લોકપ્રિય મેસેજિંગ પ્લેટફોર્મ વોટ્સએપમાં કોઈને મેસેજ મોકલવા માટે તેમનો મોબાઈલ નંબર હોવો ફરજિયાત છે. કોઈને વોટ્સએપ મેસેજ મોકલવા પર યુઝરનો વોટ્સએપ નંબર આપમેળે શેર થઈ જાય છે જેનાથી ઘણીવાર યુઝર્સ હેરાન પણ થતા હોય છે. હવે વોટ્સએપે તેનાથી સંબંધિત વધુ સારી પ્રાઈવેસી આપવાની દિશામાં પગલાં લીધાં છે. હવે મેસેજ મોકલતા યુઝર્સના મોબાઇલ નંબરને બદલે તેમના 'યુઝરનેમ' બતાવવામાં આવશે.

ડેવલપમેન્ટ મોડમાં છે વોટ્સએપનું નવું ફીચર

નવું વોટ્સએપ ફીચર હાલ ડેવલપમેન્ટ મોડમાં છે. હાલમાં જેમ યુઝર્સ તેમના ઇન્સ્ટાગ્રામ અથવા ટ્વિટર એકાઉન્ટ માટે યુઝરનેમ પસંદ કરે છે, તેમ તેમણે વોટ્સએપ માટે પણ યુનિક યુઝરનેમ બનાવવું પડશે. આ યુઝરનેમ આગામી દિવસોમાં કોન્ટેક્ટ નંબરની જગ્યાએ દેખાશે અને વોટ્સએપ પર કોઈને મેસેજ કરવા માટે તેમના ફોન નંબરની જરૂર નહીં પડે. વોટ્સએપ અપડેટ્સ અને નવા ફીચર પર નજર રાખનાર પ્લેટફોર્મ WABetaInfoએ અહેવાલ આપ્યો છે કે લેટેસ્ટ એન્ડ્રોઇડ બીટા બિલ્ડમાં નવા ફેરફારો સૂચવવામાં આવ્યા છે. એન્ડ્રોઇડ વર્ઝન 2.23.11.15 માટે લેટેસ્ટ વોટ્સએપ બીટા માટે ગૂગલ પ્લે સ્ટોર પર અપડેટથી આ બિલ્ડમાં એક મોટું ફીચર સામે આવ્યું છે. વોટ્સએપ પર એપ સેટિંગ્સમાં ટૂંક સમયમાં નવું યુઝરનેમ મેનૂ દેખાઈ શકે છે.

યુઝરનેમ સેટ કરવાનો ઓપ્શન એપ સેટિંગ્સમાં અપાશે

યુઝર્સને પોતાનું યુઝરનેમ સેટ કરવાનો ઓપ્શન એપ સેટિંગ્સમાં આપવામાં આવશે, જેની મદદથી તેઓ અન્ય યુઝર્સ સાથે કનેક્ટ થઈ શકશે. આ યુઝરનેમ ચેટિંગ એપ પર ઓળખ તરીકે કામ કરશે અને તેનાથી સંબંધિત સેટિંગ્સને પ્રોફાઈલ સેક્શનનો ભાગ બનાવી શકાય છે. હાલમાં યુઝર્સને તેમનું નામ, પ્રોફાઇલ ફોટો અથવા એક્ટિવ સ્ટેટસ બદલવાનો ઓપ્શન આપવામાં આવે છે. જેનો નંબર સેવ નથી તે યુઝર દ્વારા આપવામાં આવેલ નામ, નંબર સાથે બાકીના કોન્ટેક્ટ્સને જોઈ શકાય છે.

મોબાઈલ નંબર પરની નિર્ભરતા થઇ જશે સમાપ્ત

નવું યુઝરનેમ પસંદ કર્યા બાદ વોટ્સએપ યુઝર્સની મોબાઈલ નંબર પરની નિર્ભરતા સંપૂર્ણપણે સમાપ્ત થઈ જશે. વોટ્સએપ માત્ર કોન્ટેક્ટ આઇડેન્ટિફિકેશન માટે ફોન નંબરની મદદ લેશે પરંતુ તેને અન્ય યુઝર્સ સાથે શેર કરવામાં આવશે નહીં. એપ પર ફોન નંબરની જગ્યાએ યુઝરનેમ બતાવવામાં આવશે અને આ યુઝરનેમની મદદથી માત્ર કોઈની સાથે ચેટિંગ શરૂ કરી શકાશે. જો કે, વોટ્સએપ પર યુઝરનેમ સાથે સંબંધિત સિસ્ટમ કેવી રીતે કામ કરશે તેની સાથે સંબંધિત બાકીની માહિતી આગામી થોડા અઠવાડિયામાં જાહેર થઈ શકે છે.