દાવત : જીભનો ટેસડો પૂરો કરતી વાનગીઓ

મટર ખોયા કોરમા 

 સામગ્રી : ૭૫૦ ગ્રામ વટાણા, ૨૫૦ ગ્રામ માવો, ૧ કપ બારીક કરેલી, કોથમીર, ચપટી ખાવાનો સોડા, ૧ ચમચી તાજું શેકેલું ધાણાજીરું, પ્રમાણસર મીઠું, ૧ ચમચી લાલ મરચું, ૧/૨ ચમચી સૂંઠનો ભૂકો, ૧/૨ ચમચી હળદર, ૧/૨ કપ પાણી, ૩ ચમચા ઘી.

 રીત : વટાણાને સહેજ સોડા નાંખી સીજવવા. પાણી નિતારી બાજુ પર રાખવા. ઘી ગરમ કરવું. માવો હાથેથી છૂટો કરી નાંખવો. પાંચ મિનિટ મધ્યમ તાપે હલાવવું. બધો મસાલો નાંખી, ૧/૨ કપ પાણી નાંખવું. વટાણા નાંખવા. કોથમીર નાંખી આપવું.

કોરમા ઉપયોગમાં લેતી વખતે જ બનાવવા. ગરમ પૂરી અથવા પરોઠા સાથે આપવા. બધું તૈયાર રાખવું. માવો તાજો લેવો. ધાણા અને જીરું (૧ ચમચો+ ૧ ચમચી) શેકી ખાંડવું. વટાણાની મોસમ ન હોય તો ફ્રોઝન વટાણાનું પેકેટ લેવું. ઊકળતા પાણીમાં ફ્રોઝન વટાણા મૂકી, દસ મિનિટ ઉકાળી, ઉપયોગમાં લેવા.

મેક્રોની વટાણા કરી

 સામગ્રી :  ૭૫૦ ગ્રામ વટાણા, ૧૦૦ ગ્રામ મેક્રોની, ૨ મધ્યમ કાંદા, ૨ ચમચા ઘી, ૧/૪ ચમચી ખાવાનો સોડા, પ્રમાણસર મીઠું, ૧ કપ મોળું દહીં, ૧ ચમચો ચણાનો લોટ, ૧ કપ પાણી, ૪ કપ પાણી, ૧ ચમચી સાકર. પેસ્ટ : ૧ કપ ખમણેલું લીલું નાળિયેર, ૨ કપ કોથમીર, ૬ લીલાં મરચાં, ૧ ટુકડો આદું, ૫૦ ગ્રામ ચારોળી, ૬ ઇલાયચી, મીઠું, ૧/૨ લીંબુનો રસ, ૧/૨ ચમચી જીરું.

 રીત : વટાણાને ૪ કપ પાણીમાં સોડા નાંખી બાફવા. પાણી સાથે બાજુ પર રાખવા. મેક્રોની રીત પ્રમાણે બાફવી. ઠંડા પાણીમાં રાખવી. કાંદા બારીક કરવા. દહીં, ચણાનો લોટ અને ૧ કપ પાણી ભેગા કરી, સંચો ફેરવી બાજુ પર રાખવું.

ઘી ગરમ કરવું. કાંદા સાંતળવા. પેસ્ટ નાંખી હલાવવું. વટાણા પાણી સાથે નાંખવા. દહીં અને ચણાના લોટવાળું પાણી નાંખવું. મીઠું અને સાકર નાંખવા. ઉકળે પછી મેક્રોની, પાણી નિતારી, નાંખવી. ગરમ આપવી.

મેક્રોની બાફવાની રીત અગાઉ આપી છે. ટુકડા કરી બાફવી. મેક્રોની કરીમાં ઉપયોગમાં લેતી વખતે જ ભેગી  કરવી. ગરમ પૂરી અથવા સફેદ ભાત અગર પરોઠા સાથે સારી લાગશે. સૂકા કાંદાને બદલે ૬ લીલાં કાંદા બારીક કરી ઉપયોગમાં લઇ શકાય. 

બટાટા વટાણા પનીર કરી

સામગ્રી : ૭૫૦ ગ્રામ વટાણા, ૪૦૦ ગ્રામ બટાટા, ૨૫૦ ગ્રામ ટમેટા, ૧/૪ ચમચી ખાવાનો સોડા, ૨ ચમચી ઘી, પ્રમાણસર મીઠું, ૧/૨ ચમચી હળદર, ૩ કપ પાણી, બટાટા તળવા માટે તેલ.

પેસ્ટ : ૧ કપ ખમણેલું લીલું નાળિયેર, ૨ કાંદા બારીક કરેલા, ૭ કળી લસણ, ૨૫ ગ્રામ ચારોળી, ૧ ચમચો ધાણા, ૧ ચમચી જીરું, ૬ કાશ્મીરી લાલ મરચાં, ૬ ઇલાયચી, ૩ ટુકડા તજ, ૫ લવિંગ, ૧/૨ કપ કોથમીર, ૧ ચમચો અનારદાણા, ૧ ટુકડો આદું, ૪ લીલાં મરચાં.

રીત : કોથમીર સિવાય ઉપરનો બધો મસાલો ભેગો કરી, લોખંડના વાસણમાં શેકવો. કોથમીર અને આદું મરચાં નાંખી, પાણી છાંટી, ચટણી વાટવી. (આદું-મરચાં-કોથમીર શેકવા નહીં) વટાણા સોડાના પાણીમાં બાફવા. પાણી સાથે બાજુ પર રાખવા. બટાટા બાફી, ચોરસ ટુકડા કરી, ગરમ તેલમાં ગુલાબી તળવા. ટમેટાને બાફી સૂપ કરવો. ઘી ગરમ મૂકવું. પેસ્ટ નાંખી હલાવવું. ટમેટાનો સૂપ નાંખવો. વટાણા અને તળેલા બટાટા નાંખવા. મીઠું અને હળદર નાંખવા. રસા સાથે આપવું.

ગમે ત્યારે બનાવી રાખી શકાય. આપતી વખતે ગરમ કરવી. ગરમ પરોઠા સાથે સરસ લાગશે. પનીર તળીને નાંખી શકાય.

પાલક પકોડા કરી

 પકોડા - સામગ્રી : ૩/૪ કપ ચણાનો લોટ, ૧ કાંદો બારીક કરેલો, ૧ ચમચો લાલ મરચું, ૧ ચમચી વાટેલાં આદું-મરચાં, ૧/૨ ચમચી મીઠું, ૧ કપ બારીક કરેલી કોથમીર, ૧ ચમચો ગરમ તેલ, પ્રમાણસર પાણી, તળવા માટે તેલ. પકોડાની સામગ્રીમાં જોઈતા પ્રમાણમાં પાણી ભેળવી ગરમ તેલમાં પકોડા ઉતારવા.

 ગ્રેવી : ૩ ઝૂડી પાલક ભાજી, ૨ ચમચા ઘી, ૨ મધ્યમ બારીક કરેલા કાંદા, ૧ ચમચો સાકર (૧ ચમચો આંબલી, ૧ કપ પાણીમાં પલાળવી), ૧/૨ ચમચી મેથીના દાણા. ૧૦ કાજુના ટુકડા કરવા. પ્રમાણસર મીઠું. વાટેલી પેસ્ટ, ૨ કપ પાણી.

 પાલકની રીત પ્રમાણે ચટણી વાટવી. પેસ્ટ : ૧/૨ ખમણેલું લીલું નાળિયેર, ૬ લીલાં મરચાં, ૧ ટુકડો આદું, ૪ લાલ મરચાં, ૧ ચમચો ચણાની દાળ, ૧ ચમચો ધાણા, ૧ ચમચી જીરું, ૧ કપ કોથમીર. 

 રીત : (૧) પાલકને ઝીણી સમારી બાફીને વાટી ચટણી બનાવવી. (૨) ઘી ગરમ કરવું. કાંદા સાંતળવા. મેથી નાંખવી. કાજુના ટુકડા નાંખવા. વાટેલી પેસ્ટ અને પાણી નાંખવું. આંબલીનું પાણી નાખવું. પાલકની ચટણી નાંખવી. બધો મસાલો નાંખી ઉકાળવું. પકોડી મૂકી પાંચ મિનિટ ઉકાળવું. ગરમ આપવું. પકોડા નાના બનાવવા. ગરમ પૂરી અથવા પરોઠા સાથે આપવા.

સ્વીટ એન્ડ સાવર કંકુબર

સામગ્રી : ૧ કિલો કાકડી, ૧૦૦ ગ્રામ કેપ્સીકમ, ૨૫૦ ગ્રામ ટમેટા, ૨ ચમચા રિફાઇન તેલ, ૧ નાનો ટુકડો આદું ખાંડેલું, પ્રમાણસર મીઠું.

સોસ : ૨ ચમચા વિનેગર, ૪ ચમચા, ટેમેટો સૉસ, ૨ ચમચા સાકર, ૧ ચમચી સોયા સૉસ, મીઠું, ૧ ચમચી લાલ મરચું, બધું ભેગું કરી, હલાવી તૈયાર કરવું.

કાકડીની છાલ કાઢી, વચમાંથી કાપવી. એક આંગળી જેટલી લાંબી અને જાડી કાપવી. મરચાંની પાતળી પટ્ટીઓ કાપવી. ટમેટાનો પલ્પ કરવો.

૨ ચમચા તેલ ગરમ મૂકવું. મરચાં અને કાકડી પાંચ મિનિટ સાંતળવા. મીઠું જરા નાખવું. સૉસ અને ખાંડેલું આદું નાંખવા. ઘટ્ટ થાય પછી નીચે ઉતારી તરત જ આપવું.

ચાયનીઝ કકુંબરનું શાક બીજાં બધાં ચાયનીઝ શાકની જેમ ઉપયોગમાં લેવું. તેની સાથે ચાયનીઝ સ્વીટ કોર્ન સૂપ, અમેરિકન ચોપ્સે અને ફ્રાઇડ રાઇસ  એમ આપી શકાય.

કાકડી લાંબી અને જાડી, મોસમમાં મળતી હોય તો તે લેવી નહીંતર ચાલુ કાકડી લીલી છાલની અગર સફેદ  છાલની લેવી. ચીભડાં વાપરવાં નહીં. ચોમાસામાં જાડી કાકડી ઘણી જ સરસ મળે છે. કાકડી જાડી હોય તોે વચમાંથી બી કાઢી ઉપયોગમાં લેવી.

- હિમાની