જાણો, 1956માં કોલકાતાથી લંડન દોડતી હતી બસ, દુનિયાના સૌથી લાંબા રુટનું ભાડુ હતું 13518 રુપિયા

નવી દિલ્હી, 6  જુલાઇ,2022,બુધવાર 

એક સમય એવો હતો કે ભારતના કોલકતાથી લંડન સુધી બસ જતી હતી. ૭૦ના દાયકામાં આ બસ સેવા સિડનીની એક ટૂર એન્ડ ટ્રાવેલ્સ કંપની સંચાલિત કરતી હતી. આ બસ સેવા એ સમયે દુનિયામાં સૌથી લાંબો બસ રુટ ગણાતો હતો. સિડનીની અલ્બર્ટ ટૂર એન્ડ ટ્રાવેલ્સ કંપનીએ ૧૯૫૬માં આ બસ સર્વિસ શરુ કરી હતી જે ૧૯૭૩ સુધી ચાલું રહી હતી. 

કોલકતાથી લંડન જનારી આ બસનું શેડયૂલ્ડ પહેલાથી જ તૈયાર કરવામાં આવતું હતું. રસ્તામાં નકકી કરેલા જોવાલાયક સ્થળોની મુલાકાત લેવાની અને ફરવાની છુટ આપવામાં આવતી હતી.આ બસ ટૂર સંચાલિત કંપનીની નકકી કરેલી હોટલમાં બસ રાત્રી રોકાણ કરતી હતી. લંડન જનારી આ બસમાં યાત્રીઓ સારી એવી સંખ્યામાં રહેતા હતા. કોલકતાથી બસના રુટની શરુઆત થાય જે  નવી દિલ્હી, કાબુલ, તહેરાન, ઇસ્તાંબુલ થઇને લંડન જતી હતી.

આ બસના રુટમાં પાકિસ્તાન, અફઘાનિસ્તાન, ઇરાન. તુર્કી, બલ્ગેરિયા, યુગોસ્લાવિયા, ઓસ્ટ્રીયા, જર્મની અને બેલ્જીયમ થઇને 45 થી 46 દિવસ લંડન પહોંચતી હતી. સ્લીપિંગ કોચની સગવડ ધરાવતી આ બસમાં મુસાફરો રેડિયો અને ટેપ ચાલુ કરીને મ્યુઝિક સાંભળી શકતા હતા. ગરમીના લાગે તે માટે પંખા અને ઠંડી સામે રક્ષણ આપવા હિટરની સગવડ હતી. કોલકતાથી લંડન જતી ડબલ ડેકર બસ આલ્બર્ટના નામથી ઓળખાતી હતી. આ બસ નકકી કરેલા રુટ પરથી જ બસ પાછી પણ આવતી હતી. 

બસયાત્રીઓને સ્લીપિંગ બર્થની સગવડ મળતી હતી. 

આ બસમાં લોકોની મુસાફરી જેટલી પણ આરામદાયક રહે તેટલો સંપૂર્ણ પ્રયાસ કરવામાં આવતો હતો. 1972 સુધી કોલકતાથી લંડન સુધીનું બસ ભાડુ 145 પાઉન્ડ એટલે કે અંદાજે 13518 રુપિયા હતું. જેમાં બસ ભાડા ઉપરાંત નાસ્તો, ભોજન અને હોટલમાં રહેઠાણની સગવડ પણ આવી જતી હતી. કોલકત્તામાં નાની બસોમાં બેસીને મુસાફરો ડબલ ડેકર બસ સુધી આવતા હતા. લંડન જતા બસયાત્રીઓને સ્લીપિંગ બર્થની સગવડ મળતી હતી. બારીની બહારથી નજારો જોઇ શકતા હતા. બસમાં સલૂન, પુસ્તકો વાંચવા અને નજારો લેવા માટે ખાસ એક બાલકની હતી.