શું કહ્યું?

જસપ્રીત બુમરાહના પ્રભાવને લઈને ભૂતપૂર્વ ઓસ્ટ્રેલિયન વિકેટકીપર અને કોમેન્ટેટર એડમ ગિલક્રિસ્ટે બોલિંગમાં બુમરાહની તુલના મહાન બેટ્સમેન ડૉન બ્રેડમેન સાથે કરી. ક્રિકબઝ પર રાજસ્થાન રોયલ્સ અને મુંબઈ ઇન્ડિયન્સ વચ્ચેની મેચનું એનાલિસિસ કરતી વખતે, તેમણે કહ્યું, 'તે કદાચ અત્યાર સુધીનો બેસ્ટ ફાસ્ટ બોલર છે. જ્યારે તમે આંકડા અને વિવિધ પરિસ્થિતિઓ જુઓ છો જેમાં તેને પોતાનું કૌશલ્ય દર્શાવવું પડે છે, ત્યારે મને લાગે છે કે જો તમે સર ડૉનાલ્ડ બ્રેડમેનના આંકડાની તુલના તેમના સાથી ખેલાડીઓ સાથે કરો છો, તો તે તેમનાથી ઘણા આગળ છે. બુમરાહ પણ આ જ કેટેગરીમાં આવે છે. તે કોઈપણ પરિસ્થિતિ અને પિચમાં તેના સાથી ખેલાડીઓથી ઘણા આગળ છે.'

IPL 2025 માં બુમરાહનું અદ્ભુત પ્રદર્શન 

IPL 2025 માં પ્રવેશ્યા પછી, જસપ્રીત બુમરાહ પ્રથમ બે મેચ દરમિયાન ફોર્મમાં દેખાઈ શક્યો ન હતો. બેંગ્લોર અને દિલ્હી સામે, તે ફક્ત 1 વિકેટ લઈ શક્યો અને 8 ઓવરમાં 73 રન આપ્યા. પરંતુ આ પછી તે એક અલગ બોલર તરીકે દેખાયો છે. છેલ્લી બે મેચમાં, બુમરાહે તેની 8 ઓવરમાં માત્ર 37 રન આપીને 6 વિકેટ લીધી છે.

આ પણ વાંચો: VIDEO : ગુજરાત-હૈદરાબાદની મેચમાં માથાકૂટ, શુભમલ ગિલ બે વખત અમ્પાયર્સ પર બગડ્યો

IPL 2025 માં, તેણે અત્યાર સુધીમાં 7 મેચમાં 69 ડોટ બોલ ફેંક્યા છે. એટલે કે દરેક મેચમાં, તે 24 માંથી લગભગ 10 ડોટ બોલ ફેંકી રહ્યો છે. ખલીલ અહેમદ અને જોશ હેઝલવુડ જ બે એવા બોલર છે જે ડોટ બોલના મામલે તેનાથી આગળ છે. જ્યારે બુમરાહે પ્રતિ ઓવર માત્ર 6.96 રન આપ્યા છે. બુમરાહે આ સિઝનમાં 7 મેચમાં 11 વિકેટ લીધી છે.