ભાષા વિવાદ: સ્ટાલિન સરકારે બજેટમાંથી ₹ ચિહ્ન હટાવ્યું, ભાજપે કહ્યું- પહેલા પોતાનું નામ બદલો

Tamil Nadu government rupee symbol: તમિલનાડુમાં ચાલી રહેલા ભાષા વિવાદ વચ્ચે સ્ટાલિન સરકારે મોટો નિર્ણય લીધો છે. બજેટ દરમિયાન, સરકારે '₹' ચિહ્નને હટાવીને તેના સ્થાને 'ரூ' ચિહ્ન મૂક્યું છે. રૂપિયાનું ચિહ્ન સત્તાવાર રીતે સમગ્ર દેશમાં અપનાવવામાં આવે છે. હવે સ્ટાલિન સરકાર એક અલગ ચિહ્ન લઈને આવી છે. તેણે બજેટ દરમિયાન એક નવું ચિહ્ન પણ બહાર પાડ્યું છે. દેશભરમાં રૂપિયાનું નવું ચિહ્ન જાહેર થયા બાદ, તમિલનાડુ એવું પહેલું રાજ્ય છે જેણે અલગ ચિહ્ન જારી કર્યું છે.

હિન્દી ભાષાને લઈને લાંબા સમયથી વિવાદ 

સ્ટાલિન સરકારનું આ પગલું એવા સમયે આવ્યું છે જ્યારે હિન્દી ભાષાને લઈને લાંબા સમયથી વિવાદ ચાલી રહ્યો છે. તાજેતરમાં, એમકે સ્ટાલિને સોશિયલ મીડિયા પર એક પોસ્ટમાં કહ્યું હતું કે 'સમગ્ર દેશમાં હિન્દી ઓળખ સ્થાપિત કરવાના પ્રયાસોને કારણે, પ્રાચીન ભાષાઓ લુપ્ત થઈ રહી છે. બિહાર અને ઉત્તર પ્રદેશ ક્યારેય હિન્દીભાષી વિસ્તારો નહોતા. હવે તેમની મૂળ ભાષા ભૂતકાળનું પ્રતીક બની ગઈ છે.

આ ભાષાઓને નષ્ટ કરવાનો આરોપ

અન્ય રાજ્યોના લોકોને અપીલ કરતાં એમ કે સ્ટાલિને કહ્યું હતું કે, 'અન્ય રાજ્યોમાં રહેતા મારા ભાઈઓ અને બહેનો, શું તમે ક્યારેય વિચાર્યું છે કે હિન્દી ભાષાએ બીજી કેટલી ભાષાઓનો કબજો કરી લીધો છે? મુંડારી, મારવાડી, કુરુખ, માલવી, છત્તીસગઢી, સંથાલી, કુરમાલી, ખોરથા, મૈથિલી, અવધી, ભોજપુરી, બ્રજ, કુમાઉની, ગઢવાલી, બુંદેલી અને બીજી ઘણી ભાષાઓ હવે તેમના અસ્તિત્વ માટે સંઘર્ષ કરી રહી છે.

ભાજપે નિશાન સાધ્યું

ભાજપે તમિલનાડુ સરકારના આ નિર્ણયની નિંદા કરી છે. ભાજપના પ્રવક્તાએ કહ્યું કે, 'એમકે સ્ટાલિનની પાર્ટીના ભારતથી અલગ થવાનું વલણ બતાવે છે. ભાજપના નેતા નારાયણન તિરુપતિએ જણાવ્યું હતું કે રૂપિયાના ચિહ્નને વ્યાપકપણે ભારતના ચિહ્ન તરીકે ઓળખવામાં આવે છે.

ભાજપના પ્રદેશ અધ્યક્ષ અન્નામલાઈએ રાજ્ય સરકારના આ નિર્ણયની ટીકા કરી છે. સાથે જ તેમણે સ્ટાલિન સરકારના આ નિર્ણયને મૂર્ખામીભર્યું પગલું ગણાવ્યું છે. તેમણે કહ્યું કે, 'એક તમિલિયન અને ડીએમકેના ભૂતપૂર્વ ધારાસભ્યના પુત્રએ રૂપિયાનું પ્રતીક ડિઝાઇન કર્યું છે.'

તમિલનાડુ સરકાર ₹નું નવું ચિહ્ન જાહેર કર્યું 

સમગ્ર ભારતમાં ₹ ચિહ્ન અપનાવવામાં આવ્યું છે, જે 2010માં સરકાર દ્વારા અપનાવવામાં આવ્યું હતું. તે પ્રખ્યાત ડિઝાઇનર ઉદય કુમાર ધર્મલિંગમ દ્વારા ડિઝાઇન કરવામાં આવેલું છે, જેઓ તમિલનાડુના જ છે. આ ચિહ્ન ભારતીય ત્રિરંગા પર આધારિત હોવાથી તેને રાષ્ટ્રીય માન્યતા મળી છે. પરંતુ હવે તમિલનાડુ સરકારે તેને બદલીને 'ரூ' કરી દીધું છે, જેને તમિલ ભાષામાં રૂપિયાનું પ્રતીક માનવામાં આવે છે.

તમિલ ઓળખને મજબૂત કરવાનો પ્રયાસ

રાજકીય વિશ્લેષકો માને છે કે તમિલનાડુ સરકારે ₹ના ચિહ્નને બદલીને તમિલ ઓળખને વધુ મજબૂત કરવાનો પ્રયાસ કર્યો છે. ડીએમકે સરકાર પહેલાથી જ હિન્દી લાદવાની વિરુદ્ધ છે અને ઘણી વખત કેન્દ્ર સરકારની ભાષા નીતિનો વિરોધ કરી ચૂકી છે.