15 વર્ષના વૈભવ સૂર્યવંશીએ એશિયન ગેમ્સમાં રચ્યો ઈતિહાસ: જે કોઈ ભારતીય ન કરી શક્યું તે કરી બતાવ્યું!

Vaibhav Suryavanshi Creates Asian Games History: 2026 એશિયન ગેમ્સમાં ભારતીય પુરુષ ક્રિકેટ ટીમે કટ્ટર હરીફ પાકિસ્તાનને ફાઇનલમાં 19 રને હરાવીને ગોલ્ડ મેડલ પોતાને નામે કરી લીધો છે. ટીમ ઇન્ડિયાની આ ઐતિહાસિક જીત સાથે 15 વર્ષીય યુવા ક્રિકેટર વૈભવ સૂર્યવંશીએ એક એવો મોટો કીર્તિમાન સ્થાપિત કર્યો છે, જે અગાઉ એશિયન રમતોમાં કોઈ પણ ભારતીય ખેલાડી કરી શક્યો નથી.

સૌરભ ચૌધરીનો રેકોર્ડ તોડીને રચ્યો નવો ઇતિહાસ

સૌથી યુવા ગોલ્ડ મેડલિસ્ટ: 3 ઓક્ટોબરે જ્યારે ભારતીય ટીમે પાકિસ્તાનને પરાજય આપ્યો, ત્યારે વૈભવ સૂર્યવંશીની ઉંમર 15 વર્ષ અને 190 દિવસ હતી. આ સાથે જ તે એશિયન ગેમ્સના ઇતિહાસમાં સુવર્ણ ચંદ્રક જીતનારો ભારતનો સૌથી નાની વયનો એથ્લેટ બની ગયો છે.

સૌરભ ચૌધરીનો રેકોર્ડ ધ્વસ્ત: આ અગાઉ આ રેકોર્ડ ભારતીય સ્ટાર શૂટર સૌરભ ચૌધરીના નામે હતો, જેમણે 2018 જકાર્તા એશિયન ગેમ્સમાં 16 વર્ષની વયે 10 મીટર એર પિસ્તોલ સ્પર્ધામાં ગોલ્ડ મેડલ જીત્યો હતો.

ઓવરઓલ મેડલ યાદી: એશિયન ગેમ્સમાં કોઈપણ મેડલ જીતનારા સૌથી યુવા ભારતીય તરીકેનો રેકોર્ડ સંજના ભાતુલાના નામે છે, જેમણે 2022 એશિયન ગેમ્સમાં 15 વર્ષ, 3 મહિના અને 11 દિવસની ઉંમરે સ્પીડ સ્કેટિંગમાં બ્રોન્ઝ મેડલ જીત્યો હતો. આ ઉપરાંત સ્ક્વોશ પ્લેયર અનાહત સિંહે પણ 15 વર્ષ, 6 મહિના અને 16 દિવસની વયે મહિલા સ્ક્વોશ ટીમ સાથે બ્રોન્ઝ મેડલ મેળવ્યો હતો. જોકે, ગોલ્ડ મેડલ જીતવાના મામલે વૈભવ ભારતનો સૌથી યુવા ખેલાડી બની ચૂક્યો છે.

ફાઇનલ મેચનો રોમાંચ: ભારતે પાકિસ્તાનને હરાવ્યું

• ભારતની પ્રથમ બેટિંગ: મેન્સ ક્રિકેટની ફાઇનલ મેચમાં ભારતીય ટીમે પ્રથમ બેટિંગ કરતાં 211 રનનો વિશાળ સ્કોર ખડક્યો હતો.
• ટોપ સ્કોરર્સ: ટીમ તરફથી અભિષેક શર્માએ 61 રન અને તિલક વર્માએ 51 રનની આક્રમક ઇનિંગ રમી હતી, જ્યારે વૈભવ સૂર્યવંશી 9 બોલમાં 15 રન બનાવીને આઉટ થયો હતો.
• પાકિસ્તાનની ઇનિંગ્સ: ટાર્ગેટનો પીછો કરવા ઊતરેલી પાકિસ્તાન ટીમ તરફથી હસન નવાઝે 96 રનની લડાયક ઇનિંગ રમી હોવા છતાં તેમની ટીમ 19 રનથી હારી ગઈ હતી અને પાકિસ્તાનને સિલ્વર મેડલથી સંતોષ માનવો પડ્યો હતો.