2022 ટેકનોલોજી રાજ કરશે

- કંટેન્ટ ક્રિએટર્સ ટેકનોલોજી કંપનીના નિર્ણયની તરફેણમાં કે વિરુદ્ધમાં મત આપી શકશે

- ૨૦૨૧માં ૫૦ કરોડ કરતા વધુ સાઇબર હુમલા થયા છે, પણ સાઇબર સિક્યોરિટીનું મહત્ત્વ હજી આપણે સમજતા નથી

- સાંસદો અને ધારાસભ્યો માટે એલએલબી ઈચ્છનીય છે તેમ હવે ટેકનોલોજીનું જ્ઞાાન પણ અનિવાર્ય

આકાશમાંથી કોઈ ચીજ જમીન પર ફેંકવામાં આવે તો જેમ-જેમ તે નીચે આવતી જાય તેમ-તેમ તેની ઝડપ મીટર પ્રતિ સેકન્ડ સ્ક્વેરના હિસાબથી વધતી જાય છે. પરિવર્તન આવી જ રીતે આકાશમાંથી ધરતી તરફ આવી રહેલો કોઈ પદાર્થ છે. દિવસે-દિવસે તેની ઝડપ વધતી જાય છે. છેલ્લા ૫૦ વર્ષમાં જેટલું પરિવર્તન જોવા મળ્યું નથી એટલું છેલ્લાં ૧૦ વર્ષમાં જોવામાં આવ્યું છે. બ્લેક એન્ડ વ્હાઈટ ટીવી અને કલર ટીવી વચ્ચે જેટલો સમય લાગ્યો છે એટલો થ્રી-જીથી ફાઈવ-જી વચ્ચે લાગ્યો નથી. પાંપણના પલકારામાં જેટલો સમય લાગે તેને  નિમેષ કહેવામાં આવે છે. અત્યારે પરિવર્તનની ઝડપ કેટલી વધી ગઈ છે કે એકેક નિમેષે દુનિયા બદલાતી જાય છે. રીમોટથી ચેનલ બદલવામાં જેટલો સમય લાગે એટલી વારમાં કંઈક નવું આવી જાય છે અને જૂનું જતું રહે છે. એ નવા સાથે તમે સેટલ થાવ, ન થાવ ત્યાં ફરી પાછું કંઈક આવીને દરવાજે ટકોરા મારે છે.

અત્યારે દુનિયા પર ન તો અમેરિકા રાજ કરે છે, ન તો ચીન. કોઈની હૂકુમત ચાલે છે તો તે ટેકનોલોજીની. ટેકનોલોજીની આ દુનિયામાં ઠરી-ઠામ નામનો કોઈ વિકલ્પ નથી. બદલાવના પવન સાથે તાલ મિલાવવા ચાલતા-દોડતા-ઊડતા રહેવું અનિવાર્ય છે. જરા પણ થોભ્યા કે ઊભા રહ્યા તો ઊડી ગયા સમજો. કોરોનાએ ટેકનોલોજીને જીવનની મુખ્ય ધારામાં લાવી દીધી છે. મોબાઈલ ફોન માત્ર વાતચીત કરવાનું ઉપકરણ ન રહીને ઑફિસ અથવા સ્કૂલ-કોલેજ બની ગયો છે. વેબએક્સ, ઝૂમ અને ગૂગલમીટ દૈનિક જીવનનું અવિભાજ્ય અંગ બની ગયાં છે.  આ સ્થિતિ ૨૦૨૨ના શુભારંભે છે. વર્ષનો અંત આવતા સુધીમાં ઑનલાઈન વિશ્વનો અશ્વ હજી  વધુ કેટલી જમીન સર કરશે તે કલ્પનાનો વિષય છે. 

પહેલા લોકો એકબીજાની ઘરે જઈને નવા વર્ષની શુભકામના પાઠવતા, આ વર્ષે એ જ કામ વીડિયો કોલ પર થઈ રહ્યું છે. વર્ક ફ્રોમ હોમ પહેલાં પણ ચલણમાં હતું, પરંતુ પહેલાં તે દુર્લભ પ્રજાતિની શ્રેણીંમાં આવતું હતું. તેનો દાયરો આઈટી ઈન્ડસ્ટ્રી અને અન્ય ઉદ્યોગોમાં અમુક જોબ વર્ક પૂરતો સીમિત હતો. ૨૦૨૦માં મોટા સ્કેલ પર વર્ક ફ્રોમ હોમની શરૂઆત થઈ. જેમ કોઈ નવો નોકરિયાત છ મહિના કે વર્ષ પછી કાયમી થઈ જાય તેમ ૨૦૨૧માં વર્ક ફ્રોમ હોમને કાયમીનું લેબલ મળી ગયું. ૨૦૨૧માં વેબ ૩.૦નો આરંભ થયો. 

વેબ ૧.૦ એટલે ઈન્ટરનેટની પહેલી પેઢી. તેમાં વેબસાઈટ અને બ્લોગની શરૂઆત થઈ. બીજી પેઢીમાં સોશિયલ મીડિયા પ્લેટફોર્મ આવ્યું. ત્રીજી પેઢી બ્લોક ચેઈન ટેકનોલોજી પર આધારિત છે. એવું કહેવાય છે કે વેબ ૩.૦માં સામાન્ય લોકોને મોટી ટેકનોલોજી કંપનીઓના નિર્ણયને પ્રભાવિત કરવાનો અધિકાર મળશે. જેવી રીતે  લોકશાહીમાં મતદાર પોતાનો નેતા નક્કી કરે છે તેમ ટેકનોલોજી કંપનીના યૂઝર્સ પણ કંપનીના નિર્ણયો પર હા અથવા નાની મ્હોર મારશે. આ અધિકાર કન્ટેન્ટ ક્રિએટ કરનારા લોકોને મળશે.   તેનું અમલીકરણ કઈ રીતે થશે તે સાલ ૨૦૨૨ તથા આવનારા વર્ષમાં જોવા મળશે. 

૨૦૨૧માં ઝકરબર્ગે ફેસબુકની પેરેન્ટ કંપનીનું નામ મેટા કરી નાખ્યું. જેવી રીતે ગૂગલની પેરેન્ટ કંપનીનું નામ આલ્ફાબેટ છે એવી રીતે. મેટા એટલા માટે કેમ કે આવનારા વર્ષો મેટાવર્સના છે. મેટાવર્સ ઈન્ટરનેટનું નવું સ્વરૂપ હશે. તેમાં ફિઝિકલ અને ડિજિટલ જગત વચ્ચેની ભેદરેખા ભુંસાઈ જશે. કોઈ પણ માણસને સ્કેન કરીને તેની હૂબહૂ આકૃતિ  ડિજીટલ વર્લ્ડમાં જીવતા-જાગતા મનુષ્ય જેવી દેખાડી શકાશે. દાખલા તરીકે તમે તમારા અદ્દલ શરીર અને દેખાવ સાથે તમારી જાતને વીડિયો ગેમના પ્લેયર તરીકે જોઈ શકશો. વેબ ૩.૦ને કારણે સોશિયલ મિડીયા અને ઈ-કોમર્સની દુનિયા એક નવી ઊંચાઈ પર સાવ નવા જ રંગ-રૂપ સાથે જોવા મળશે.

પ્રાણીઓની કતલને કારણે અને માંસાહારને કારણે પ્રદૂષણ વધી રહ્યું હોવાનું વૈજ્ઞાાનિકો પણ સ્વીકારે છે. સામા પક્ષે નોનવેજ પ્રેમીઓ તેનો સ્વાદ છોડવા તૈયાર નથી. બંને પક્ષનું માન રહી જાય એવા વિકલ્પ રૂપે હવે લેબોરેટરીમાં માંસ વિકસાવવાનું શરૂ થયું છે.  થ્રીડી પ્રિન્ટિંગ ટેકનોલોજીની મદદ લઈને ચોક્કસ આકારમાં માંસ વિકસાવી શકાય છે.  ઈઝરાયલની રીડીફાઈન કંપનીએ આ પ્રકારે માંસ બનાવીને તેનું વેચાણ શરૂ કરી દીધું છે.   તે જોતા આશા રાખી શકાય કે ૨૦૨૨માં પ્રાણીઓની કતલ ઘટશે. અહિંસાની ભાવનાને પ્રોત્સાહન મળશે. ટેકનોલોજી સુસંસ્કૃત મનુષ્યોની લાગણીને ધ્યાનમાં રાખે એનાથી વિશેષ બીજું શું? 

૨૦૨૨માં ટેકનોલોજી ક્ષેત્રે સૌથી મોટો પ્રશ્ન સાઇબર સિક્યોરિટીનો છે. આજે દરેક વ્યક્તિના હાથમાં મોબાઈલ છે અને દરેક ઘરે કોમ્પ્યુટર છે. સાઇબર સિક્યોરિટીની જરૂરિયાત પણ એટલી જ વ્યાપક બની છે. ૨૦૨૧માં ૫૦ કરોડ કરતાં વધારે સાઇબર હુમલા થયા છે. લાખો લોકોએ પોતાનો સંવેદનશીલ ડેટા રેન્સમવેર હુમલાખોરોને ખંડણીની રકમ ચૂકવીને છોડાવ્યો છે. રેન્સમવેર અટેક ખાળવા માટે સાઇબર સિક્યોરિટીની મહત્તા સમજવી પડે. એ ત્યારે જ સમજાય જ્યારે ટેકનોલોજીનું શિક્ષણ દરેક વિદ્યાર્થીના અભ્યાસ ક્રમનો ભાગ બને. માત્ર અમુક વિદ્યા શાખાઓમાં જ ટેકનોલોજી ભણાવાય એ દિવસો ગયા હવે. ધોરણ ૧૦ સુધીના શિક્ષણમાં બધાને જે સમાન વિષયો ભણાવાય છે તેમાં ટેકનોલોજીનો વિષય ફરજિયાત સમાવવો રહ્યો. ધોરણ ૧૨ પછી કોમર્સ, સાયન્સ કે આર્ટ્સ કોઈ પણ વિદ્યા શાખા હોય તો પણ તમામને ટેકનોલોજીના જનરલ નોલેજને લગતો એક કોમન વિષય ભણાવવો રહ્યો. 

જેમ સાંસદ અને ધારાસભ્યો માટે એલએલબી ઈચ્છનીય છે તેમ ટેકનોલોજીને લગતું બેઝિક જ્ઞાાન પણ અનિવાર્ય છે. જો તેઓ ટેકનોલોજીનું બેઝિક જ્ઞાાન ધરાવતા હોય તો જ તેઓ તેને લગતા પ્રશ્નો ઉઠાવી શકે અને સમયની માગ સમજીને  તદાનુસાર કાયદા ઘડી શકે, તો જ સાઇબર સિક્યોરિટીને મજબૂત બનાવી શકાય અન્યથા  ઓનલાઈન જગતમાં ચાલતી લૂંટમાર ઓર વધતી જવાની. અત્યારે સરકારોને બદલે ટેક કંપનીઓ જગત પર રાજ કરી રહી છે. જગતની દશા અને દિશા નક્કી કરી રહી છે. જો સરકારમાં બેઠેલા નેતાઓ ટેકનોલોજી અને તેના ભવિષ્યને સમજતા નહીં થાય તો સંસદમાં સાચા મુદ્દા પ્રસ્તુત કરી શકશે નહીં. સરકારે ટેકનોલોજીને અન્ય ક્ષેત્રની જેમ સક્ષમતાપૂર્વક  રેગ્યુલરાઈઝ કરવી હશે તો નેતાઓને આ વિશેનું પર્યાપ્ત જ્ઞાાન હોવું ફરજિયાત બની જાય છે.

યુરોપ, અમેરિકા, ચીનની સરકાર આ બાબતમાં સફળ થતી દેખાય રહી છે. યુરોપીય સંઘ ૨૦૨૦માં ડિજિટલ માર્કેટ એક્ટ અને ડિજિટલ સર્વિસીઝ લઈને આવ્યું. અત્યારે અમેરિકામાં ટેકનોલોજી કંપનીઓ સામે એન્ટી ટ્રસ્ટ કાનુન અંતર્ગત પગલાં લેવાય છે. આ કાયદો જૂનો હોવાથી પાંગળો છે તે સમજતી અમેરિકન સરકાર ૨૦૨૨માં ટેકનોલોજી જગતને નાથવા માટે શક્તિશાળી કાયદો લાવશે. 

ટેકનોલોજી સામે કાયદો લાવવાનો ઉદ્દેશ તેની આઝાદીને છીનવી લેવાનો નથી પણ તેને જનસામાન્યની પ્રાઈવસી સાથે ચેડા કરતા અટકાવવાનો છે, સામાન્ય લોકોની સાઇબર સિક્યોરિટી વધારવાનો છે. ૨૦૨૨નું જગત વધારે ટેકનોલોજીમય બનવાનું છે સાથોસાથ એવી પણ કામના કરીએ કે વધારે સલામત અને શાંતિપૂર્ણ બને- હેપ્પી ન્યૂ ઇયર. 

આજની નવી જોક

શિક્ષક (વિદ્યાર્થીઓને) : એક એવું વાક્ય જણાવો જેમાં ઉર્દૂ, હિંદી, પંજાબી, અંગ્રેજી તમામ શબ્દોનો યોગ્ય ઉપયોગ થતો હોય.

લલ્લુઃ ઇશ્ક દી ગલી વીચ નો એન્ટ્રી.

શિક્ષકઃ હેં!?

જીકે જંકશન

- ૨૦૨૧માં ટિક-ટોક વિશ્વમાં સૌથી વધુ ડાઉનલોડ થનારી એપ્લિકેશન બની છે. તેલંગણાની ૧૦૦ ટકા વસ્તીને કોરોના વેક્સિનનો પહેલો ડોઝ આપી દેવામાં આવ્યો છે. 

- ઓડિશામાં રમાઈ રહેલી ચોથી પેરા બેડમિન્ટન રાષ્ટ્રીય ચેમ્પિયનશિપમાં નિતેશ કુમાર ગોલ્ડમેડલ વિજેતા બન્યા છે. મધ્યપ્રદેશને  જલજીવન મિશન માટે કેન્દ્ર સરકાર દ્વારા રૂા. ૧૫,૩૮૧ કરોડની ફાળવણી કરવામાં આવશે.  

- ડો. વેંક્ટમ અય્યર લક્ષ્મણન, નવજોતસિંહ ઢિલ્લો અને ડો. પ્રદિપ મર્ચન્ટને ઓર્ડર ઓફ કેનેડાથી સન્માનિત કરવામાં આવ્યા છે. ભારતીય બોલર જસપ્રીત બુમરાહે વિદેશી ધરતી પર ૧૦૦ વિકેટ ખેરવવાની સિદ્ધિ પ્રાપ્ત કરી છે. 

- ચીનને વૈશ્વિક રોબોટિક્સ હબ બનાવવા માટે શી જિનપિંગે પંચવર્ષીય યોજના શરૂ કરી છે. સેન્ચ્યુરિયનમાં ટેસ્ટ મેચ જીતનારી ભારત એશિયાની પહેલવહેલી ટીમ બની છે. 

- કિશોર યેદમને વર્લ્ડ સીઈઓ વિનર ઓફ ધ ઈયર ૨૦૨૧ પુરસ્કારથી સન્માનિત કરવામાં આવ્યા છે. દક્ષિણ આફ્રિકાના ક્રિકેટર કવિન્ટન ડીકોકે ટેસ્ટ ક્રિકેટમાંથી  સંન્યાસની ઘોષણા કરી છે.  

- ઉત્તરાખંડમાં સુરાઈ ઈકો ટુરિઝમ ઝોનનું ઉદ્ઘાટન કરવામાં આવ્યું છે. સિક્કિમના ગવર્નરે વડા પ્રધાન મોદી માર્ગનું ઉદ્ઘાટન કર્યું હતું.

- ઇજિપ્ત બ્રિક્સની ન્યુ ડેવલોપમેન્ટ બેંકનું ચોથું સદસ્ય બન્યું છે. ડૉ. શ્યામાપ્રસાદ મુખરજી રુર્બન મિશનના અમલીકરણમાં તેલંગાણા સમસ્ત દેશમાં અવ્વલ રહ્યું છે.

- જાપાને વિશ્વનું સૌપ્રથમ ડયુઅલ મોડ વેહિકલ બહાર પાડયું છે. મોહમ્મદ શામી ૨૦૦ ટેસ્ટ વિકેટ લેનારા પ્રથમ ભારતીય બોલર બન્યા છે. 

- પાકિસ્તાને હિંદુ મંદિરોની દેખરેખ માટે પ્રથમ વખત સંસ્થાની સ્થાપના કરી છે. ન્યુ ઝીલેન્ડના ખેલાડી રોસ ટેલરે ક્રિકેટમાંથી નિવૃત્તિની જાહેરાત કરી છે.