જર્મનીમાં સુરક્ષા સંમેલન ખાતે પાક. જનરલને પ્રવેશ કરતા અટકાવાયા
મુનિરને ટપારવાની ઘટના સામાન્ય હતી પણ વરિષ્ઠ લશ્કરી અધિકારીનું ચેકિંગ થતાં આશ્ચર્ય
એક સુરક્ષા અધિકારીનું ધ્યાન ગયું કે મુનિરનો ઓળખ બેજ સ્પષ્ટપણે દેખાતો નહોતો અને તેણે મુનિરને બેજ યોગ્યપણે પ્રદર્શિત કરવા જણાવ્યું. આ ઘટના બની ત્યારે સ્થળની બહાર સિંધી સંગઠનો સંમેલનમાં પાકિસ્તાનની હાજરી સામે વિરોધ પ્રદર્શિત કરી રહ્યા હતા.
આ ઘટનાના વાયરલ થયેલા વીડિયોમાં અધિકારી પોતાના બેજ પર ઠપકારતો અને મુનિરને દોરી તરફ ઈશારો કરીને તેને ફેરવવા વિનંતી કરતો જોઈ શકાય છે. આ વાતચીત શાંત અને પ્રક્રિયાત્મક રહી હતી જેમાં કોઈ ટકરાવ અથવા વિરોધ નહોતો દેખાતો. જો કે વર્તમાન આર્મી ચીફને પળભર માટે અટકાવવાની ઘટનાએ નોંધપાત્ર ઓનલાઈન આકર્ષણ જમાવ્યું.
આ ઘટના વિશ્વના સૌથી પ્રતિષ્ઠિત સિક્યોરિટી મેળાવડા ખાતે બની હતી જ્યાં વૈશ્વિક નેતાઓ, રાજદ્વારીઓ અને લશ્કરી અધિકારીઓ દર વર્ષે મહત્વના આંતરરાષ્ટ્રીય પડકારો પર ચર્ચા કરવા માટે ભેગા થાય છે. મ્યુનિક સિક્યોરિટી કોન્ફરન્સ તેમાં ભાગ લેનારાના હાઈ પ્રોફાઈલ પ્રકારને ધ્યાનમાં રાખીને તેની સખત સુરક્ષા વ્યવસ્થા માટે જાણીતુ છે.
આ ઘટના બની ત્યારે સ્થળ ખાતે વ્યાપક વિરોધ પ્રદર્શનો થઈ રહ્યા હતા. જર્મન સ્થિત એક સિંધી રાજકીય સંગઠન જીયે સિંધ મુત્તાહિદા મહાઝએ મુનિરની હાજરીનો વિરોધ કર્યો હતો. તેના અધ્યક્ષ શફી બુરફતે નિવેદન જારી કરીને પાકિસ્તાનમાં માનવીય અધિકારોના ઉલ્લંઘનનો આરોપ કરીને જોરદાર ચિંતા વ્યક્ત કરી હતી.
સંમેલનના પ્રોટોકોલને જોતા બેજ ચેકિંગ એક સામાન્ય બાબત ગણી શકાય પણ તે મુનિરના દરજ્જાને કારણે ચર્ચાનો વિષય બની ગઈ. વૈશ્વિક શાંતિ અને સુરક્ષા પર ગંભીર ચર્ચાની પૃષ્ઠભૂમિ સામે આ પળે યાદ અપાવી કે સૌથી વરિષ્ઠ લશ્કરી નેતાઓએ પણ આંતરરાષ્ટ્રીય ફોરમો ખાતે સ્થાપિત પ્રક્રિયાનું પાલન કરવું પડે છે.
