'પહેલા ધોરણથી ફક્ત મરાઠી-અંગ્રેજી જ ભણાવો...', રાજ ઠાકરેએ 'હિન્દી' નો ખુલ્લેઆમ વિરોધ કર્યો

Raj Thackeray: મહારાષ્ટ્રમાં છેલ્લા કેટલાક મહિનાઓથી શાળા શિક્ષણમાં હિન્દી ફરજિયાત શીખવવા અંગે ઘણી મૂંઝવણ ચાલી રહી છે. દરમિયાન, બુધવારે, મહારાષ્ટ્ર નવનિર્માણ સેના (મનસે) ના પ્રમુખ રાજ ઠાકરેએ રાજ્યના શિક્ષણમંત્રી દાદાજી ભૂસેને લેખિત આદેશ જારી કરવા માટે પત્ર લખ્યો હતો. જેમાં તેમણે કહ્યું હતું કે, 'પહેલા ધોરણથી ફક્ત બે ભાષાઓ, મરાઠી અને અંગ્રેજી, ફરજિયાત કરવી જોઈએ, જ્યારે હિન્દીને વૈકલ્પિક ભાષા તરીકે રાખવી જોઈએ.'

એપ્રિલ મહિનામાં, મહારાષ્ટ્ર સરકારે તમામ મરાઠી અને અંગ્રેજી માધ્યમની શાળાઓમાં ધોરણ 1 થી 5 ના વિદ્યાર્થીઓ માટે ત્રીજી ભાષા તરીકે હિન્દીનો અભ્યાસ ફરજિયાત બનાવ્યો હતો. આ નિર્ણયનો મનસે સહિત ઘણા પક્ષોએ વિરોધ કર્યો હતો. વિરોધ બાદ, સરકારે આ નિર્ણય પર રોક લગાવી દીધી હતી.

રાજ ઠાકરેએ દાદા ભૂસેને પત્ર લખીને કરી આ માંગણી

રાજ ઠાકરેએ બુધવારે રાજ્યના શાળા શિક્ષણ મંત્રી દાદાજી ભૂસેને અપીલ કરી હતી કે તેઓ શક્ય તેટલી વહેલી તકે એક લેખિત આદેશ જારી કરે જેમાં જણાવવામાં આવે કે ધોરણ 1 થી ફક્ત બે ભાષાઓ, મરાઠી અને અંગ્રેજી શીખવવામાં આવશે અને હિન્દીને ત્રીજી ભાષા તરીકે ફરજિયાત બનાવવામાં આવશે નહીં.

જો આવું નહીં થાય, તો પાર્ટી વિરોધ કરશે

આ અંગે રાજ ઠાકરેનું કહેવું છે કે, 'અમારી પાસે માહિતી છે કે હિન્દી સહિત ત્રણ ભાષાઓ શીખવવાના અગાઉના નિર્ણયના આધારે, હિન્દી ભાષાના પાઠ્યપુસ્તકોનું છાપકામ શરૂ થઈ ગયું છે. હવે જ્યારે પુસ્તકો છાપવામાં આવ્યા છે, તો શું સરકાર તેના નિર્ણય પર પાછા ફરવાનું વિચારી રહી છે?'

રાજ ઠાકરેએ મહારાષ્ટ્ર સરકારને ચેતવણી આપી હતી કે જો આવું નહીં થાય પાર્ટી રાજ્યવ્યાપી આંદોલન શરૂ કરશે અને તેના માટે સરકાર જવાબદાર રહેશે.

આ પણ વાંચો: 'મહાકુંભમાં પણ નાસભાગ મચી હતી...' બેંગ્લુરુની ઘટના પર સવાલ ઊઠતા કર્ણાટકના CMનો જવાબ

ઘણા રાજ્યો હિન્દી ભાષા અપનાવવાનો ઇનકાર કરે છે 

ઘણા રાજ્યો સ્થાનિક ભાષાને પોતાની ઓળખ માનતી હોવાથી હિન્દી ભાષા અપનાવવાનો ઇનકાર કર્યો હતો. તેમણે રાજ્યના શિક્ષણમંત્રી ભૂસેને કહ્યું કે, 'તમે જન્મથી મરાઠી છો. તમે અન્ય નેતાઓની જેમ ક્યારે કામ કરશો?, જેઓ હિન્દી ભાષાનો વિરોધ કરે છે અને તેમની સ્થાનિક ભાષાનું રક્ષણ કરે છે. અમને આશા છે કે રાજ્ય સરકાર અન્ય રાજ્યોની જેમ તેની સ્થાનિક ભાષા માટે લાગણી બતાવશે.'