સંસદમાં આજે નવા સીમાંકન મુદ્દે સરકારને ઘેરવા વિપક્ષે હાથ મિલાવ્યા

- મહિલા અનામત, સીમાંકન માટે ગુરુવારથી સંસદમાં વિશેષ સત્ર

- લોકસભાની બેઠકો વધારવાની જરૂર નથી, હાલ જેટલી બેઠકો છે તેમાં જ મહિલાઓને અનામત આપો : વિપક્ષ 

નવી દિલ્હી : લોકસભામાં ગુરુવારથી વિશેષ સત્ર શરૂ થવા જઇ રહ્યું છે, આ સત્ર દરમિયાન સરકાર દ્વારા મહિલા અનામત અને સીમાંકનનું બિલ રજુ કરવામાં આવશે, જેને પગલે વિપક્ષ આક્રમક રીતે આ બિલનો વિરોધ કરવાની તૈયારીમાં છે. બુધવારે જ વિરોધનો સુર શરૂ થઇ ગયો હતો. નવા સીમાંકનમાં અનેક રાજ્યો સાથે અન્યાય થશેના આરોપો લગાવીને વિપક્ષ સરકારને ઘેરવાની તૈયારીમાં છે.

ત્રણ દિવસનું વિશેષ સત્ર શરૂ થાય તે પહેલા કોંગ્રેસ અધ્યક્ષ મલ્લિકાર્જુન ખડગેના નિવાસ સ્થાને વિપક્ષના નેતાઓની બેઠક મળી હતી જેમાં વિરોધ માટેની સ્ટ્રેટેજી પર ચર્ચા કરવામાં આવી હતી. આ બેઠકમાં ખડગે ઉપરાંત રાહુલ ગાંધી, ડીએમકેના ટી આર બાલુ, આરજેડીના તેજસ્વી યાદવ, સપાના અખિલેશ યાદવ, આપના સંજયસિંહ,  ટીએમસીના સાગરીકા ઘોષ, શિવસેના ઉદ્ધવના નેતા સંજય રાઉત, એનસીપીના સુપ્રીયા સુલે, સાંસદ કપિલ સિબલ સહિતના ટોચના નેતાઓનો સમાવેશ થાય છે. બેઠક બાદ પત્રકારોની સાથે વાતચીત દરમિયાન કોંગ્રેસ અધ્યક્ષ ખડગેએ કહ્યું હતું કે સીમાંકન માટેની બિલમાં જે જોગવાઇ કરવામાં આવી છે તેની વિરુદ્ધમાં મતદાન કરવાનું વિપક્ષે નક્કી કર્યું છે. વિપક્ષ મહિલા અનામત વિરુદ્ધ નથી પરંતુ રાજકીય હેતુ માટે જે રીતે બિલ રજુ કરાયું છે તેની સામે વિરોધ છે. મહિલા અનામત માટે લોકસભાની બેઠકો વધારવાની જરૂર નથી, સરકાર હાલમાં લોકસભાની જે ૫૪૩ બેઠકો છે તેમાં જ મહિલાઓ માટે ૩૩ ટકા અનામત જાહેર કરે. એક્સ (ટ્વિટર) પર કરેલી પોસ્ટમાં રાહુલ ગાંધીએ કહ્યું હતું કે સરકાર નવા સીમાંકન દ્વારા દક્ષિણ, પૂર્વોત્તર સહિતના નાના રાજ્યો સાથે અન્યાય કરવા જઇ રહી છે તેને વિપક્ષ નહીં ચલાવે. પ્રાપ્ત માહિતી મુજબ લોકસભાની કુલ બેઠકો હાલ ૫૪૩ છે તે વધીને ૮૫૦ કરવામાં આવશે. વસતી પ્રમાણે બેઠકો ફાળવવામાં આવશે, જે રાજ્યોએ વસતી વધારા પર કન્ટ્રોલ રાખ્યો અને વસતી ઓછી રાખી તેનું પ્રતિનિધિત્વ ઘટી જશે તેવા આરોપ સાથે વિપક્ષ આ બિલનો વિરોધ કરવા જઇ રહ્યું છે. હાલમાં લોકસભામાં એનડીએની કુલ હેઠકો ૨૯૨ છે જ્યારે વિપક્ષની બેઠકો ૨૩૩ છે. એવામાં આ બિલ લોકસભામાં પસાર થઇ જશે. જોકે રાજ્યો દ્વારા તેનો વિરોધ શરૂ થઇ ગયો છે.