ભારતીયોને ઝટકો: અમેરિકાએ H-1B વિઝાની પ્રીમિયમ પ્રોસેસિંગ ફી વધારી, જાણો નવા દર

H-1B VISA Processing Fee Hike : અમેરિકન નાગરિકતા અને ઇમિગ્રેશન સેવા (USCIS) એ H-1B વિઝા સહિત અનેક ઇમિગ્રેશન લાભો માટેની પ્રીમિયમ પ્રોસેસિંગ ફીમાં વધારો કરવાની જાહેરાત કરી છે, જે 1 માર્ચથી લાગુ થશે. USCISના આ નિર્ણયની સીધી અસર અમેરિકામાં કામ કરતા કે અભ્યાસ કરતા હજારો ભારતીય નાગરિકો સહિતના વિદેશી પ્રોફેશનલ્સ પર પડશે.

USCISએ જણાવ્યું છે કે પ્રીમિયમ પ્રોસેસિંગ ફીમાં આ વધારો જૂન, 2023 થી જૂન, 2025 સુધીના 'મોંઘવારીના દરને ધ્યાનમાં રાખીને' કરવામાં આવ્યો છે. આ ફેરફારો રોજગાર-આધારિત અને બિન-આપ્રવાસી અરજીઓ પર અસર કરશે, જેનો ઉપયોગ વિદેશી પ્રોફેશનલ્સ દ્વારા વ્યાપકપણે કરવામાં આવે છે.

કયા વિઝા માટે કેટલી ફી વધી?

સુધારેલા ફી માળખા હેઠળ, વિવિધ કેટેગરીમાં નીચે મુજબનો વધારો કરવામાં આવ્યો છે:

ફોર્મ I-129 (H-2B અથવા R-1 નોન-ઇમિગ્રન્ટ સ્ટેટસ માટે): આ કેટેગરી માટે પ્રીમિયમ પ્રોસેસિંગ ફી $1,685 થી વધીને $1,780 થશે.

ફોર્મ I-129 (H-1B, L-1, O-1, P-1 અને TN વિઝા): આ મુખ્ય કેટેગરીઓ માટે પ્રીમિયમ પ્રોસેસિંગ ફી $2,805 થી વધીને $2,965 કરવામાં આવી છે.

ફોર્મ I-140 (રોજગાર-આધારિત શ્રેણીમાં વિદેશી કામદારો માટે): આ કેટેગરી માટે પણ પ્રીમિયમ પ્રોસેસિંગ ફી $2,805 થી વધીને $2,965 લાગુ થશે.

ફોર્મ I-539 (સ્ટેટસ બદલવા કે લંબાવવા માટે): F-1/F-2 વિદ્યાર્થીઓ, J-1/J-2 એક્સચેન્જ વિઝિટર્સ અને M-1/M-2 વ્યાવસાયિક વિદ્યાર્થીઓને આવરી લેતી અરજીઓ માટેની ફી $1,965 થી વધીને $2,075 થશે.

ફોર્મ I-765 (વર્ક ઓથોરાઇઝેશન માટે): આ કેટેગરી, જેમાં ઓપ્શનલ પ્રેક્ટિકલ ટ્રેનિંગ (OPT) અને STEM-OPTનો સમાવેશ થાય છે, તેના માટે પ્રીમિયમ પ્રોસેસિંગ ફી $1,685 થી વધીને $1,780 કરવામાં આવી છે.

ફી વધારાની સીધી અસર કોના પર પડશે?

પ્રીમિયમ પ્રોસેસિંગ ફીમાં થયેલા આ ફેરફારની સીધી અસર ભારતીય પ્રોફેશનલ્સ, વિદ્યાર્થીઓ અને નોકરીદાતાઓ પર પડવાની પૂરી સંભાવના છે, કારણ કે H-1B, L-1, રોજગાર-આધારિત ગ્રીન કાર્ડ અને OPT જેવી અરજીઓમાં ભારતીયોનો મોટો હિસ્સો હોય છે. નોકરીમાં ફેરફાર, વિઝા લંબાવવા, મુસાફરીની યોજનાઓ અને સ્ટેટસની નિશ્ચિતતા માટે ઝડપી નિર્ણય પ્રક્રિયા મેળવવા માટે નોકરીદાતાઓ અને અરજદારો દ્વારા પ્રીમિયમ પ્રોસેસિંગનો વારંવાર ઉપયોગ કરવામાં આવે છે.

અમેરિકાના રોજગાર-આધારિત વિઝા, ખાસ કરીને H-1B પ્રોગ્રામનો સૌથી વધુ લાભ ભારતીય નાગરિકોને મળે છે, અને ગ્રીન કાર્ડની બાકી અરજીઓમાં પણ તેમનો મોટો હિસ્સો છે. આ ઉપરાંત, અમેરિકન યુનિવર્સિટીઓમાંથી સ્નાતક થતા ભારતીય વિદ્યાર્થીઓ H-1B જેવા લાંબા ગાળાના વર્ક વિઝા મેળવવા માટે ઓપ્શનલ પ્રેક્ટિકલ ટ્રેનિંગ (OPT) અને STEM-OPT એક્સટેન્શનનો વ્યાપકપણે ઉપયોગ કરે છે.

શા માટે કરવામાં આવ્યો ફીમાં વધારો?

USCISએ ભારપૂર્વક જણાવ્યું છે કે ફી વધારાથી થનારી આવકનો ઉપયોગ એજન્સીની કામગીરી સુધારવા માટે કરવામાં આવશે. આ આવકનો ઉપયોગ પ્રીમિયમ પ્રોસેસિંગ સેવાઓ પૂરી પાડવા, નિર્ણય પ્રક્રિયામાં સુધારો કરવા, પ્રોસેસિંગ બેકલોગ સહિતની માંગને પહોંચી વળવા અને USCISની અન્ય નાગરિકતા સેવાઓને ભંડોળ પૂરું પાડવા માટે કરવામાં આવશે.