યુનેસ્કો વર્લ્ડ હેરિટેજની યાદીમાં પિંક સિટી જયપુરનો સમાવેશ

નવી દિલ્હી, તા. 6 જુલાઈ 2019 શનિવાર

યુનેસ્કો વર્લ્ડ હેરિટેજની યાદીમાં ભારતના વધુ એક શહેરનો સમાવેશ થઈ ગયો છે. રાજસ્થાનની રાજધાની જયપુર શહેરને યુનેસ્કો વર્લ્ડ હેરિટેજ જાહેર કરી દેવામાં આવ્યુ છે. આ એલાન યુનેસ્કોએ શનિવારે કર્યુ. રાજસ્થાનમાં 37 વર્લ્ડ હેરિટેજ સાઈટ્સ છે. આમાં ચિત્તોડગઢનો કિલ્લો, કુંભલગઢ, જેસલમેર, રણથંભોર અને ગાગરોનનો કિલ્લો સામેલ છે.

આ એલાન યુનેસ્કો વર્લ્ડ હેરિટેજ કમિટીના અજયરબૈજાનના બાકુમાં જારી 43માં સત્ર બાદ કરવામાં આવ્યુ છે. વડાપ્રધાન નરેન્દ્ર મોદીએ આ સિદ્ધિ પર ટ્વીટ કરીને શુભેચ્છા આપી છે. તેમણે ટ્વીટ કરી છે. જયપુરનો સંબંધ સંસ્કૃતિ અને શૌર્ય સાથે છે. ઉત્સાહથી ભરપૂર જયપુરની મેહમાનનવાઝી લોકોને આ તરફ ખેંચે છે. ખુશી છે કે આ યુનેસ્કોએ વર્લ્ડ હેરિટેજ સાઈટ જાહેર કરી છે.

ગત વર્ષે ઓગસ્ટમા પિંક સિટીને યુનેસ્કો વર્લ્ડ હેરિટેજ સાઈટ જાહેર કરવા માટે સરકાર તરફથી પ્રસ્તાવ મોકલવામાં આવ્યો હતો. 2017ના ઑપરેશન ગાઈડલાઈન અંતર્ગત એક રાજ્યથી દર વર્ષે માત્ર એક સ્થાનને જ વર્લ્ડ હેરિટેજ બનાવવા માટે પ્રસ્તાવિત કરી શકાય છે. આ દરજ્જો મળવાથી ઘરેલુ અને આંતરરાષ્ટ્રીય પર્યટનને પ્રોત્સાહન મળવાથી અર્થવ્યવસ્થાને મજબૂતી મળે છે અને લોકોને રોજગાર પણ મળે છે. હસ્તશિલ્પ અને હસ્તકલા ઉદ્યોગ પણ આજીવિકાને પણ ફાયદો થાય છે.