સાયબર કૌભાંડીઓએ આ વખતે ટ્રમ્પના નામે રોકાણકારોને ઉલ્લુ બનાવ્યા

- ટ્રમ્પ હોટલ રેન્ટલ નામથી સ્કીમ ચાલતી હતી

- પ્રસંગપટ

- AI જનરેટેડ વીડિયોમાં ટ્રમ્પ લોકોને રોકાણ કરવાનું કહેતા દર્શાવાયા હતાઃ કરોડોની મૂડી સ્વાહા થઇ ગઈ 

ઓનલાઇન છેતરપીંડી કરનારા બજારનો ટ્રેન્ડ પારખવામાં અને કોના નામનું વધુ ચલણમાં છે તે કળી જઈને તે અનુસાર પગલાં ભરવામાં ચતુર સાબિત થઇ રહ્યા છે. એમાંય હવે તો સાયબર ચોરો પાસે લોકોને ફસાવવા માટે આર્ટિફિશિયલ ઇન્ટેલિજન્સ (AI) નામનું શક્તિશાળી ટૂલ આવી ગયું છે. 

આ લેટેસ્ટ કૌભાંડ એવું હતું કે ડોનાલ્ડ ટ્રમ્પની હોટલમાં રોકાણ કરવા એક લિન્ક મોકલવામાં આવતી હતી. તે ડાઉનલોડ કરવાથી એક ફોર્મ ભરવાની સૂચના મળતી હતી, જેમાં બેન્ક ડિટેલ્સ ભરવાની હતી. આ ઉપરાંત, ૧૫૦૦ રૂપિયા ભરીને રજીસ્ટ્રેશન કરવાનું રહેતું. 

આ રિફન્ડેબલ રકમ હતી. રોજ ૩૦ રૂપિયા રોકાણકારના ખાતામાં પરત જમા કરાવવામાં આવતા  હતા. શરૂઆતમાં રોજ ૩૦ રૂપિયા ખાતામાં આવવા લાગતાં રોકાણકારોને આ સ્કીમ પર ભરોસો બેસી ગયો. તેઓ વધુ લાલચમાં આવીને વધુ રોકાણ કરવા લાગ્યા હતા. 

ઇન્વેસ્ટ થયેલી કુલ રકમ બે કરોડ રુપિયાને વટી ગઈ અઁટલે ૨૦૦ જેટલા લોકોને ચૂનો ચોપડીને કૌભાંડીઓ છૂ  થઇ ગયા. છ લાખ રૂપિયા ગુમાવનાર એક રોકાણકાર પોલીસમાં ફરિયાદ કરી ચૂક્યો છે. સૌથી વધુ બેંગલુરૂના રોકાણકારો ફસાયા છે. બેંગલુરૂ નજીકના હેવરી ગામના ૧૫ લોકો દેખાદેખીમાં પૈસા રોકતા રહ્યા ને આખરે ફસાઈ ગયા. આ કૌભાંડમાં ભણેલાગણેલા અને ઇન્વેસ્ટમેન્ટના મામલામાં ઠીક ઠીક સજાગ ગણાતા લોકો સુદ્ધાં ટ્રમ્પનું નામ અને ચહેરો જોઈને ફસાઇ ગયા હતા. 

સાયબર કૈાભાંડીઓએ ટ્રમ્પ એપ્લિકેશન અને AI જનરેટેડ વીડિયો મુકીને લોકોને રોકાણ માટે આમંત્ર્યા હતા. રોકાણકારોને દેખીતી રીતે જ 'ઊંચું' વળતર મળવાનું હતું. વળતર તો એક બાજુ રહ્યું, સેંકડો રોકાણકારોની કરોડોની મૂડી સ્વાહા થઇ ગઈ હતી. કેટલાક લોકોએ શરુઆતમાં પાંચ હજાર અને પછી એક લાખ રૂપિયા રોક્યા હતા. કેટલાક પોલીસ અધિકારીઓેએ પણ આ કૌભાંડમાં પૈસા ગુમાવ્યા હોવાનું કહેવાય છે. 

જે એપ અને વીડિયો મારફતે રોકાણકારોને ફસાવાયા હતા તે 'ટ્રમ્પ હોટલ રેન્ટલ' સ્કીમ હતી. વીડિયોમાં ડોનાલ્ડ ટ્રમ્પને ઉપરાંત જે હોટલમાં રોકાણ કરવાનું હતું તે પણ દેખાડવામાં આવતું હતું. રજિસ્ટ્રેશન માટે કેવળ પંદરસો રુપિયાની રકમ લોકોને ભારે લાગતી નથી. વળી, અહીં આ રકમ પણ રોજના ત્રીસ-ત્રીસ રુપિયા લેખે પાછી મળી જવાની હતી. અગાઉ નોંધ્યું તેમ, શરુઆતમાં રોજિંદા ૩૦ રુપિયા રોકાણકારોનાં ખાતામાં જમા થયા પણ ખરા. 

કમાલની વાત છે કે સાયબર ક્રિમિનલ્સ લોકોને કરોડોનો ચૂનો ચોપડી જાય પછી જ સાયબર પોલીસ મેદાનમાં ઉતરે છે ને તે પછીય તેઓ ગુનેગારો સુધી તો ભાગ્યે જ પહોંચી શકે છે. સાયબર પોલીસ પાસે એક જ સરળ જવાબ હોય છેઃ કૌભાંડીઓનું સર્વર ચીનમાં કે અન્ય  નાના દેશમાં છે એટલે અમે લાચાર છીએ! 

આ કિસ્સામાં કૌભાંડીઓએ ટ્રમ્પ એપ બજારમાં વહેતી કરીને એવો દાવો કર્યો હતો કે અમેરિકાના પ્રમુખ ખુદ રોકાણકારોને આમંત્રે છે અને વધુ વળતર આપવાની ગેરંટી આપે છે. રોકાણકારો ભોેળા નથી હોતા, પરંતુ વધુ વળતરની લાલચ તેમના મગજ પર પડદો પાડી દે છે. 

કેટલાક સોશિયલ મીડિયા પર થતા સ્માર્ટ માર્કેર્ટિંગનો ભોગ બને છે, તો ક્ટલાક દેખાદેખીનો શિકાર બની જાય છે. રોકાણકારો આમ તો આઇપીઓમાં પણ વિચારીને રોકે છે, પરંતુ ઠગ લોકો રોકાણકારોની સાયકોલોજી સમજીને તેમને આબાદ ફસાવે છે. 

સોશિયલ મીડિયા પર સતત નજર રાખતી સાયબર પોલીસની આખી ફોજ ઊભી કરીને શંકાસ્પદ લાગતી એપ્લિકેશનો, ટૂલ્સ અને વેબસાઇટ્સ પર ચાંપતી નજર રાખવાની જરૂર છે. અમેરિકાના પ્રમુખના નામે કોઇ એપ ચાલતી અને લોકો તેમાં લાખો રૂપિયા રોકતા હોય છતાં સાયબર પોલીસ તેનાથી અજાણ હોય તે કેવી રીતે બને? 

સાયબર પોલીસ ભાગ્યે જ સાયબર ક્રિમિનલના નેટવર્કને આગોતરા  પકડી શકે છે. ડોેનાલ્ડ ટ્રમ્પના નામે ફરતો આ કૌભાંડી વીડિયો એટલો આકર્ષક હતો કે તેની ઝાકઝમાળ પાછળ કૌભાંડીઓ ઢંકાઇ જતા હતા.