ટ્રમ્પના ટેરિફ વચ્ચે ભારતે અમેરિકા સાથે કરી વધુ એક ડીલ, નેવી માટે 7995 કરોડનો સોદો

India-US sign Rs 7995 cr deal for MH-60R: રશિયાના રાષ્ટ્રપતિ વ્લાદિમીર પુતિનના આગામી સપ્તાહના ભારત પ્રવાસ પહેલાં ભારતે અમેરિકા સાથે એક મહત્ત્વપૂર્ણ સંરક્ષણ કરાર પર હસ્તાક્ષર કર્યા છે. ભારતીય નૌસેનાના 24 સી-હોક હેલિકોપ્ટર કાફલા માટે 5 વર્ષના 'ફોલો-ઓન સપોર્ટ' એટલે કે સતત સમર્થનના હેતુથી, આશરે ₹8000 કરોડની આ મોટી ડીલ અમેરિકા સાથે કરવામાં આવી છે. આ કરાર એવા સમયે થયો છે જ્યારે અમેરિકન પ્રમુખ ડોનાલ્ડ ટ્રમ્પ દ્વારા ઑગસ્ટમાં ભારતીય વસ્તુઓ પર કુલ 50 ટકાનો ટેરિફ લગાવ્યા બાદ બંને દેશોના સંબંધોમાં થોડો તણાવ જોવા રહ્યો છે.

₹7995 કરોડના LOAs પર હસ્તાક્ષર

સંરક્ષણ મંત્રાલયે માહિતી આપી કે MH-60R હેલિકોપ્ટર કાફલાના સંબંધમાં અમેરિકા સાથે ₹7995 કરોડના પ્રસ્તાવ અને સ્વીકૃતિ પત્ર(LOAs) પર હસ્તાક્ષર કરવામાં આવ્યા છે. લોકહીડ માર્ટિન કોર્પોરેશન દ્વારા તૈયાર કરાયેલા આ MH-60R સી-હોક હેલિકોપ્ટર્સ, જે બ્લેકહૉક હેલિકોપ્ટરનું દરિયાઈ વેરિઅન્ટ છે, તે તમામ હવામાનમાં ઉપયોગમાં લેવા માટે અસરકારક છે. ભારતે લગભગ 5 વર્ષ પહેલાં, ફેબ્રુઆરી 2020માં, 24 MH-60R હેલિકોપ્ટરની ખરીદી માટે અમેરિકા સાથે કરાર કર્યો હતો અને તેની પ્રથમ 3 યુનિટની ખેપ 2021માં ભારતને મળી હતી.

'ફોલો-ઓન સપોર્ટ' એક વ્યાપક પેકેજ

સંરક્ષણ મંત્રાલયના નિવેદન અનુસાર, આ 'ફોલો-ઓન સપોર્ટ' પેકેજ ખૂબ જ વ્યાપક છે, જેમાં સ્પેરપાર્ટ્સ, સહાયક ઉપકરણો, ઉત્પાદન સમર્થન, તાલીમ અને ટેકનિકલ સહાયતા સહિતની અનેક જોગવાઈઓનો સમાવેશ થાય છે. મંત્રાલયે ભારપૂર્વક જણાવ્યું કે, આ સુવિધાઓના વિકાસને કારણે દેશમાં લાંબા સમય માટે કેપેબીલીટીનું નિર્માણ થશે અને અમેરિકન સરકાર પરની નિર્ભરતા ઘટશે, જે આત્મનિર્ભર ભારતના વિઝનને સાકાર કરવામાં મદદ કરશે. 

આ પણ વાંચો: દિલ્હી બ્લાસ્ટ અંગે કોંગ્રેસ નેતાનું વિવાદિત નિવેદન, આતંકીઓ વિશે બોલતા જીભ લપસી!

MSME અને ભારતીય કંપનીઓને પ્રોત્સાહન

આ કરારને કારણે MSME (મિનિસ્ટ્રી ઑફ માઇક્રો, સ્મોલ ઍન્ડ મીડિયમ એન્ટરપ્રાઇઝિસ) અને અન્ય ભારતીય કંપનીઓ દ્વારા સ્વદેશી ઉત્પાદનો અને સેવાઓના વિકાસને પ્રોત્સાહન મળશે. આ સતત સમર્થનથી MH-60R હેલિકોપ્ટરોની ઓપરેશનલ ઉપલબ્ધતા અને જાળવણીમાં સુધારો થશે, જે તેમની મહત્ત્વપૂર્ણ એન્ટી-સબમરીન વૉરફેર ક્ષમતાને વધુ મજબૂત કરશે.