પૂર્વ ઉપ રાષ્ટ્રપતિ ધનખડના સ્વાગત માટે ભાજપના કોઈ નેતા ન આવ્યા, કોંગ્રેસે માર્યો ટોણો

Jagdeep Dhankhar News :  કોંગ્રેસના વરિષ્ઠ નેતા અને રાજ્યસભા સાંસદ દિગ્વિજય સિંહે શુક્રવારે ભારતીય જનતા પાર્ટી (BJP) પર આકરા પ્રહાર કર્યા હતા. તેમણે કહ્યું કે ચાર મહિના પહેલા ઉપરાષ્ટ્રપતિ પદેથી રાજીનામું આપનાર જગદીપ ધનખડ ભોપાલની મુલાકાતે આવ્યા, ત્યારે તેમના સ્વાગત માટે ભાજપનો કોઈ પણ નેતા એરપોર્ટ પર હાજર ન રહ્યો. દિગ્વિજય સિંહે આ ઘટનાને ભાજપની "'યુઝ એન્ડ થ્રો' (ઉપયોગ કરો અને ફેંકી દો)" નીતિનું ઉત્તમ ઉદાહરણ ગણાવ્યું.

શું કહ્યું દિગ્વિજય સિંહે? 

એરપોર્ટ પર ભાજપના નેતાઓની ગેરહાજરી અંગે પ્રતિક્રિયા આપતા દિગ્વિજય સિંહે કહ્યું, "વાત એ છે કે તેમના (ભાજપ) માટે એ જ વ્યક્તિ મહત્વપૂર્ણ છે જે તેમના કામમાં આવે. યુઝ એન્ડ થ્રો. આ જ ભાજપ છે." જોકે, તેમણે એમ પણ ઉમેર્યું કે, "હું અત્યારે આરએસએસ વિશે આવું ન કહી શકું કારણ કે તેઓ (ધનખડ) તેમના કાર્યક્રમમાં ભાગ લેવા આવ્યા છે." દિગ્વિજય સિંહે એ પણ જણાવ્યું કે તેમણે પૂર્વ ઉપરાષ્ટ્રપતિને મળવા માટે તેમના અધિકારી પાસે સમય માંગ્યો હતો.

શા માટે ભોપાલ આવ્યા હતા ધનખડ? 

પૂર્વ ઉપરાષ્ટ્રપતિ જગદીપ ધનખડ, જેમણે ચાર મહિના પહેલા સ્વાસ્થ્યના કારણોસર પોતાના પદ પરથી રાજીનામું આપ્યું હતું, તેઓ શુક્રવારે ભોપાલમાં રાષ્ટ્રીય સ્વયંસેવક સંઘ (RSS)ના વરિષ્ઠ પદાધિકારી મનમોહન વૈદ્ય દ્વારા લખાયેલા પુસ્તકના વિમોચન કાર્યક્રમમાં હાજરી આપવા પહોંચ્યા હતા. રાજીનામું આપ્યા બાદ આ તેમનું પ્રથમ જાહેર સંબોધન હતું. પોતાના સંબોધનમાં, ધનખડે એક મજબૂત રાષ્ટ્રના નિર્માણ માટે આરએસએસના વિચારો અને દ્રષ્ટિકોણની પ્રશંસા કરી હતી. તેમણે દેશના વિશ્વાસ, સાંસ્કૃતિક મૂળ અને સંસ્થાઓની એકતાને જાળવી રાખવાની વાત પર ભાર મૂક્યો હતો.