બંગાળમાં 'બાબરી' નિર્માણની જાહેરાત કરનારા હુમાયુ કબીરને ઝટકો, AIMIM એ ગઠબંધન તોડ્યું
Summarized by AI; it may make mistakes. Check important info
Summarized by AI; it may make mistakes. Check important info
West Bengal Assembly Election 2026: પશ્ચિમ બંગાળ વિધાનસભા ચૂંટણી પહેલા રાજકીય ગરમાવો તેજ બન્યો છે. તાજેતરમાં જ અસદુદ્દીન ઓવૈસીની પાર્ટી AIMIM એ હુમાયુ કબીરની પાર્ટી 'આમ જનતા ઉન્નયન પાર્ટી'(AJUP) સાથેનું ગઠબંધન તોડી નાખવાની જાહેરાત કરી છે. AIMIM એ સ્પષ્ટ કર્યું છે કે તેઓ હવે બંગાળમાં એકલા હાથે ચૂંટણી લડશે અને ભવિષ્યમાં કોઈ પણ પક્ષ સાથે ગઠબંધન નહીં કરે. હુમાયુ કબીર દ્વારા અગાઉ આપવામાં આવેલા વિવાદિત નિવેદનો અને સોશિયલ મીડિયા પર વાઇરલ થયેલા એક કથિત વીડિયો બાદ આ મોટું પગલું લેવામાં આવ્યું છે. AIMIMનું કહેવું છે કે તેઓ એવા કોઈ પણ નિવેદનનું સમર્થન કરી શકે નહીં જેનાથી મુસ્લિમોના સન્માનને ઠેસ પહોંચે.
મમતા બેનર્જીને હરાવવાના કાવતરાનો TMCનો આરોપ
વિવાદના મૂળમાં હુમાયુ કબીરનો એક કથિત વીડિયો છે, જેમાં તેઓ ભાજપના વરિષ્ઠ નેતાઓ સાથે સંપર્કમાં હોવાનો અને મુખ્યમંત્રી મમતા બેનર્જીને હરાવવા માટે કોઈ પણ હદ સુધી જવાની વાત કરતા સાંભળવા મળે છે. આ વીડિયો સામે આવ્યા બાદ તૃણમૂલ કોંગ્રેસ(TMC) એ આક્રમક વલણ અપનાવ્યું છે. TMCના નેતાઓ અને મંત્રીઓ ફિહરાદ હકીમ તથા અરૂપ બિસ્વાસે આક્ષેપ કર્યો છે કે કબીર લઘુમતી મતોમાં વિભાજન પાડીને ભાજપને ફાયદો પહોંચાડવાનું કાવતરું ઘડી રહ્યા છે. TMC એ આ મામલે ED તપાસની માંગણી કરી છે અને આરોપ લગાવ્યો છે કે આ બંગાળમાં સત્તા પરિવર્તન માટે રચાયેલું એક કાવતરું છે.
AIMIM એ તોડ્યું ગઠબંધન
બીજી તરફ, હુમાયુ કબીરે આ વીડિયોને નકલી અને AIની મદદથી બનાવવામાં આવ્યો હોવાનું જણાવીને પોતાનો બચાવ કર્યો છે. તેમણે કાયદેસરની કાર્યવાહી કરવાની પણ ધમકી આપી છે. ઉલ્લેખનીય છે કે, કબીરે અગાઉ પશ્ચિમ બંગાળમાં બાબરી મસ્જિદ બનાવવા અંગે કરેલી ચર્ચાને કારણે તૃણમૂલ કોંગ્રેસે તેમને પક્ષમાંથી બહાર કરી દીધા હતા, ત્યારબાદ તેમણે પોતાની નવી પાર્ટી બનાવી હતી. હવે AIMIM દ્વારા છેડો ફાડી નાખવામાં આવતા ચૂંટણી પહેલા કબીર માટે આ એક મોટો રાજકીય ફટકો માનવામાં આવી રહ્યો છે.
