અમેરિકા ગ્રીન કાર્ડના નિયમો પર સ્પષ્ટતા: કોને મળશે છૂટ અને કોણે જવું પડશે પાછા? જાણો લેટેસ્ટ અપડેટ

DHS Green Card Policy Update 2026: અમેરિકાના ઇમિગ્રેશન કાયદામાં તાજેતરમાં એક મોટો ફેરફાર ચર્ચાનો વિષય બન્યો છે. USCIS (U.S. Citizenship and Immigration Services) ના એક નિર્દેશ બાદ એવી ચિંતા ઊભી થઈ હતી કે તમામ ગ્રીન કાર્ડ અરજદારોએ હવે પરમેનન્ટ રેસિડેન્સી મેળવવા માટે ફરજિયાતપણે પોતાનો દેશ છોડીને અમેરિકાની બહાર કોન્સ્યુલર પ્રોસેસિંગ માટે જવું પડશે. જોકે, ડિપાર્ટમેન્ટ ઓફ હોમલેન્ડ સિક્યોરિટી (DHS) એ હવે આ બાબતે સ્પષ્ટતા કરી છે.

નવી પોલિસી શું છે?

અગાઉની વ્યવસ્થા મુજબ, અમેરિકામાં રહીને જ 'એડજસ્ટમેન્ટ ઓફ સ્ટેટસ' દ્વારા ગ્રીન કાર્ડ મેળવવાનો વિકલ્પ ઉપલબ્ધ હતો. નવી સૂચનાઓ અનુસાર, હવે ઘણા ઇમિગ્રન્ટ્સને ગ્રીન કાર્ડ પ્રોસેસિંગ પૂર્ણ કરવા માટે તેમના માતૃભૂમિ પરત ફરવું પડી શકે છે.

USCISના પ્રવક્તા ઝેક કાહલરના જણાવ્યા અનુસાર, આ પગલાનો મુખ્ય ઉદ્દેશ્ય ઇમિગ્રેશન કાયદાના મૂળ હેતુને પુનઃસ્થાપિત કરવાનો છે. તેનો હેતુ એ છે કે જે લોકો કામ કે અભ્યાસ માટે કામચલાઉ વિઝા (જેમ કે H-1B, F-1, H-4) પર અમેરિકા આવે છે, તેઓએ ગ્રીન કાર્ડ માટે દેશ છોડીને પ્રક્રિયા પૂર્ણ કરવી જોઈએ, જેથી કામચલાઉ વિઝાનો દુરુપયોગ અટકે.

કોને મળશે છૂટછાટ?

DHS એ સ્પષ્ટ કર્યું છે કે આ કોઈ સંપૂર્ણ 'પોલિસી શિફ્ટ' નથી, પરંતુ અધિકારીઓને કાયદાના મૂળ ઉદ્દેશ્યની યાદ અપાવવાનો પ્રયાસ છે. તમામ અરજદારોને દેશ છોડવો પડે તેવું જરૂરી નથી. અધિકારીઓને દરેક કેસ વ્યક્તિગત રીતે તપાસવાની સત્તા આપવામાં આવી છે.

મુખ્ય અપવાદો:

આર્થિક લાભ: જો અરજદાર અમેરિકાની અર્થવ્યવસ્થામાં નોંધપાત્ર યોગદાન આપતા હોય.

રાષ્ટ્રીય હિત: જે અરજદારો અમેરિકાના રાષ્ટ્રીય હિતમાં કામ કરતા હોય, તેમને દેશ છોડ્યા વગર જ તેમની વર્તમાન પ્રક્રિયા ચાલુ રાખવાની મંજૂરી મળી શકે છે.

જેઓ આર્થિક લાભ પ્રદાન કરે છે અથવા રાષ્ટ્રીય હિતમાં છે, તેઓ કદાચ તેમની વર્તમાન પ્રક્રિયા ચાલુ રાખી શકશે, જ્યારે અન્ય લોકોને વ્યક્તિગત સંજોગોના આધારે વિદેશમાં અરજી કરવાનું કહેવામાં આવી શકે છે. — ઝેક કાહલર, USCIS પ્રવક્તા

ઇમિગ્રન્ટ્સ પર શું અસર પડશે?

આ નવી સ્પષ્ટતા હજારો ઇમિગ્રન્ટ્સ માટે રાહતના સમાચાર છે, પરંતુ સાથે જ અરજીઓની સ્ક્રૂટીની ( ચકાસણી ) પણ વધવાની શક્યતા છે. જેઓ રાષ્ટ્રીય હિત કે આર્થિક લાભની કેટેગરીમાં નથી આવતા, તેમને વિદેશમાં જઈને પ્રોસેસિંગ કરવા માટે કહેવામાં આવી શકે છે.