હવે 18% ટેરિફ મંજૂર નથી! ટ્રેડ ડીલ માટે અમેરિકા સામે ભારતે મૂકી આ મોટી શરત

India US trade deal updates 2026: ભારત અને અમેરિકા વચ્ચેની મહત્વાકાંક્ષી વ્યાપાર કરાર પર ગમે ત્યારે હસ્તાક્ષર થઈ શકે છે તેવી ચર્ચાઓ વચ્ચે કેન્દ્રીય વાણિજ્ય અને ઉદ્યોગ મંત્રી પીયૂષ ગોયલનું એક બહુ મોટું નિવેદન સામે આવ્યું છે. ગોયલે સ્પષ્ટ કર્યું છે કે બંને દેશો વચ્ચે વ્યાપાર સમજૂતી માટેની વાતચીત લગભગ પૂરી થઈ ચૂકી છે, પરંતુ ભારત એક મહત્વપૂર્ણ શરત પૂરી ન થાય ત્યાં સુધી આ ડીલ પર સહી કરવા માટે તૈયાર નથી. ભારતને અમેરિકા પાસેથી સત્તાવાર ગેરંટી જોઈએ છે કે તેના નિકાસ થતા માલને અમેરિકન માર્કેટમાં અન્ય દેશોની સરખામણીએ ટેરિફનો વિશેષ લાભ મળવો જ જોઈએ.

ભારતની મુખ્ય માંગ શું છે?
આ ડીલમાં થઈ રહેલા વિલંબ પાછળનું મુખ્ય કારણ ટેરિફ રેટ છે. ભારત ઈચ્છે છે કે અમેરિકામાં નિકાસ થતી ભારતની વસ્તુઓ, ખાસ કરીને કાપડ, દવાઓ અને એન્જિનિયરિંગ પ્રોડક્ટ્સ પર વિયેતનામ કે બાંગ્લાદેશ જેવા હરીફ દેશોની સરખામણીએ ઓછો આયાત ટેરિફ લાગવો જોઈએ. જો ભારતીય ઉત્પાદનો પર પણ અન્ય સ્પર્ધકો જેટલો જ ટેરિફ લાગશે, તો ભારતીય બિઝનેસ માટે આ વ્યાપાર કરારનું આર્થિક મહત્વ ઘણું ઓછું થઈ જશે. પીયૂષ ગોયલે ભારપૂર્વક જણાવ્યું છે કે જ્યાં સુધી તુલનાત્મક લાભના આ માળખાને અંતિમ ઓપ આપવામાં નહીં આવે, ત્યાં સુધી ભારત અમેરિકા સાથે કોઈ કરાર પર હસ્તાક્ષર નહીં કરે.

18 ટકા ટેરિફ રેટ પર નવો વળાંક
અગાઉ ભારત અને અમેરિકા વચ્ચે થયેલી વાતચીતમાં ભારતીય વસ્તુઓ પર 18 ટકા ટેરિફ રેટ નક્કી કરવામાં આવ્યો હતો. જો કે, વાણિજ્ય મંત્રીએ સ્પષ્ટ કર્યું કે આ આંકડો હંમેશા ભારતને મળનારા વિશેષ લાભના આધારે નક્કી કરાયો હતો, નહીં કે તમામ વ્યાપારિક ભાગીદારો માટે સમાન દર તરીકે. જો અન્ય દેશોને પણ સમાન કે તેનાથી વધુ સારો ટેરિફ લાભ મળવા લાગશે, તો ભારત માટે આ કરારનો મૂળ હેતુ જ સમાપ્ત થઈ જશે. હાલમાં બંને દેશો એવા રસ્તો શોધી રહ્યા છે જેના હેઠળ અમેરિકા ભારતને ટેરિફમાં વિશેષ કાપ આપી શકે.

આ મહાડીલનું આર્થિક મહત્વ
આ પ્રસ્તાવિત વ્યાપાર કરારમાં ટેરિફ, ઇન્વેસ્ટમેન્ટ પ્રોવિઝન અને વિવિધ ક્ષેત્રોમાં પરસ્પર સહયોગ જેવા મુદ્દાઓ સામેલ છે. વિશ્વની સૌથી મોટી અર્થવ્યવસ્થા અમેરિકા અને પાંચમી સૌથી મોટી અર્થવ્યવસ્થા ભારત વચ્ચેના આ કરારથી ભારતીય નિકાસકારો માટે નવા બજારોના દ્વાર ખુલશે અને બંને દેશોના આર્થિક સંબંધો વધુ મજબૂત બનશે. બંને પક્ષો 6 ફેબ્રુઆરીથી આ ડીલને ફાઇનલ કરવા માટે સતત પ્રયત્નો કરી રહ્યા છે અને અમેરિકા જે દિવસે ટેરિફની ગેરંટી આપશે, તે જ દિવસે આ ડીલ પાકી થઈ જશે.