GTA 6 રમવા સેના આપશે 4 દિવસની રજા! યુએસ આર્મીની અનોખી ઓફર, પણ પૂરી કરવી પડશે આ 1 શરત

Reenlist Now, Game On Later: જો તમે કામની ચિંતા કર્યા વિના 'Grand Theft Auto VI' (GTA VI) રમવા માંગો છો, તો અમેરિકી સેનાએ પોતાના જવાનો માટે એક અનોખી પહેલ શરૂ કરી છે. જ્યોર્જિયા સ્થિત ફોર્ટ સ્ટુઅર્ટ ખાતે તૈનાત US આર્મીનું એક બટાલિયન પોતાના સૈનિકોને લશ્કરમાં ચોક્કસ તારીખ સુધીમાં પુનઃ ભરતી થવા બદલ 4 દિવસની વધારાની રજા આપી રહ્યું છે. આ ખાસ રજાની તારીખો ગેમના લોન્ચિંગ સમય સાથે મેળ બેસાડીને નક્કી કરવામાં આવી છે, જેથી સૈનિકો આરામથી ગેમિંગની મજા માણી શકે.

સૈનિકોને સેવામાં જાળવી રાખવા પોપ કલ્ચરનો સહારો

એક અહેવાલ અનુસાર, 9th બ્રિગેડ એન્જિનિયર બટાલિયન દ્વારા આ ઓફર રજૂ કરવામાં આવી છે. રોકસ્ટાર ગેમ્સ દ્વારા GTA VI આગામી 19 Novemberના રોજ રિલીઝ થવા જઈ રહી છે, જેને મનોરંજન જગતનું આ વર્ષનું સૌથી મોટું લોન્ચિંગ માનવામાં આવે છે. આ ખાસ પ્રોત્સાહક યોજના આર્મીના કરિયર કાઉન્સિલર દ્વારા પ્રસ્તાવિત કરવામાં આવી હતી અને બટાલિયન કમાન્ડરો સાથે મળીને તેને મંજૂરી અપાઈ હતી, જેથી જવાનો પોતાની પુનઃ ભરતી અંગે ઝડપથી નિર્ણય લઈ શકે.

ફોર્ટ સ્ટુઅર્ટના પ્રવક્તા લેફ્ટનન્ટ કર્નલ એન્જલ ટોમકોએ જણાવ્યું હતું કે આ વિચાર સૈનિકોના અંગત રસ અને શોખને ધ્યાનમાં રાખીને તૈયાર કરવામાં આવ્યો છે. સૈનિકો જે બાબતોમાં રસ ધરાવે છે તેની સાથે સેનાના પ્રોત્સાહનોને જોડવાનો આ એક અનોખો પ્રયાસ છે.

2 વર્ષ વધુ સેવા આપવાની શરત અને સારો પ્રતિસાદ

બટાલિયન કમાન્ડર લેફ્ટનન્ટ કર્નલ રાયન હોજસન દ્વારા જારી કરાયેલા એક મેમો મુજબ, જે સૈનિકો 14 November સુધીમાં રી-એનલિસ્ટમેન્ટ કોન્ટ્રાક્ટ સાઈન કરશે, તેમને આ "સ્પેશિયલ 4-ડે પાસ" આપવામાં આવશે. રાયન હોજસને નોંધ્યું હતું કે આ પાસ ખાસ કરીને મોસ્ટ-અવેઈટેડ વીડિયો ગેમ GTA VIના રિલીઝ સાથે મેળ રાખીને જ ડિઝાઇન કરાયો છે.

28 Julyના આ સત્તાવાર મેમોનો ફોટો સોશિયલ મીડિયા પર વાયરલ થયો હતો, જેની અધિકૃતતા પ્રવક્તાએ સ્વીકારી છે. આ ઓફર માટે લાયક એવા કુલ 130 સૈનિકોમાંથી ઓછામાં ઓછા 20 જવાનોએ આ ઓફર સ્વીકારીને કરાર પર હસ્તાક્ષર પણ કરી દીધા છે. આ યોજનાનો લાભ લેવા માટે સૈનિકોએ સેનામાં ઓછામાં ઓછા વધુ 2 વર્ષ સેવા આપવા માટે સંમતિ દર્શાવવી ફરજિયાત છે.

સમગ્ર વિશ્વમાં GTA VIનો ભારે ક્રેઝ

ગેમિંગ જગતમાં GTA VIને લઈને ભારે ઉત્સાહ જોવા મળી રહ્યો છે. આ ગેમ ખેલાડીઓને ફરી એકવાર કાલ્પનિક શહેર વાઇસ સિટી (મિયામીનું વ્યંગાત્મક વર્ઝન)માં લઈ જશે, જેમાં ફ્લોરિડા પ્રેરિત સ્થળો અને મગરમચ્છોથી ભરેલા દળદળીયા વિસ્તારો પણ સામેલ હશે. વર્ષ 2023માં રિલીઝ થયેલા ગેમના પ્રથમ સિનેમેટિક ટ્રેલરે દુનિયાભરમાં ભારે ઉત્સુકતા જગાવી હતી.

ટેક-ટુ ઇન્ટરેક્ટિવના CEO સ્ટ્રોસ ઝેલનિકના જણાવ્યા અનુસાર, ગેમ માટે પ્રી-ઓર્ડરની માંગ "અભૂતપૂર્વ અને આશ્ચર્યજનક" રહી છે, જોકે કંપનીએ હજુ ચોક્કસ આંકડા જાહેર કર્યા નથી. રોકસ્ટાર ગેમ્સ આવતા અઠવાડિયે નેટફ્લિક્સ પર એક વિસ્તૃત ટ્રેલર સાથે વધુ ગેમપ્લે ફૂટેજ રજૂ કરવાની તૈયારીમાં છે, જોકે હેકર્સે તાજેતરમાં કેટલીક ફૂટેજ લીક કરીને કંપનીના પ્લાનિંગમાં થોડો ખલેલ જરૂર પહોંચાડ્યો છે.