VIDEO : બેંગ્લુરુમાં જાહેરમાં પત્નીનું ગળું કાપવાની કોશિશ કરતાં પતિને રાહદારીઓએ ઢીબી કાઢ્યો

Domestic Violence In Bengaluru: કર્ણાટકના બેંગ્લુરુમાં માનવતા અને બહાદુરીનું એક ઉત્કૃષ્ટ ઉદાહરણ જોવા મળ્યું છે. જ્યારે એક પાગલ બનેલો પતિ પોતાની પત્નીની જાહેરમાં હત્યા કરવાનો પ્રયાસ કરી રહ્યો હતો, ત્યારે ત્યાંથી પસાર થતા લોકો મૂકપ્રેક્ષક બનવાને બદલે મદદે દોડી આવ્યા હતા. લોકોએ આરોપીને બરાબરનો મેથીપાક ચખાડી મહિલાને મોતના મુખમાંથી બચાવી લીધી હતી.

શું છે સમગ્ર ઘટના?

અહેવાલો અનુસાર, મૂળ બિહારના રહેવાસી સંજય અને સોનાલી બેંગ્લુરુમાં સ્થાયી થયા હતા. આ બંનેના બીજા લગ્ન હતા. જોકે, સંજયના દારૂ પીવાની કુટેવને કારણે દંપતી વચ્ચે અવારનવાર ઝઘડા થતા હતા. વિવાદ એટલો વધ્યો હતો કે સોનાલીએ સંજય સાથે રહેવાનો ઇનકાર કરી દીધો હતો. આ વાતનો ખાર રાખીને સંજયે સોનાલીને ખતમ કરવાનો પ્લાન બનાવ્યો હતો.

CCTVમાં કેદ થઈ ભયાનક ઘટના

નેલમંગલા વિસ્તાર નજીકના સીસીટીવી ફૂટેજમાં જોઈ શકાય છે કે સોનાલી રસ્તા પરથી પસાર થઈ રહી હતી, ત્યારે હેલ્મેટ પહેરીને સ્કૂટર પર આવેલા સંજયે તેને આંતરી હતી. સંજયે સોનાલીને પકડીને જમીન પર પછાડી દીધી હતી અને તેનું ગળું કાપી નાખવાનો પ્રયાસ કર્યો હતો. સોનાલી જીવ બચાવવા માટે સંઘર્ષ કરી રહી હતી.

લોકોનો રોષ અને સમયસૂચકતા

સામાન્ય રીતે આવી ઘટનાઓમાં લોકો વીડિયો બનાવવામાં વ્યસ્ત રહેતા હોય છે, પરંતુ અહીં લોકોએ હિંમત બતાવી હતા. મહિલાની ચીસો સાંભળીને આસપાસના લોકો અને વાહનચાલકો તુરંત દોડી આવ્યા હતા. આરોપી સંજય પત્નીને છોડવા તૈયાર નહોતો, જેના કારણે ગુસ્સે ભરાયેલા લોકોએ તેને હેલ્મેટ, ચપ્પલ અને મુક્કાઓથી ઢીબી નાખ્યો હતો. લોકોએ એટલો માર માર્યો કે અંતે સંજયે પત્નીને છોડવી પડી અને તે પોતે જીવની ભીખ માંગવા લાગ્યો હતો.

પોલીસ તપાસ અને જનતાની પ્રશંસા

ઘટના બાદ પોલીસ સ્થળ પર પહોંચી હતી અને આરોપી સંજયની અટકાયત કરી છે. પોલીસ તપાસમાં બહાર આવ્યું છે કે તે સોનાલીની હત્યા કરવાના ઈરાદે જ આવ્યો હતો. સોશિયલ મીડિયા પર આ ઘટનાના વીડિયો વાઈરલ થયા બાદ લોકો બેંગ્લુરુના જાગૃત નાગરિકોની ભારે પ્રશંસા કરી રહ્યા છે, જેમણે મોબાઈલ ફોન સાઈડમાં મૂકીને એક અજાણી મહિલાનો જીવ બચાવવા માટે બહાદુરી બતાવી.