= બંને એક બીજાની ઈર્ષા કરે છે, તો સુખી કોણ પરણેલા કે કુંવારા?
- મુકેશ મહેતા, સુરત
- છૂટાછેડાવાળા.
= પિતા અને પુત્ર વચ્ચે કેવા સંબંધ હોવા જોઈએ?
- નયનભાઈ પટેલ, ભરૂચ
- ઘર જેવા.
= તમને 'વર્ક ફ્રોમ હોમ' મળે તો તમારી પત્નીનું શું રિએક્શન હોય?
- જયોતિ દેસાઈ, અંકલેશ્વર
- ભયંકર.
= કોની સલાહ લેવાય?
- ક્ષિતિજ જાની, અમદાવાદ
- સાળાની.
= 'જીવ તાળવે ચોંટી ગયો' કહે છે તે તાળવે જ કેમ ચોંટે છે?
- અરુણા સુતવાની, પૂણે
- ડાચું ખુલ્લુ રહી ગયું હોય એટલે ઉપર જ ચોંટે.
= પૈસા કમાવવાની માથાકૂટમાંથી મુક્ત કેવી રીતે થવાય?
- પ્રમિત શાહ, ધોળકા
- કાંડ કરીને અથવા પ્રકાંડ બનીને.
= જીવનમાં ગર્લફ્રેન્ડનું કેટલું મહત્વ છે?
- શૌનક દેસાઈ, સુરત
- જેટલું બટાકા પૌઆમાં કોથમીરનું.
= ચર્ચિલે કહ્યું હતું કે હું દેશનો વહીવટ પિંઢારાઓના હાથમાં સોંપું છું, આજે આ વાત સાચી લાગે છે?
- જ્યોતિષ પાઠક, વડોદરા
- ટીકા કરતાં પહેલાં એ જુઓ કે ચર્ચિલના દેશની હાલત અત્યારે કેવી છે!
= પ્રેમિકા કહે છે કે મોબાઈલ વિના મારો હાથ ખાલી લાગે છે, શું કરું?
- ચેતન ત્રિવેદી, અમદાવાદ
- બીજી શોધો.
= સોળે સાન અને વીસે વાન, તો ચોવીસે શું હોવું જોઈએ?
- પી. એમ. જોષી, નેત્રામલી (ઈડર)
- પાન. પરમેનન્ટ એકાઉન્ટ નંબર.
= વૈતરું એટલે શું?
- પ્રકાશભાઈ મકવાણા, રાજકોટ
- બળદ દ્વારા બૉસે અપાયેલ કામનું કરવું.
= આજકાલ માણસ કેમ બહુ ગરમ થઈ જાય છે?
- ધીરજ રબારી, ડેર, પાટણ
- મગજનું રેડીએટર લીક હશે.
= જો પેટ્રોલ ૫૦૦ રૂપિયે લીટર થઈ જાય તો ગુજરાતી માણસ સૌથી પહેલાં શું કરે?
- યશપાલસિંહ ટી. વાઘેલા, થરા
- સાયકલ બનાવવાની ફેક્ટરી નાખે.
= અમેરિકા-ઇરાન યુધ્ધના લીધે અહીં ટામેટાના ભાવ વધે?
- જીત મહેતા, અમદાવાદ
- કવિ છો તમે?
= તમે દરેક સવાલનો ઉડાઉ જવાબ કેમ આપો છો?
- યોગેશભાઈ આર. જોશી, હાલોલ
- મારો સ્વભાવ થોડોક ઉડાઉ ખરો. બાપુજી કહેતા.
= મારે પેલા તમારી પાસેથી રૂ.૧૦,૦૦૦/- લેવાના બાકી છે તે યાદ છે ને ?
- મમતા વ્યાસ, અમદાવાદ
- અગિયાર દેશોની બેન્કો ઉઘરાણી કરે છે, એવો પરચુરણ ગણવાનો અમારી પાસે ટાઈમ નથી.
= લગ્ન પહેલાના અને બાદના સપનામાં શો ફેર?
- ઘનશ્યામ ભરુચા, વિરાર
- ભય નામના તત્વનો.
= આ પાણીપુરીવાળાને દરેક બહેનો ભૈયા જ કેમ કહેતી હોય છે?
- નેહા સોની, વડોદરા.
- પુરુષો શંકા ન કરે એટલે. હાચ્ચે!
= સરસ બનવું કે સરળ બનવું સારું? - હર્ષદ ચૌધરી, પાલનપુર
- બનવાનું? જેવા છીએ એવા રહેવાનું.
= 'નીટ'માં ચીટ, શું કહેશો એન.ટી.એ.ને?
- ફારૂક દેસાઈ, અમરેલી
- પરીક્ષામાં ફેલ થઈ. નેશનલ ટેસ્ટિંગ એજન્સી.
= સ્ત્રી શા માટે પુરુષ સમોવડી થવા માંગે છે? પુરુષ ક્યાં સ્ત્રી સમોવડીઓ થઈ શકે છે!
- અમિત શૈવ, છોટા ઉદેપુર
- જીન્સ પહેરવા. પુરુષ સાડી પહેરવાની મહેચ્છા નથી ધરાવતો.
