સહિયર સમીક્ષા .

- મારી ઉંમર 17 વર્ષની છે. મને એ જ ઉંમરના એક યુવક સાથે પ્રેમ છે. એ યુવક પણ મને પ્રેમ કરે છે. પરંતુ તે વાત-વાતમાં ગુસ્સે થઈ જાય છે. મારી એક પણ વાત માનવા તૈયાર નથી. 

મારા લગ્ન થયે ૨ વર્ષ થયા છે. મને ૯ મહિનાનો પુત્ર છે. મારી સમસ્યા એ છે કે મારા પતિ હંમેશા મારી તુલના તેમની મમ્મી અને બહેનો સાથે કરે છે. તેઓ મને હંમેશા ટોણા માર્યા કરે છે કે  તેમની મમ્મીએ તેમને માટે પોતાની જાતનું બલિદાન આપ્યું છે. આથી તેમને મન મારા કરતા તેમની મમ્મીની કિંમત વધુ છે. આ ઉપરાંત તેઓ શારીરિક રીતે પણ મને સંતોષી શકતા નથી. સેક્સ દરમિયાન જ તેઓ  મારી નજીક આવે છે ત્યાર પછી તેઓ મારી સાથે વાત પણ કરતા નથી. હું ઘણી દુ:ખી છું. યોગ્ય માર્ગદર્શન આપવા વિનંતી.

એક યુવતી (મહેસાણા)

* આપણા સમાજમાં આ વાત સામાન્ય છે. ઘણા પતિઓ તેમની પત્નીની સરખામણી તેમની માતા તેમજ બહેનો સાથે કરે છે. તમારે આ વાતનો સ્વીકાર કરવો જ રહ્યો. તમે અલગ રહેતા હો તો થોડો વખત તમારા સાસુ-સસરા સાથે રહી તમારી સાસુ પાસેથી તમારા પતિના ગમા-અણગણમાં વિશે જાણી લો. તેમની નીંદા કરવાને બદલે તેમની પાસે શીખવાનું રાખો. તમે એમની સાથે મિત્રતા બાંધશો તો તમારા પતિ આ આપોઆપ તમારી નજીક આવશે. શારીરિક સંબંધોની તૃપ્તિ માટે થોડી ધીરજ ધરો. એકબીજાને કેવી રીતે ખુશ કરવા એ જાણવામાં પતિ-પત્નીને થોડો સમય લાગે છે. આ દરમિયાન કોઈ પ્રવૃત્તિમાં મન વાળવાનો પ્રયાસ કરો.

મારી ઉંમર ૧૫ વર્ષની છે. મને ૧૯ વર્ષના એક યુવક સાથે પ્રેમ છે. પરંતુ મારી ખાસ સહેલી પણ એ યુવકના પ્રેમમાં છે. મારો પ્રેમી પણ અમને બંનેને પ્રેમ કરે છે. બંનેમાંથી એકની પસંદગી કરવા તૈયાર નથી. હું તેને ભૂલી શકું તેમ નથી. યોગ્ય સલાહ આપવા વિનંતી.

એક યુવતી (મુંબઈ)

* પ્રેમ માટે તમારી ઉંમર ઘણી નાની છે. હાલમાં તમે અભ્યાસમાં ધ્યાન પરોવો એમાં જ તમને લાભ છે. આ યુવક તમારી ભાવના સાથે ચેડાં કરી રહ્યો છે. મારી સલાહ તો એ છે કે શક્ય હોય એટલી જલદી આ યુવક સાથેના તમામ સંપર્કો કાપી નાખો. તમારા બંનેમાંથી કોઈ પણ એક સાથે આ યુવક પરણશે નહીં એ વાત પણ લખી રાખજો.

મારી ઉંમર ૧૭ વર્ષની છે. મને એ જ ઉંમરના એક યુવક સાથે પ્રેમ છે. એ યુવક પણ મને પ્રેમ કરે છે. પરંતુ તે વાત-વાતમાં ગુસ્સે થઈ જાય છે. મારી એક પણ વાત માનવા તૈયાર નથી. કેટલીક વાર તે મને મારે પણ છે. આ ઉપરાંત હું તેની સાથેના સંબંધો તોડી નાખીશ તો તે મારી જિંદગી બરબાદ કરી નાખશે એવી મને ધમકી આપે છે. શું કરવું એની સમજ પડતી નથી. યોગ્ય સલાહ આપવા વિનંતી.

એક યુવતી (વડોદરા)

* મારી સલાહ તો એ છે કે આ યુવક સાથેના તમામ સંપર્ક કાપી નાખો. તમારા વડીલોને વાત કરી આ યુવકથી છૂટકારો મેળવો. તેની ધમકી વિશે પણ તમારા માતા-પિતાને જાણ કરો. આ ઉપરાંત તેના માતા-પિતાને પણ તેને સમજાવવા કહો. વડીલોની સલાહથી તમારી આ સમસ્યાનું નિરાકરણ જરૂર મળી જશે એવી મને આશા છે.

હું ૨૦ વર્ષની છું. મેં બી.કોમ. કર્યું છે. મને માર્કેટિંગમાં ઘણો રસ છે. અંગ્રેજી ભાષામાં પણ મારું પ્રભુત્વ છે. પરંતુ અજાણ્યા સાથે વાત કરતા મને સંકોચ થાય છે. આ ક્ષેત્ર પુરુષ પ્રધાન હોવાનું પણ મેં સાંભળ્યું છે. મારા માતા-પિતા પણ હું ક્ષેત્ર બદલું એમ ઈચ્છે છે. મારે શું કરવું એની સલાહ આપવા વિનંતી.

એક યુવતી (સુરત)

* માર્કેટિંગમાં કારકિર્દી બનાવવી હશે તો તમારે શરમ અને સંકોચ છોડી દેવો પડશે. તમારે પબ્લિક સ્પિકિંગ અથવા કોમ્યુનિકેશનના કોર્સ કરવાની જરૂર છે. હા, માર્કેટિંગ ક્ષેત્ર માત્ર પુરુષોની જ જાગીર નથી. આ ક્ષેત્રમાં સ્ત્રીઓ પણ સફળ થઈ છે. કેટલીક કંપનીઓમાં તો મહિલા કર્મચારીઓનો જ આગ્રહ રાખવામાં આવે છે.

મારી ઉંમર ૨૨ વર્ષની છે. મારું માસિક સામાન્ય છે. પરંતુ આ સમયે મને સ્ત્રાવ પણ થાય છે જે ઝાંખા ચોકલેટી જેવા રંગનો હોય છે. તેમાંથી દુર્ગંધ પણ આવે છે. યોગ્ય ઉપચાર જણાવવા વિનંતી.

એક યુવતી (મહેમદાવાદ)

* તમારે સમય ન ગુમાવતા કોઈ સારા ગાયનોકોલોજીસ્ટને બતાવવાની જરૂર છે. તમારે સંપૂર્ણ તબીબી તપાસની જરૂર છે. 

- નયના