સહિયર સમીક્ષા .

- હું 21 વર્ષની છું. ઘરમાં મારા પિતા અને ભાઇ-ભાભી છે. પરંતુ કોઈ મારા તરફ ધ્યાન  આપતું નથી. મારા લગ્નની કોઈને ચિંતા નથી. 

હું ૨૦ વરસની છું અને મારી સમસ્યા એ છે કે ચોકલેટ કે બિસ્કિટ જોઈને હું મારી જાતને રોકી શકતી નથી અને વધુ પડતા ખાઈ લઉં છું. આ આદતથી મુક્તિ મેળવવા માટે શું કરવું જોઈએ?

એક યુવતી (મુબઈ)

મોટે ભાગે વધુ પડતા ખાવા પાછળ કોઈ બીજું જ કારણ હોય છે. મોટે ભાગે આ પાછળ કોઈ એક પ્રકારનું ડિપ્રેશન કામ કરી જાય છે અને ચોકલેટ કે બિસ્કિટ જેવી વસ્તુઓ ખાધા પછી તેમનો મૂડ સુધરે છે. આથી તમને કયું કારણ પરેશાન કરે છે એ જાણવાનો પ્રયત્ન કરો. એ પછી તમે તમારી જાતને ફીટ રાખવા માટે કોઈ વ્યાયામ નક્કી કરી શકો છો. આ સમસ્યા દૂર કરવા માટે તમે કોઈ મનોચિકિત્સકની સલાહ લઈ શકો છો. મૂળ કારણ શોધ્યા વિના એનો ઉપાય શક્ય નથી. પરંતુ તમારે તમારા જીવનમાં થોડી શિસ્ત લાવવાની જરૂર છે.

હું ૨૫ વરસની છું. મારે મારા નિતંબ અને જાંઘ સુદ્રઢ બનાવવા છે. મસ્ક્યુલર લાગે નહીં એ રીતે શરીરના આ ભાગ સુદ્રઢ બનાવવા માટે મારે  શું કરવું જોઈએ?

એક યુવતી (સુરત)

સ્થૂળ નિતંબ અને જાંઘની સમસ્યા મોટાભાગની યુવતીઓને પરેશાન કરે છે. કારણ કે શરીરના અન્ય ભાગો કરતા આ ભાગોમાં ઝડપથી  મેદ જમા થઈ જાય છે. એરોબિક્સ, વોકિંગ, સ્વિમિંગ, જોગિંગ તેમ જ સાયકલિંગ જેવા વ્યાયામ તમને ઉપયોગી થઈ શકે તેમ છે. આ ઉપરાંત તમારે તમારા આહારમાંથી ચરબી વધારે એવા પદાર્થોનું સેવન મર્યાદિત કરવાની જરૂર છે. શરીર ચુસ્ત અને ફીટ રાખવા માટે વ્યાયામ અને આહાર નિયંત્રણ શ્રેષ્ઠ ઉપાય છે. તમે તમારા ઘરની નજીક આવેલા કોઈ જીમ્નેશિયમમાં પણ નામ નોંધાવી શકો છો. 

મારા લગ્ન થયે ચાર વરસ થયા છે. મને ત્રણ વરસનો એક પુત્ર છે. મારી સમસ્યા એ છે કે હું સંયુક્ત પરિવારમાં રહું છું અને મારા સાસુ-સસરા મારા પુત્રને ઘણા લાડ કરે છે. હું તેને શિસ્તમાં રાખવાનો પ્રયાસ કરું છું તો હું એની અળખામણી બનું છું. મારો પુત્ર તેમને પજવે તો તેને વઢવા માટે મારા સાસુ-સસરા મને બોલાવે છે. આમ હું તેની નજરમાં 'ખરાબ' બની ગઈ છું. મારે શું કરવું તે સમજતું નથી. યોગ્ય સલાહ આપશો.

એક બહેન (ગુજરાત)

દાદા-દાદી તેમના સંતાનોના સંતાનોને વહાલ કરે એ સામાન્ય છે. આપણામાં કહેવત છે કે વ્યાજ કરતા ચક્રવૃદ્ધિ વ્યાજ વધુ વહાલું હોય છે. તમારા સાસુ-સસરા તમારા પુત્રને લાડ કરે છે એ વાતે તમારે દુ:ખી થવાની જરૂર નથી. સંતાનના ઉછેર મારે તમને તેમની મદદ મળે છે. એ વાતનો આનંદ માણો અને તમને મળતો ફૂરસદના સમયનો તમને મનગમતી પ્રવૃત્તિમાં ઉપયોગ કરો. સાથે સાથે સંતાનને શિસ્તમાં રાખવા એ પણ જરૂરી છે. તેને વઢ્યા વિના તેની મનપસંદ  પ્રવૃત્તિમાં તેને સાથ આપો. બળથી નહીં પણ કળથી કામ લો અને તેને પ્રેમથી સમજાવવાનો  પ્રયાસ કરો. તમારો પુત્ર હજુ કુમળું ઝાડ છે. તમે જેમ વાળશો એમ વળશે. તેને મારો નહીં. તમારા સાસુ-સસરાને સમજાવો કે તેમના આ વર્તનથી તમારા પુત્ર સાથેના તમારા સંબંધ પર અસર થાય છે. બાળકને શિસ્તનું મહત્ત્વ સમજાવવા માટે તમે તમારા પતિની મદદ પણ લઈ શકો છો.

હું ૨૧ વર્ષની છું. ઘરમાં મારા પિતા અને ભાઇ-ભાભી છે. પરંતુ કોઈ મારા તરફ ધ્યાન  આપતું નથી. મારી મોટી બહેનના લગ્ન થઈ ગયા છે. પરંતુ મારા લગ્નની કોઈને ચિંતા નથી. મારી મોટી બહેનને સાસરામાં ત્રાસ હોવાથી મને પણ લગ્ન કરવાનો ડર લાગે છે. કોઈ વાર આત્મહત્યા કરવાનો પણ વિચાર આવે છે. શું કરવું તે સમજાતું નથી. યોગ્ય સલાહ આપવા વિનંતી.

એક યુવતી (સંજાણ)

સમસ્યાઓથી દૂર ભાગવું અથવા આત્મહત્યાનો વિચાર કરવો એ કાયરતાની નિશાની છે. આથી મનમાંથી આ વિચાર દૂર કરો. જિંદગીમાં ચઢાવ-ઉતાર તો આવ્યા જ કરે છે. એનાથી ગભરાવું જોઈએ નહીં. આ પારિવારિક સમસ્યાઓમાંથી બચવા માટે સૌ પ્રથમ તો કોઈ નોકરી શોધીને આર્થિક રીતે પગભર બનો. પરિવારના કોઈ સમજુ  સભ્યને તમારા મનની વાત કરો. તમારી જાતે તમારો જીવનસાથી શોધો. તમારી બહેનને સાસરામાં ત્રાસ છે એટલે તમને પણ ત્રાસ પડશે એમ માનવાની જરૂર નથી.  કોઈ રસ્તો જરૂર મળી આવશે.

- નયના